رەسەي فەدەراتسياسىنىڭ پرەزيدەنتى ۆلاديمير پۋتين نۇرسۇلتان نازارباەۆتى تۋعان كۇنىمەن قۇتتىقتادى.
«ءسىزدىڭ مول تاجىريبەڭىز, ساياسي دانالىعىڭىز جانە تەرەڭ ءبىلىمىڭىز ەۋرازيالىق كەڭىستىكتەگى ينتەگراتسيالىق ۇدەرىستەر بويىنشا ستراتەگيالىق سەرىكتەستىك پەن وداقتاستىق قارىم-قاتىناستاردى دامىتۋ ىسىندە ءاردايىم قاجەت بولاتىنىنا سەنىمدىمىن», – دەدى ۆ.پۋتين.
قىتاي حالىق رەسپۋبليكاسىنىڭ توراعاسى سي تسزينپين ءوزىنىڭ جەدەلحاتىندا قىتاي مەن قازاقستان اراسىنداعى قاتىناستاردى دامىتۋدىڭ ماڭىزدىلىعىن اتاپ ءوتتى.
«قىتاي مەن قازاقستان دوستاس كورشى جانە جان-جاقتى ستراتەگيالىق ارىپتەس بولىپ سانالادى. ەكى ەل اراسىنداعى ديپلوماتيالىق قارىم-قاتىناستار ورناعان 27 جىل ىشىندە قىتاي-قازاقستان بايلانىستارى قارقىندى دامىپ كەلەدى. مەملەكەتتەرىمىزدىڭ ساياسي ءوزارا سەنىمى ۇزدىكسىز نىعايىپ, «ءبىر بەلدەۋ, ءبىر جول» بىرلەسكەن باستاماسى دايەكتى تۇردە تەرەڭدەي تۇسۋدە, سونداي-اق حالىقارالىق ىنتىماقتاستىعىمىز اسا ءتيىمدى ءارى تىعىز ىقپالداستىقتا جۇزەگە اسىرىلۋدا. بيىلعى ساۋىردە ءسىز ساپارمەن قىتايعا كەلىپ, «ءبىر بەلدەۋ, ءبىر جول» اتتى جوعارى دەڭگەيدەگى ەكىنشى حالىقارالىق ىنتىماقتاستىق فورۋمىنا قاتىستىڭىز, ساپار قورىتىندىسىندا جەمىستى ناتيجەلەرگە قول جەتكىزىلدى.
مەن سىزبەن دوستىق كەلىسسوزدەر جۇرگىزىپ, قىتاي حالىق رەسپۋبليكاسىنىڭ «دوستىق» وردەنىمەن ماراپاتتادىم. سول ارقىلى قىتاي-قازاقستان قارىم-قاتىناستارىنىڭ جوعارى جانە ەرەكشە دەڭگەيدە ەكەنىن اتاپ ءوتتىم», دەلىنگەن جەدەلحاتتا.
وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ وزبەك حالقىنىڭ ەلباسىن ءوزىن ەلى مەن حالقىنا جان-تانىمەن قىزمەت ەتۋگە ارناعان كورنەكتى مەملەكەت قايراتكەرى جانە الەمدىك دەڭگەيدەگى پاراساتتى ساياساتكەر رەتىندە تەرەڭ قۇرمەتتەيتىنىن اتاپ ءوتتى.
«تاريحتىڭ ەڭ قيىن ءارى كۇردەلى كەزەڭىندە ءسىزدىڭ مەملەكەت كەلەشەگىنە جاۋاپكەرشىلىك العانىڭىز قازاقستان ءۇشىن تاعدىرشەشتى وقيعا بولدى. ءسىز – بىرەگەي ادامي قاسيەتكە يە, تەرەڭ ءبىلىمدى, باعا جەتپەس كاسىبي جانە ومىرلىك تاجىريبەسى بار تۋا بىتكەن كوشباسشىسىز.
ءسىزدىڭ قازاقستان رەسپۋبليكاسىنىڭ تۇڭعىش پرەزيدەنتى – ەلباسى رەتىندە قازاقستان مەملەكەتىن, ەلىڭىزدىڭ ەگەمەندىگى مەن تاۋەلسىزدىگىن قالىپتاستىرۋ جانە نىعايتۋداعى تاريحي ميسسياڭىزعا بەرىلگەن شىنايى جوعارى باعانى تولىق قولدايمىن», – دەلىنگەن جەدەلحاتتا.
قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ ءوزىنىڭ حاتىندا ەلباسىنىڭ ارقاسىندا قازاقستاننىڭ استاناسى ورتالىق ازياداعى ەڭ اسەم قالا اتانىپ, حالىقارالىق قارجى الاڭى مەن بەيبىتشىلىك قالاسىنا اينالعانىن اتاپ وتكەن.
«ءسىزدىڭ تۋعان كۇنىڭىزگە جانە قازاقستان رەسپۋبليكاسىنىڭ استاناسى كۇنىن مەرەكەلەۋگە وراي مەنىڭ شىنايى قۇتتىقتاۋىمدى قابىل الىڭىز.
ءسىز – ءوزىڭىزدىڭ زور كۇش-جىگەرىڭىزبەن جانە يگى ىستەرىڭىزدى قازاقستان حالقىنىڭ عانا ەمەس, سونداي-اق بۇكىل ورتالىق ازيا حالىقتارىنىڭ ءال-اۋقاتىن ارتتىرۋعا باعىتتاعان دانا ءارى پاراساتتى تۇلعاسىز.
