شاراعا ەلىمىزدىڭ ۇلتتىق ەكونوميكا ۆيتسە-ءمينيسترى جاسلان ءماديەۆ, ازەربايجان ەكونوميكا ۆيتسە-ءمينيسترى ساحيب مامەدوۆ, قىرعىز رەسپۋبليكاسى ەكونوميكا ۆيتسە-ءمينيسترى ەلدار اباكيروۆ, تۇركيا ساۋدا ۆيتسە-ءمينيسترى ريزا تۋنا تۋراگاي, تۇركى كەڭەسىنىڭ باس حاتشىسى باعدات امىرەەۆ جانە «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ قاتىستى.
– تۇركى كەڭەسىنە مۇشە ەلدەردىڭ مەملەكەت باسشىلارىنىڭ جوعارى دەڭگەيدەگى قاتىناستارى مەملەكەتتەر اراسىنداعى بايلانىستى نىعايتىپ, قازىر ەكونوميكالىق ۆەدومستۆولارى دەڭگەيىندە وربىگەنى ءبىز ءۇشىن ءۇلكەن جەتىستىك. ەلباسى نۇرسۇلتان نازارباەۆتىڭ باستاماسىمەن قۇرىلعان «استانا» حالىقارالىق قارجى ورتالىعى ەكونوميكاعا مەملەكەتتىڭ قاتىسۋىن ازايتۋعا جانە جەكەشەلەندىرۋگە مۇمكىندىك بەرەدى. قارجى ورتالىعى – پوستكەڭەستىك ەلدەردە اعىلشىن زاڭىمەن جۇمىس ىستەيتىن جالعىز الاڭ. وسى ورايدا تۋىسقان تۇركى ەلدەرىنىڭ ەكونوميكا ىستەرى جونىندەگى مينيسترلەرىنىڭ 9-شى وتىرىسىن وتكىزۋ ءبىزدىڭ قارجى ورتالىعىمىز ءۇشىن دە ۇلكەن ابىروي. تۇركى كەڭەسىنىڭ جۇمىسىنا ءوزىمىزدىڭ تاراپىمىزدان ۇلەسىمىزدى قوسۋعا دايىنبىز, – دەگەن «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ تۇركى ەلدەرىنىڭ ەكونوميكاسى ءۇشىن قازاقستان الەمدىك جانە وڭىرلىك نارىققا اشىلعان ەسىك ەكەنىن ايتتى.
– ون جىل ىشىندە تۇركى كەڭەسى تۇركى تىلدەس ەلدەر اراسىندا ينۆەستيتسيا, ساۋدا, تاسىمال, كاسىپكەرلىك, تۋريزم جانە باسقا دا سالالار بويىنشا ايتۋلى ەكونوميكالىق باستامالاردى كوتەرىپ كەلەدى. كەڭەس قۇرىلعالى بەرى مۇشە مەملەكەتتەر اراسىنداعى ساۋدا 3 ملرد اقش دوللارىنان 5,5 ملرد اقش دوللارىنا جەتتى. 2018 جىلى تۇركى كەڭەسىنە مۇشە مەملەكەتتەردەن قازاقستان ەكونوميكاسىنا 300 ملن اقش دوللارىنا جۋىق ينۆەستيتسيا تارتىلسا, قازاقستان ءوز كەزەگىندە مۇشە مەملەكەتتەرگە شامامەن 100 ملن اقش دوللارىن ينۆەستيتسيالادى. 2019 جىلدىڭ 1 ماۋسىمىنداعى مالىمەت بويىنشا قازاقستاندا تۇركى كەڭەسىنە مۇشە مەملەكەتتەردىڭ 3 مىڭنان استام كومپانياسى جۇمىس ىستەپ جاتىر. ونىڭ 730-ى بىرلەسكەن كاسىپورىندار. ءوزارا ينۆەستيتسيا مەن ساۋدانىڭ ۇلعايۋى تۇركى كەڭەسى ەلدەرى اراسىنداعى ينتەگراتسيانىڭ ارتىپ كەلە جاتقانىنا دالەل. كەڭەسكە مۇشە مەملەكەتتەردىڭ ەكونوميكالىق ءوسىمى جاھاندىق ەكونوميكالىق ءوسىم قارقىنىنان كەم ەمەس. ءبىزدىڭ ءوڭىردىڭ ەڭبەك رەسۋرسى دا باي. 3,7 ملن شارشى شاقىرىم ايماقتى الىپ جاتقان وڭىرىمىزدە 17 ملن ازامات ءومىر سۇرەدى, – دەدى ۇلتتىق ەكونوميكا ۆيتسە-ءمينيسترى جاسلان ماديەۆ.
ونىڭ ايتۋىنشا, قازاقستان كولىك ينفراقۇرىلىمى جوبالارىن قارقىندى قولعا الىپ جاتىر. ماسەلەن, 400 مىڭنان استام اۆتوكولىك جولى, 30 مىڭنان استام تەمىر جول سالىندى. – جالپى, ءبىزدىڭ ءوڭىر ەۋروپا مەن ازيانى بايلانىستىراتىن دالىزگە اينالدى. سول سەبەپتى كولىك الەۋەتىن دامىتۋداعى جۇمىسىمىزدى ودان ءارى جانداندىرا ءتۇسۋ كەرەك. قازاقستان مەن ازەربايجان اراسىنداعى مەملەكەت باسشىلارى دەڭگەيىندە باستاما رەتىندە كوتەرىلگەن تۇركى كەڭەسىنىڭ ينۆەستيتسيالىق قورىن قۇرۋ تۋرالى يدەيا قازىر كۇن تارتىبىندە. ءوزارا ينۆەستيتسيالىق قور قۇرۋ قارجىلىق جانە ينستيتۋتسيونالدىق رەسۋرستاردى جۇمىلدىرىپ, بىرلەسكەن ناقتى جوبالاردى قارجىلاندىرۋعا جول اشپاق, دەدى ۆيتسە-مينيستر.
قازىرگى تاڭدا اتالعان قوردى قۇرۋ تۋرالى كەلىسسوزدەردىڭ ەكى راۋندى وتكەن. ەندى قوردى تىكەلەي ينۆەستيتسيالىق قور رەتىندە نەمەسە دامۋ ينستيتۋتى رەتىندە قۇرۋ تۋرالى ماسەلەلەر پىسىقتالىپ جاتىر. قوردىڭ ۆاليۋتاسى, كولەمى, قۇقىقتىق مارتەبەسى مەن ونى باسقارۋ جاعى دا الداعى ۋاقىتتا تالقىعا سالىنباق. جالپى, قور قۇرىلعاننان كەيىن قازاقستان تاراپى ونى «استانا» حالىقارالىق قارجى ورتالىعىنا ورنالاستىرۋ تۋرالى ۇسىنىس تاستاپ وتىر.
