ولاردىڭ اراسىندا ماماندىعىن سالىق جانە كەدەن ورگاندارىمەن بايلانىستىرعىسى كەلەتىندەر دە بولادى.
وبلىس بويىنشا مەملەكەتتىك كىرىستەر دەپارتامەنتىنىڭ باسشىسى عالىمجان ورىنوۆ ايماقتاعى جوعارى جانە ورتا ارناۋلى وقۋ ورىندارىنىڭ باسشىلارىمەن كەزدەسۋىندە وسى ماماندىقتى تاڭداعان جاستاردىڭ قازىردەن باستاپ سالىق زاڭدىلىقتارىنىڭ, سالىق تولەۋ جۇيەسىنىڭ قالاي جۇمىس ىستەپ جاتقاندىعىن ءبىلگەنىن ءجون سانايتىندىعىن ايتتى.
كەزدەسۋ بارىسىندا تاراپتار ەكىجاقتى ىنتىماقتاستىق تۋرالى مەموراندۋم جاساستى.
كەزدەسۋدە دەپارتامەنت باسشىسى بولجامدالعان كىرىس كوزدەرى بويىنشا سالىقتىق جانە باسقا دا مىندەتتى تولەمدەردىڭ بيۋدجەتكە ءتۇسۋىن قامتاماسىز ەتۋ باستى مىندەت ەكەنىن جەتكىزدى. وبلىستا سوڭعى 5 ايدا مەملەكەتتىك بيۋدجەتكە بارلىعى 70 ملرد 310 ملن تەڭگە وندىرىلگەن. مەجەلەنگەن جوسپار 59 ملرد 209 ملن تەڭگە بولسا, جوعارىداعى كورسەتكىش جوسپاردىڭ 118,7%-عا نەمەسە 11 ملرد 101 ملن تەڭگەگە ارتىق ورىندالعانىن بايقاتادى.
– سالىق تولەمدەرىنىڭ تولىق جينالۋى – مەملەكەتتىڭ ءوز مىندەتتەرىن تولىق ورىنداۋعا مۇمكىندىك بەرەدى. جينالعان قارجى ءبىرىنشى كەزەكتە ۇستازداردىڭ, دارىگەرلەردىڭ جالاقىسىنا جانە زەينەتاقىعا جۇمسالاتىنى بەلگىلى. سوندىقتان مەملەكەتتىك كىرىستەر ورگانى ءۇشىن سالىقتى ۋاقىتىلى تولەۋگە ۇگىت-ناسيحات جۇمىستارىن ءجۇرگىزۋ – باستى مىندەتتەردىڭ ءبىرى. ال وسى ىسكە سىزدەر دە اتسالىسىپ جاتساڭىزدار, ول نۇر ۇستىنە نۇر بولار ەدى, – دەگەن عالىمجان قالدىكوز ۇلى ىنتىماقتاستىق مەموراندۋمى اياسىندا ستۋدەنت جاستار ءۇشىن كوپتەگەن شارالار بەلگىلەنىپ وتىرعاندىعىن ايتتى.
دەپارتامەنت باسشىسى ستۋدەنتتەردى كىرىس ورگاندارىندا ءتاجىريبەدەن وتۋگە شاقىرىپ, جاقسى جاعىنان كورىنگەن ستۋدەنتتەردىڭ بولاشاقتا مەملەكەتتىك كىرىستەر ورگاندارى مەن وسى سالاعا قاتىستى جۇمىستارعا ورنالاسۋى ءۇشىن قولداۋ بولاتىندىعىن جەتكىزدى. كەزدەسۋ سوڭىندا مەموراندۋمعا عالىمجان ورىنوۆ جانە قورقىت اتا اتىنداعى قمۋ رەكتورىنىڭ ءمىندەتىن اتقارۋشى باقىتحان ابدىكارىموۆ, «بولاشاق» ۋنيۆەرسيتەتىنىڭ رەكتورى قۋانىش داۋرەنبەكوۆ, قازاق گۋمانيتارلىق زاڭ جانە تەحنيكالىق جوعارى كوللەدج ديرەكتورىنىڭ مىندەتىن اتقارۋشى قانات اقپانوۆ, قىزىلوردا ينجەنەرلىك-تەحنيكالىق كوللەدج ديرەكتورى يسا جەتەرباەۆ قول قويدى.
