جيىندا ءسوز العان شىمكەنتتىك «ورداباسىنىڭ» باس باپكەرى كاحابەر تسحادادزە كوماندانىڭ ەرتەڭگى ويىنعا تاس ءتۇيىن دايىن ەكەنىن جەتكىزدى.
«تورپەدو» كۋتايسي - قارىمدى كوماندا. ءبىز كوماندانىڭ سوڭعى ءۇش جىلدا ءوز ەلىندەگى مۇمكىن بولعان جۇلدەلەردىڭ بارلىعىن ۇتقانىن جاقسى بىلەمىز. كوماندا ەل چەمپيوناتى, كۋبوك پەن سۋپەر كۋبوكتى جەڭدى, ال وتكەن جىلى ىشكى چەمپيوناتتا ەكىنشى ورىن يەلەندى. قازىر دە كوماندادا ويىنشىلار اۋىسىپ جاتىر ەكەن. دەگەنمەن, ويىندا جەڭۋگە «ورداباسىنىڭ» تاجىريبەسى جەتەرلىك. ءبىزدىڭ جىگىتتەردىڭ كوڭىل كۇيى جاقسى. جاراقاتتان امانبىز. ءار ماتچ ءبىز ءۇشىن ماڭىزدى. سوندىقتان الداعى ويىندا جەڭىسكە جەتۋگە بار كۇشىمىزدى سالامىز», دەدى باس باپكەر.
«ورداباسىنىڭ» كاپيتانى ماردان تولەبەك: «العاشقى ماتچتا شىمكەنتتە ويناعالى تۇرمىز. بۇل, ءبىر جاعىنان بىزگە دە جىگەر بەرەدى دەپ ويلايمىن. سەبەبى, جانكۇيەرلەردىڭ قولداۋى ارقاشاندا ماڭىزدى. بارشاڭىزدى ويىندى تاماشالاۋعا شاقىرامىن», دەدى.
قارسىلاس كوماندانىڭ باس باپكەرى كاحابەر چحەتياني بولسا: «ويىندارىڭىزدى بۇعان دەيىن تاماشالادىق. «ورداباسى» - وسال ەمەس, مىقتى كلۋب. كوماندالارىڭىزدا ءبىر-ءبىرىن جاقسى تۇسىنەتىن شەبەر فۋتبولشىلار بار. ءبارىن جاسىل الاڭ كورسەتەدى», دەپ قىسقا قايىردى.
ايتا كەتسەك, شىمكەنتتىك «ورداباسىعا» قارسىلاس اتانعان گرۋزيانىڭ «تورپەدوسى» قايبىر جىلدارى كسرو ءبىرىنشى ليگاسىندا چەمپيون اتانىپ, جوعارى ليگادا 13 ماۋسىم ونەر كورسەتكەن. گرۋزيا تاۋەلسىزدىگىن العان سوڭ «تورپەدو» ۋماگلەسي ليگاسىندا ءتورت مارتە چەمپيون بولعان. ەۋرودوداعا 1998 جىلدان بەرى قاتىسىپ كەلەدى. 2012/13 جىلعى ماۋسىمدا ەۋروپا ليگاسىنىڭ العاشقى ىرىكتەۋ كەزەڭىندە «اقتوبەمەن» كەزدەسكەن. قوس ماتچتىڭ قورىتىندىسى بويىنشا 2:1 ەسەبىمەن ەسە جىبەرىپ, جارىس جولىنان شىعىپ قالعان. تاريحىنداعى ۇزدىك كورسەتكىشكە بىلتىر قول جەتكىزگەن. ەۋروپا ليگاسىنىڭ توپتىق كەزەڭىنە ءبىر قادام جەردە بولگاريانىڭ «لۋدوگورەتس» كومانداسىنان جەڭىلىپ قالدى.
ايتا كەتەرلىگى, «ورداباسى» مەن «تورپەدو» (كۋتايسي) كوماندالارى اراسىنداعى كەزدەسۋ نۇر-سۇلتان ۋاقىتىمەن 20.00-دە باستالادى. ويىن Qazsport تەلەارناسىنان تىكەلەي ەفيردە كورسەتىلەدى. قارىمتا كەزدەسۋ 18 شىلدەدە وتكىزىلەدى. بۇل جۇپتىڭ جەڭىمپازى ەكىنشى ىرىكتەۋ كەزەڭىندە چەحيانىڭ «ملادا بولەسلاۆ» كومانداسىمەن 25 شىلدە جانە 1 تامىز كۇندەرى شەبەرلىك بايقاسادى.
