ءوز سوزىندە باۋىرجان بايبەك پارتيانىڭ سىبايلاس جەمقورلىققا قارسى كۇرەستى ودان ءارى كۇشەيتەتىنىن ايتىپ, بۇل جۇمىستى ەڭ الدىمەن ۇيىمنىڭ ءوز ىشىنەن باستايتىنىن جەتكىزدى. وسى رەتتە ماڭعىستاۋ وبلىسىندا كەيبىر باسشىلىق قىزمەتتەگى ادامداردىڭ سىبايلاس جەمقورلىقپەن ۇستالعانى تۋرالى دەرەكتەردىڭ بار ەكەنىن اتاپ وتكەن ءجون.
– وڭىرلىك فيليالدىڭ باسشىلىعى جەمقورلىققا قارسى كۇرەس جونىندەگى قوعامدىق كەڭەستەردىڭ قۇرامى مەن جۇمىسىن جۇيەلى قاداعالاپ وتىرۋ كەرەك. قازىر پارتيا قاتارىن «تازالاۋ» جۇمىستارىن جۇرگىزەمىز. بۇل ىستە ءبىز سانعا ەمەس, ساپاعا باسا ءمان بەرەمىز, – دەدى پارتيا توراعاسىنىڭ ءبىرىنشى ورىنباسارى.
ادامعا لايىقتى جاعداي جاساۋ, ونىڭ قۇقىقتارى مەن ەركىندىگىن قورعاۋ, جوعارى ءومىر ءسۇرۋ دەڭگەيىن قامتاماسىز ەتۋ – پارتيا جۇمىسىنىڭ نەگىزگى باسىمدىقتارى. سوندىقتان قازاقستان پرەزيدەنتى قاسىم-جومارت توقاەۆتىڭ سايلاۋالدى تۇعىرناماسىن جۇزەگە اسىرۋدا پارتيانىڭ ءرولى ەرەكشە.
وسى ماسەلەگە نازار اۋدارعان پارتيا توراعاسىنىڭ ءبىرىنشى ورىنباسارى باستى مىندەت حالىقتىڭ سەنىمىن كۇشەيتۋ ەكەنىن ءسوز ەتتى.
سونىمەن بىرگە جيىن بارىسىندا دەپۋتاتتىق ساۋالدار بۇكىل قوعامدى الاڭداتقان اسا وزەكتى ماسەلەلەرمەن ۇندەسىپ, بايلانىسىپ جاتۋى كەرەكتىگى, پارتيا وسى باعىتتاعى باقىلاۋدى كۇشەيتۋى ءتيىس ەكەنى ايتىلدى. وسى رەتتە پارتيا توراعاسىنىڭ ءبىرىنشى ورىنباسارى ماڭعىستاۋ وبلىستىق ماسليحاتىنداعى دەپۋتاتتىق فراكتسيانىڭ جۇمىسى كوڭىل كونشىتپەيتىنىنە نازار اۋداردى.
– جۇمىس قورىتىندىسى بويىنشا ماڭعىستاۋ وبلىسى سوڭعى ەكى جىلدا كوش سوڭىندا قالىپ كەلەدى. ەگەر ءبىزدىڭ دەپۋتاتتار بەلسەندىلىك تانىتىپ, وزەكتى ماسەلەلەردى تالقىلاپ, حالىقپەن كەزدەسپەسە, بۇقارالىق اقپارات قۇرالدارى مەن الەۋمەتتىك جەلىلەردە سويلەمەسە, قانداي قوعامدىق سەنىم تۋرالى ايتۋعا بولادى؟! پارتيا جارتى جىلدان كەيىن سايلاۋعا كىممەن بارادى؟! سوندىقتان بۇل باعىتتا ماڭعىستاۋ وبلىسى ءتيىمدى تەتىكتەردى ىسكە قوسۋى كەرەك, – دەدى باۋىرجان بايبەك.
سونىمەن قاتار ول ەلباسى, پارتيا ءتوراعاسىنىڭ جاڭا كەزەڭدە باستاۋىش پارتيا ۇيىمدارىنىڭ جۇمىسىن جانداندىرۋ, حالىقپەن كەرى بايلانىستى جۇيەلى جولعا قويۋ, ءار ءوتىنىشتى نازاردان تىس قالدىرماي, دەر كەزىندە ارەكەت ەتۋدى پارتيانىڭ الدىنا ماڭىزدى مىندەتتەر رەتىندە قويىپ وتىرعانىن ايتتى.
