– سۇيرىك – بەكىرە تۇقىمداس تۇششى سۋ بالىعى. ۇزاق ءومىر سۇرەدى. سالماعى 250-800 گرامم عانا بۇل بالىقتى ۇستاۋ ءۇشىن ارنايى رۇقسات كەرەك. ەلىمىزدىڭ «قىزىل كىتابىنا» ەنگىزىلگەن ول جايىق, ەرتىس, توبىل وزەندەرىندە كەزدەسەدى, – دەيدى ينسپەكتسيا مامانى ناريمان قۋانىش ۇلى.
مامانداردىڭ ايتۋىنشا, بەكىرەلەر سۇيەكتى-شەمىرشەكتى بولىپ, باسقا بالىقتاردان ىشكى-سىرتقى ءپىشىنىمەن ەرەكشەلەنەدى. حالقىمىز بۇل بالىقتىڭ قاسيەتىن باعالاپ, سۇيرىكتەي سۇلۋ دەيتىنى دە سودان. دەنەسى ۇزىنشا, بەس قاتار سۇيەكتى وسىندىلەرمەن جابىلعان. ءبىر قاتارى ارقاسىندا, ەكەۋى ەكى بۇيىرىندە جانە ەكەۋى قۇرساعىندا, وسى قاتارلاردىڭ ورتاسىندا ۇساق سۇيەكتى تۇيىرشەكتەر مەن تاقتايشالار بار. باسى كونۋس ءتارىزدى سوزىلعان جانە تۇمسىعى كۇرەك ءتارىزدى. تومەنگى جاقتا ءتىسى جوق.
وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ايتۋىنشا, وڭىردە ءۇش دەڭگەيدەگى بالىق اۋلاۋعا ارنالعان سۋ قويمالارى بار. حالىقارالىق مارتەبەسى بار ەرتىستەن باسقا 9 رەسپۋبليكالىق, جەرگىلىكتى ماڭىزعا يە 265 سۋ قويماسى تىركەلگەن.
بيىل وڭىردە زاڭسىز بالىق اۋلاۋشىلارعا 800 مىڭ تەڭگەدەن استام ايىپپۇل سالىنىپ, 65 اكىمشىلىك حاتتاما تولتىرىلىپتى. ۇستالعانداردان 19 براكونەرلىك قۇرال تاركىلەنىپ, 5 اكىمشىلىك ماتەريال وبلىستىڭ اكىمشىلىك سوتتارىنا جىبەرىلگەن.
بالىق شارۋاشىلىعى ماماندارى مەن ينسپەكتسيا جۇرگىزگەن يحتيولوگيالىق باقىلاۋلاردىڭ ناتيجەسىندە سۋ قويمالارىندا بالىقتاردىڭ ۋىلدىرىق شاشۋىنا قولايلى جاعدايلار جاسالعان.
پاۆلودار