قازاقستان حالقى تاۋەلسىزدىك العاننان بەرى ەلىڭىزدە بولىپ جاتقان بارلىق ەلەۋلى الەۋمەتتىك-ەكونوميكالىق رەفورمالاردى ءسىزدىڭ ەسىمىڭىزبەن بايلانىستىرادى جانە حالىقتىڭ ءوسىپ-وركەندەۋىنە قوسقان زور ۇلەسىڭىزدى جوعارى باعالايدى», – دەلىنگەن حاتتا.
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ جەدەلحاتىندا تۇڭعىش پرەزيدەنتتىڭ ساياسي باعدارىنىڭ ارقاسىندا قازاقستان رەسپۋبليكاسى تابىستى, قۋاتتى جانە تاۋەلسىز مەملەكەتكە اينالعانى ايتىلعان.
«ءسىزدىڭ بەلارۋس-قازاقستان ىنتىماقتاستىعىن دامىتۋ ماسەلەلەرىنە كوڭىل ءبولىپ, حالىقتارىمىزدىڭ اراسىنداعى كوپجىلدىق دوستىق ءداستۇردى, ءوزارا قۇرمەت پەن باۋىرلاستىق قارىم-قاتىناستاردى نىعايتۋعا قوسقان جەكە ۇلەسىڭىز ءۇشىن شىنايى ريزاشىلىقتامىن. ۇلتتىڭ شىن مانىندەگى كوشباسشىسى, ءوز حالقىنا ادالدىقتىڭ ۇلگىسى بولا وتىرىپ, ءسىز مەملەكەتتىڭ دامۋى مەن وركەندەۋى ءۇشىن تالماي ەڭبەكتەنىپ كەلەسىز», – دەلىنگەن جەدەلحاتتا.
تۇرىكمەنستان پرەزيدەنتى گۋربانگۋلى بەردىمۇحامەدوۆ ءوزىنىڭ قۇتتىقتاۋىندا قازاقستان ءومىرىنىڭ بارلىق سالاسىندا اۋقىمدى وزگەرىستەر مەن ەلدىڭ ايتارلىقتاي جەتىستىكتەرى تۇڭعىش پرەزيدەنت – ەلباسى اتىمەن تىعىز بايلانىستى ەكەنىن اتاپ ءوتتى.
«ءبىز تۇرىكمەنستاندا ءسىزدىڭ ەلدەرىمىزدىڭ اراسىنداعى قارىم-قاتىناستاردى دامىتۋعا قوسقان جەكە ۇلەسىڭىزدى جوعارى باعالايمىز جانە كوپ جىلعى تاتۋ كورشىلىك, سەنىم مەن قۇرمەتكە نەگىزدەلگەن ەكىجاقتى ستراتەگيالىق ىنتىماقتاستىقتى ودان ءارى نىعايتۋعا نيەتتىمىز.
وسى اتاۋلى كۇنى شىن جۇرەكتەن سىزگە زور دەنساۋلىق, ۇزاق ءومىر, سارقىلماس كۇش-قۋات, مول باقىت, ال باۋىرلاس قازاقستان حالقىنا بەيبىت ءومىر تىلەپ, ودان ءارى ءوسىپ-وركەندەي بەرۋىنە تىلەكتەستىك بىلدىرەمىن», – دەلىنگەن جەدەلحاتتا.
سەربيا پرەزيدەنتى الەكساندر ۆۋچيچ قازاقستاننىڭ تۇڭعىش پرەزيدەنتىنىڭ كورەگەن ساياساتىنىڭ ارقاسىندا قازاقستاننىڭ قول جەتكىزگەن جەتىستىكتەرىنە توقتالدى.
«وسى مۇمكىندىكتى پايدالانىپ, سەربيا مەن قازاقستاننىڭ تىعىز ىنتىماقتاستىققا قول جەتكىزۋى جولىنداعى جان-جاقتى نيەتتەستىك ءۇشىن تاعى دا العىس بىلدىرگىم كەلەدى. ەلدەرىمىزدىڭ قارىم-قاتىناستارىن ودان ءارى نىعايتۋعا كوپ مۇمكىندىكتىڭ بار ەكەنىنە سەنىمىم مول», – دەلىنگەن حاتتا.
قازاقستاننىڭ تۇڭعىش پرەزيدەنتىن تاجىكستان رەسپۋبليكاسىنىڭ پرەزيدەنتى ەمومالي راحمون دا قۇتتىقتادى.
«تۋعان-تۋىسقاندارىڭىز, جاقىندارىڭىز بەن دوستارىڭىز ءۇشىن وسى ايتۋلى كۇندە سىزگە شىن جۇرەكتەن زور دەنساۋلىق, باق-بەرەكە, اماندىق, وزىڭىزگە زور قۇرمەتپەن قارايتىن قازاقستان حالقىنىڭ يگىلىگى جولىندا تاۋسىلماس قۇش-قايرات پەن جاڭا جەتىستىكتەر تىلەيمىن.
وسى مۇمكىندىكتى پايدالانىپ, تاجىكستان مەن قازاقستان اراسىنداعى ءوزارا قارىم-قاتىناستاردى ستراتەگيالىق ءارىپتەس رەتىندە تابىستى دامىپ كەلە جاتقانىن اتاپ وتكىم كەلەدى», – دەلىنگەن جەدەلحاتتا.