– پارتيا حالىقتىڭ ءۇنىن ەستي دە, تىڭداي دا ءبىلۋ كەرەك. سول سەبەپتى پارتيانىڭ قوعامدىق قابىلداۋ جۇمىسىن كۇشەيتۋىمىز قاجەت. بۇل ىستە ماڭعىستاۋ وبلىسىندا وتىنىشتەردى تىركەۋدە كەشىگۋ سياقتى ماسەلەلەر بار. سوندىقتان ءاربىر كەلىپ تۇسكەن ءوتىنىش مىندەتتى تۇردە تىركەلىپ, ول تولىعىمەن وڭ شەشىمىن تاپقانعا دەيىن قاتاڭ باقىلاۋدا بولۋى ءتيىس, – دەدى پارتيا توراعاسىنىڭ ءبىرىنشى ورىنباسارى.
ايتا كەتەيىك, ب.بايبەكتىڭ قاتىسۋىمەن وتكەن پارتيا وبلىستىق فيليالىنىڭ كونفەرەنتسياسىندا ماڭعىستاۋ وبلىسىنىڭ اكىمى سەرىكباي ترۇموۆ پارتيانىڭ وبلىستىق فيليالىنىڭ توراعاسى بولىپ سايلاندى.
سونداي-اق Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ قاتىسۋىمەن قىزىلوردادا Nur Otan پارتياسى وبلىستىق فيليالىنىڭ كەزەكتەن تىس وتكەن XXV كونفەرەنتسياسى ءوتىپ, وندا ءۇش ماسەلە قارالدى.
كۇن تارتىبىندەگى ءبىرىنشى ماسەلە بويىنشا Nur Otan پارتياسى وبلىستىق فيليالىنىڭ جاڭا توراعاسىن سايلاۋعا قىزىلوردا وبلىسىنىڭ اكىمى قۋانىشبەك ىسقاقوۆتىڭ كانديداتۋراسى ۇسىنىلعان بولاتىن. دەلەگاتتار وبلىستىق پارتيا فيليالىنىڭ جاڭا توراعاسىنىڭ كانديداتۋراسىن ءبىراۋىزدان قولدادى. Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك قۋانىشبەك ىسقاقوۆتى قۇتتىقتاپ, كۋالىك تابىس ەتتى.
– قۋانىشبەك دوسمايىل ۇلىن جاڭا جاۋاپتى قىزمەتكە تاعايىندالۋىمەن قۇتتىقتايمىن. ول – وسى ءوڭىردىڭ تۋماسى, ءوز ءىسىنىڭ مامانى, جاۋاپتى قىزمەتتەردى اتقارعان تاجىريبەلى باسشى. قىرىمبەك ەلەۋ ۇلى قىزىلوردا وبلىسىنىڭ اكىمى بولىپ تۇرعان كەزدە كوپ ەڭبەك اتقاردى, سىر ءوڭىرىن دامىتۋ ءۇشىن, ونىڭ ىشىندە جاڭا جۇمىس ورىندارىن قۇرۋ, كاسىپكەرلەردى قولداۋ, مەكتەپكە دەيىنگى ءبىلىم بەرۋ مەن تاربيەمەن قامتاماسىز ەتۋ جانە تاعى باسقا ماڭىزدى ماسەلەلەر بويىنشا كوپ جۇمىستار ىستەدى. قۋانىشبەك دوسمايىل ۇلى دا ايماقتىڭ الەۋمەتتىك ماسەلەلەرىن وڭتايلى شەشۋدە ايانباي ەڭبەك ەتەدى دەپ سەنەمىن, – دەدى ب.بايبەك.
كەلەسى ماسەلە بويىنشا ءسوز العان پارتيانىڭ وبلىستىق فيليالى توراعاسىنىڭ ورىنباسارى ەرجان بايتىلەستىڭ ۇسىنىسىمەن وبلىس اكىمى, پارتيانىڭ وبلىستىق فيليالى توراعاسى قۋانىشبەك ىسقاقوۆ ساياسي كەڭەس بيۋروسىنىڭ مۇشەسى بولدى.
باۋىرجان بايبەك Nur Otan پارتياسىنىڭ الداعى ۋاقىتتاعى مىندەتتەرىن بەلگىلەپ, سايلاۋالدى شتابتىڭ جۇمىسىنا بەلسەندى قاتىسقان پارتيا مۇشەلەرىن پرەزيدەنتتىڭ العىس حاتىمەن ماراپاتتادى.
