اۋەلى ارىس قالالىق ورتالىق اۋرۋحاناسىنداعى قۇرىلىس الاڭىنا بارعان اسقار ۇزاقباي ۇلىنا دەنساۋلىق ساقتاۋ ءمينيسترى ەلجان ءبىرتانوۆ ەمدەۋ مەكەمەسىنىڭ بۇگىنگى جاعدايى تۋرالى ايتىپ بەردى.
سالا ءمينيسترى «ارىستاعى اۋرۋحانادا جوندەۋ جۇمىستارى ءجۇرىپ جاتقاندىقتان ناۋقاستار ۋاقىتشا ەمحاناعا ەمدەلۋدە, ءبىر اي ىشىندە مۇنداعى جاعداي تولىقتاي رەتكە كەلتىرىلەدى», دەپ سەندىردى. قازىرگى ۋاقىتتا اۋرۋحاناعا «سامۇرىق-قازىنا» اق مەن «قازويلسەرۆيس» جشس قاراجاتى ەسەبىنەن قالپىنا كەلتىرۋ جانە جوندەۋ جۇمىستارى جۇرگىزىلۋدە.
«ارىس قالالىق ورتالىق اۋرۋحاناسىنداعى مەديتسينالىق قوندىرعىلاردى جاڭارتۋ 1 تامىزعا دەيىن جۇزەگە اساتىن بولادى. بۇل ماسەلەگە قاجەتتى قاراجات ءبولىندى. جارىلىس كەزىندە زاقىم كەلگەن مەديتسينالىق قۇرال-جابدىقتار تولىقتاي جاڭارتىلىپ, ولاردى ساتىپ الۋ جاعى شەشىلەدى», دەدى ەلجان ءبىرتانوۆ.
ساپار بارىسىندا ۇكىمەت باسشىسى جامبىل وبلىسىنىڭ شتابىنا بەرىلگەن تۇرعىن سەكتورىندا بولىپ, حالىقپەن كەزدەستى. تۇركىستان وبلىسىنىڭ اكىمى ومىرزاق شوكەەۆ پەن قر قورعانىس ءمينيسترى نۇرلان ەرمەكباەۆ حالىققا قالانىڭ اسكەري سنارياد قالدىقتارىنان تۇگەل تازارتىلاتىنىن ايتتى. سەكتور تۇرعىندارى جامبىلدىقتاردىڭ جوندەۋ جۇمىستارىن جاقسى ۇيىمداستىرىپ جاتقانىن تىلگە تيەك ەتىپ, مەملەكەت قامقورلىعىنا العىس ءبىلدىردى.
ارىستىق تۇرعىندارمەن كەزدەسىپ, حالىقتىڭ مۇڭ-مۇقتاجىن تىڭداعان اسقار مامين: «كورىپ وتىرسىزدار, ءبىر ايدىڭ ىشىندە بارلىق جۇمىس بىتەدى دەگەن سەنىم بار. اپتا سايىن كەلىپ, جوندەۋ جۇمىستارىن تەكسەرىپ تۇرامىز», دەدى.
سونداي-اق, ۇكىمەت باسشىسى حالىققا قىزمەت كورسەتۋ ورتالىعىنا بولىپ, تۇرعىندارعا 100 مىڭ تەڭگەدەن وتەماقى تولەۋ بويىنشا جۇرگىزىلىپ جاتقان جۇمىستارمەن تانىستى.
اپاتتان زاقىم كەلگەن نىسانداردى ارالاۋ قورىتىندىسى بويىنشا پرەمەر-مينيستر وبلىستىق شتابتا ارىس قالاسىن قالپىنا كەلتىرۋ ماسەلەلەرى جونىندە كەڭەس وتكىزدى.
ءوز كەزەگىندە وبلىس اكىمى ومىرزاق شوكەەۆ قالا تۇرعىندارىنا الەۋمەتتىك كومەك كورسەتۋ اياسىندا 650 از قامتىلعان جانە كوپ بالالى وتباسىلارعا اتاۋلى الەۋمەتتىك كومەك تاعايىندالىپ, تولەم جۇرگىزىلگەنىن ايتىپ ءوتتى.
قورعانىس, ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, يندۋستريا جانە ينفراقۇرىلىمدىق دامۋ, ىشكى ىستەر, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىنىڭ باسشىلارى الەۋمەتتىك قولداۋ شارالارى, مەديتسينالىق قىزمەتتەر كورسەتۋ, تۇرعىن ۇيلەردى قالپىنا كەلتىرۋ بويىنشا جۇرگىزىلىپ جاتقان جۇمىستار تۋرالى باياندادى.
ارىستاعى وزدەرىنە تيەسىلى سەكتورلار بويىنشا الماتى وبلىسىنىڭ اكىمى ا. باتالوۆ, اقمولا وبلىسىنىڭ اكىمى ە.مارجىقپاەۆ, اقتوبە وبلىسىنىڭ اكىمى و.ورازالين, اتىراۋ وبلىسىنىڭ اكىمى ن.نوعاەۆ, شىعىس قازاقستان وبلىسىنىڭ اكىمى د.احمەتوۆ, شىمكەنت قالاسىنىڭ اكىمى ع.ءابدىراحىموۆ قۇرىلىس جۇمىستارىنىڭ قارقىنى تۋرالى قىسقاشا ەسەپ بەردى.
بۇگىندە 676 تۇرعىن ۇيگە جوندەۋ جۇمىستارى اياقتالعان. قازىرگى كەزدە بارلىق سەكتورلار جۇمىستارمەن قامتىلعان, 3 040 جەكە تۇرعىن ءۇي قۇرىلىسى مەن كوپقاباتتى تۇرعىن ۇيلەر نىساندارىندا قالپىنا كەلتىرۋ جۇمىستارى جۇرگىزىلۋدە, 190 قۇرىلىس كومپانياسى, 5 مىڭعا جۋىق قۇرىلىسشىلار مەن 207 ارنايى تەحنيكا جۇمىلدىرىلعان. الەۋمەتتىك ينفراقۇرىلىم بويىنشا جۇمىستار 66 دەنساۋلىق ساقتاۋ, ءبىلىم بەرۋ, سپورت نىساندارىندا جۇرگىزىلىپ جاتىر.
كەڭەستى قورىتىندىلاعان قر پرەمەر-ءمينيسترى اسقار مامين قالانى قالپىنا كەلتىرۋ جۇمىستارىنا ەلىمىزدىڭ بارلىق وڭىرلەرى, ۇلتتىق كومپانيالار, ءىرى بيزنەس وكىلدەرى بەلسەندى قاتىسىپ جاتقانىن ايتتى.
«ارىس قالاسىن قالپىنا كەلتىرۋ بويىنشا بارلىق نەگىزگى جۇمىستار 1 تامىزعا دەيىن اياقتالۋى ءتيىس», دەدى اسقار مامين.
ۇكىمەت باسشىسى سالا جاۋاپتىلارىنا ارىستاعى ايتىپ كەلمەگەن اپات سالدارىنان قيراعان بيزنەس نىساندارىن, كولىك جانە ينجەنەرلىك ينفراقۇرىلىمدى ۋاقىتىلى قالپىنا كەلتىرۋ جۇمىستارىن كۇشەيتۋدى تاپسىردى. ءارى, مەديتسينالىق قامتاماسىز ەتۋ بويىنشا كەشەندى شارالار قابىلداپ, ءبىلىم بەرۋ مەكەمەلەرىن جاڭا وقۋ جىلىنىڭ باستالۋىنا ساقاداي-ساي ەتۋدى مىندەتتەدى.
ارىس
