قازاقتا دومبىرا جاسايتىن شەبەرلەر از بولماعان, قازىر دە ارامىزدا بار. قىزىعى سول, ۇلتتىق اسپاپتى جاساۋ تەحنولوگياسى ءبىر بولعانىمەن, ءار اسپاپتىڭ ءۇنى ءار بولەك شىعادى. اتىراۋدا ءوتكەن «ۇكىلى دومبىرا» رەسپۋبليكالىق بايقاۋىنا قاتىسۋشى قولونەرشىلەردىڭ جاساعان اسپاپتارىنان دا وسىنى اڭعاردىق.
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلعان شارا ۇلتتىق دومبىرا كۇنىنە ارنالدى. ەلىمىزدىڭ تۇكپىر-تۇكپىرىنەن كەلگەن 30 ءۇمىتكەردىڭ ەڭبەكتەرىن باعالاعان قازىلار القاسىنىڭ توراعاسى, قازاقستاننىڭ ەڭبەك سىڭىرگەن قايراتكەرى, كۇيشى-كومپوزيتور ءشامىل ابىلتاەۆ: «بايقاۋعا ۇسىنىلعان دومبىرانىڭ ءۇنى تازا, قوڭىر, تەمبرى جۇمساق, قۇلاققا جاعىمدى بولۋى, سىرت ءپىشىنى ەستەتيكالىق تۇرعىدان ۇيلەسىمدى بولۋى سەكىلدى باسقا دا تالاپتار قويىلدى. باستىسى, دومبىرانىڭ قالپىن بۇزباي, قازاقى قوڭىر ءۇننىڭ ساقتالۋى شەبەرلەردىڭ قانشالىقتى دەڭگەيدە ەكەندەرىن كورسەتەدى», دەپ اتاپ ءوتتى.
– بايقاۋ بارىسىندا مۋزەيدىڭ «ەتنوگرافيا» جانە «ولكە تابيعاتى» زالدارىندا قولونەر شەبەرلەرىنىڭ دومبىرا جاساۋدان شەبەرلىك ساعاتتارى جانە تەرى, اعاش بۇيىمدارىنان كورمە ءجارمەڭكەسى ۇيىمداستىرىلدى, – دەيدى وبلىستىق تاريحي-ولكەتانۋ مۋزەيى باسشىسىنىڭ ورىنباسارى سايا عازيموۆا.
«ۇكىلى دومبىرانىڭ» باس جۇلدەسىن باتىسقازاقستاندىق ءاسيما يمانعاليەۆا جەڭىپ الدى. جۇلدەگەرلەر قاتارىندا ەسىمدەرى اتالعان ازات ۇزەنباەۆ, تالانت تەجەكەنوۆ, اسەت يسەكەەۆ, مەيىربەك ءدىلمانوۆ, عاني جۇماباەۆ, ەراسىل ءۋاليەۆتەر جاساعان اسپاپتار وبلىستىق مۋزەيدىڭ قورىنا قابىلداندى. ايتا كەتەيىك, مۋزەي قورىندا 60-تان استام دومبىرا جيناقتالعان ارنايى كوللەكتسيا بار.
اتىراۋ
