كەزدەسۋ بارىسىندا قاسىم-جومارت توقاەۆقا ەكونوميكانىڭ ءتۇرلى سالاسىنداعى, سونىڭ ىشىندە ماشينا جاساۋ جانە ەنەرگەتيكا سەكتورلارىنداعى بىرلەسكەن ينۆەستيتسيالىق جوبالاردىڭ جۇزەگە اسىرىلۋى جونىندە مالىمەت بەرىلدى.
قازاقستان پرەزيدەنتى شەتەلدىك ينۆەستورلار كەڭەسىنە قاتىسقانى ءۇشىن لورەنتسو سيمونەلليگە ريزاشىلىق ءبىلدىرىپ, ونىڭ كومپانياسىنىڭ قازاقستاندا جاقسى جۇمىس ىستەپ جاتقانىن اتاپ ءوتتى.
– ءتۇرلى سالاداعى تابىستى ءىس-قيمىلدار بويىنشا مول تاجىريبەمىز بار. ءبىزدىڭ جەمىستى ىنتىماقتاستىعىمىز جالعاسا بەرەدى دەپ ويلايمىن, – دەدى مەملەكەت باسشىسى.
لورەنتسو سيمونەللي كومپانيانىڭ قازاقستاندا جاڭا جوبالاردى بەلسەندى جۇزەگە اسىرىپ جاتقانىن ايتتى.
– ەكىنشى ۇيىمدەي بولىپ كەتكەن قازاقستانعا قايتا ورالۋ مەن ءۇشىن زور قۋانىش. ءبىز ءوز جۇمىسىمىزدا جاڭا سالالاردى اشىپ جاتىرمىز. قازاقستان ءبىزدىڭ كومپانيانىڭ الەۋەتىن تۇتاس ەل اۋماعىنداعى ينفراقۇرىلىمدى دامىتۋ ءۇشىن ءساتتى پايدالانۋدىڭ جارقىن ۇلگىسىن كورسەتەدى دەپ ويلايمىن, – دەدى بيزنەسمەن.
قازاقستان پرەزيدەنتى مەن كومپانيا باسشىسى كەلەشەك ىنتىماقتاستىقتىڭ پەرسپەكتيۆالارىن تالقىلادى.
