قالاداعى ۇيلەردىڭ 85%-ى ءجوندەۋدى قاجەت ەتەدى. قازىر وندا جۇمىس ىستەپ جاتقان قۇرىلىس كومپانيالارىنىڭ سانى 118-گە جەتتى. اۋقىمدى ىسكە 1546 قۇرىلىسشى مەن 86 ارنايى تەحنيكا تارتىلدى.
ۆيتسە-مينيستر قايىربەك وسكەنباەۆ باستاعان جۇمىس توبى قازىر ارىس قالاسىندا. اپات ايماعىنداعى بارلىق ۇيلەر باقىلاۋعا الىنىپ, جۇمىسقا كۇندەلىكتى مونيتورينگ جاسالىپ وتىرادى.
– ءبىز ءاربىر تۇرعىن ءۇيدى تۇراقتى باقىلاۋعا الدىق. ەگەر ءتىپتى جەلدەتكىش نەمەسە تەرەزەنىڭ اينەگى سىنعان بولسا دا بارلىعىن ەسكەردىك, ءجوندەلۋگە ءتيىس نىسان رەتىندە تىركەۋگە الدىق. كەيبىر ۇيلەردى بۇزىپ, قايتا سالۋ كەرەك. قازىر شىعىن سوماسىن جانە قالپىنا كەلتىرۋ ءۇشىن قاجەتتى قاراجاتتى انىقتاۋ ماقساتىندا باعالاۋ جۇرگىزەمىز, – دەدى قايىربەك وسكەنباەۆ.
ارىس 17 سەكتورعا ءبولىنىپ, ولار ەلىمىزدىڭ بارلىق وڭىرلەرى مەن رەسپۋبليكالىق ماڭىزى بار قالالارعا بەكىتىپ بەرىلگەن. تۇرعىن ۇيلەردى قالپىنا كەلتىرۋ بويىنشا شىعىنداردىڭ ءبىر بولىگىن بەكىتىلگەن جەرگىلىكتى اتقارۋشى ورگان وزىنە الادى, قالعان بولىگى رەسپۋبليكالىق بيۋدجەت قاراجاتى ەسەبىنەن جابىلادى. كۇن سايىن ساعات 19.00-دە بارلىق اكىمدىكتەر تۇرعىن ءۇي قورىن جوندەۋ بويىنشا اتقارىلعان جۇمىستار تۋرالى باياندايدى.
سونداي-اق قالادا بارلىق بۇزىلعان ينفراقۇرىلىمدى: ينجەنەرلىك كوممۋنيكاتسيالار مەن جولداردى قايتا قۇرۋ جۇمىستارىنا ۇكىمەت رەزەرۆىنەن قاراجات ءبولىندى.
