ادام ساۋداسىنا قارسى كۇرەس قارقىن الدى
سارسەنبى, 1 مامىر 2013 1:23
باس پروكۋراتۋرادا زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ كەزەكتى وتىرىسى ءوتىپ, وندا ادام ساۋداسىمەن بايلانىستى قىلمىستاردى انىقتاۋ ماسەلەلەرى قارالدى. ونىڭ جۇمىسىنا ۇيلەستىرۋ كەڭەسىنىڭ مۇشەلەرى, ىشكى ىستەر جانە ادىلەت مينيسترلىگى, كوشى-قون پوليتسياسى كوميتەتى, حالىقارالىق جانە ۇكىمەتتىك ەمەس ۇيىمداردىڭ جەتەكشىلەرى قاتىستى.
سارسەنبى, 1 مامىر 2013 1:23
باس پروكۋراتۋرادا زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ كەزەكتى وتىرىسى ءوتىپ, وندا ادام ساۋداسىمەن بايلانىستى قىلمىستاردى انىقتاۋ ماسەلەلەرى قارالدى. ونىڭ جۇمىسىنا ۇيلەستىرۋ كەڭەسىنىڭ مۇشەلەرى, ىشكى ىستەر جانە ادىلەت مينيسترلىگى, كوشى-قون پوليتسياسى كوميتەتى, حالىقارالىق جانە ۇكىمەتتىك ەمەس ۇيىمداردىڭ جەتەكشىلەرى قاتىستى.
مەملەكەت وسى ادام ساۋداسى قىلمىسىنا توسقاۋىل قويۋ بويىنشا ناقتى شارالاردى جۇزەگە اسىرۋدا: ءوزارا قۇقىقتىق كومەك جانە قۇقىقتىق قاتىناستار تۋرالى بىرقاتار حالىقارالىق كەلىسىم-شارتتار جاسالدى, ادام ساۋداسىنا توسقاۋىل قويۋدى رەگلامەنتتەيتىن نەگىزگى حالىقارالىق اكتىلەر راتيفيكاتسيالاندى. ال ۇلتتىق زاڭناما وسى قىلمىسپەن كۇرەستىڭ ءتيىمدى شارالارىن قولدانۋعا, كىنالىلەردى جاۋاپكەرشىلىككە تارتۋعا مۇمكىندىك بەرەدى.
باس پروكۋرور اتاپ وتكەندەي, ادام ساۋداسى قوعامنىڭ وتكىر ماسەلەلەرىنىڭ ءبىرى بولىپ وتىر. ستاتيستيكالىق مالىمەتتەر كورسەتكەندەي, سوڭعى بەس جىل ىشىندە قازاقستاندا ادام ساۋداسىنىڭ 600-گە جۋىق قۇربانى انىقتالعان. قۇقىق قورعاۋ ورگاندارى ادام ساۋداسىمەن بايلانىستى 1,5 مىڭعا جۋىق قىلمىستى انىقتادى, 800-دەن استام ادام سوتتالدى. جىل سايىن وسى ساناتتاعى 300-گە جۋىق قىلمىس ءتىركەلەدى. سوندىقتان اتقارىلىپ وتىرعان جۇمىستىڭ تيىمدىلىگى جەتكىلىكسىز, ادام ساۋداسى فاكتىلەرىن انىقتاۋ, ەسكەرتۋ جانە جولىن كەسۋ, قىلمىس قۇرباندارىمەن جۇمىس تاسىلدەرىن وزگەرتۋ قاجەت.
ۇيلەستىرۋ كەڭەسىنىڭ مۇشەلەرى وسى سالاداعى قالىپتاسقان جاعدايدى تالدادى, مۇددەلى مەملەكەتتىك ورگانداردىڭ ۆەدومستۆوارالىق ءوزارا ءىس-قيمىلىن ارتتىرۋ, ادام ساۋداسىمەن بايلانىستى قىلمىستاردى انىقتاۋ, قىلمىس قۇرباندارىنا كومەك كورسەتۋدىڭ ءتيىمدى تەتىكتەرىن جاساۋ, تۇتاستاي العاندا ازاماتتاردىڭ قۇقىقتارى مەن بوستاندىقتارىنىڭ كەپىلدىگىن كۇشەيتۋ بويىنشا ناقتى ۇسىنىستار ايتتى.
ا.داۋىلباەۆ ادام ساۋداسىمەن بايلانىستى قىلمىستاردىڭ پروفيلاكتيكاسىن كۇشەيتۋ اياسىندا ەڭبەك جانە وزگە سالالاردا قاناۋعا ءتۇسۋ قاۋىپتىلىگى تۋرالى اقپاراتتىق-ناسيحاتتىق جۇمىستىڭ بەلسەندىلىگىن ارتتىرۋدى تاپسىردى. سونداي-اق, ول بارلىق ۇيالى بايلانىس وپەراتورلارى ءۇشىن كۇنى-ءتۇنى تەگىن جۇمىس ىستەيتىن «11616» سەنىم تەلەفونىنىڭ جۇمىسىن جولعا قويۋدى تاپسىردى.
كەڭەسكە قاتىسۋشىلار قۇقىق قورعاۋ ورگاندارىنىڭ ادام ساۋداسىنا توسقاۋىل قويۋ سالاسىندا جۇمىس ىستەيتىن ۇكىمەتتىك ەمەس جانە قوعامدىق ۇيىمدارمەن ءوزارا ءىس-قيمىلدىڭ بەلسەندىلىگىن ارتتىرۋ ماڭىزدىلىعىن اتاپ كورسەتتى.
الەكساندر تاسبولاتوۆ,
«ەگەمەن قازاقستان».
