ورەندەر ونەگەسى
سارسەنبى, 24 ءساۋىر 2013 1:40
ەكى دوس اقان ديدانوۆ پەن اندرەي پەركوۆ قىلمىسكەردى ۇستاۋعا كومەكتەستى
وسى كۇندە قاراعاندىلىق بۇل جەتكىنشەكتەردىڭ ەسىمدەرى ەل اۋزىندا. جاس شامالارىنا قاراماي قورىقپاي-ۇرىكپەي, ءتىپتى ەرەسەك ازاماتتاردىڭ دا ءبارىنىڭ بىردەي باتىلى بارا بەرمەس جاعدايدا ەرلىك ۇلگىسىن تانىتۋلارى جۇرتتى ءسۇيسىنتىپ جاتىر. ولار بۇلايشا بولارىن وزدەرىنەن كۇتپەگەن دە ەدى. ادەتتەگىدەي ءبىر توپ جولداستارىمەن مەكتەپتەگى ساباقتان قايتىپ كەلە جاتقاندارىندا اۋىزبەن ايتقىسىز وقيعا ۇستىنەن شىعامىز دەپ ويلاماعان شىعار.
سارسەنبى, 24 ءساۋىر 2013 1:40
ەكى دوس اقان ديدانوۆ پەن اندرەي پەركوۆ قىلمىسكەردى ۇستاۋعا كومەكتەستى
وسى كۇندە قاراعاندىلىق بۇل جەتكىنشەكتەردىڭ ەسىمدەرى ەل اۋزىندا. جاس شامالارىنا قاراماي قورىقپاي-ۇرىكپەي, ءتىپتى ەرەسەك ازاماتتاردىڭ دا ءبارىنىڭ بىردەي باتىلى بارا بەرمەس جاعدايدا ەرلىك ۇلگىسىن تانىتۋلارى جۇرتتى ءسۇيسىنتىپ جاتىر. ولار بۇلايشا بولارىن وزدەرىنەن كۇتپەگەن دە ەدى. ادەتتەگىدەي ءبىر توپ جولداستارىمەن مەكتەپتەگى ساباقتان قايتىپ كەلە جاتقاندارىندا اۋىزبەن ايتقىسىز وقيعا ۇستىنەن شىعامىز دەپ ويلاماعان شىعار. تاسالاۋ تۇستا 11 جاسار ءبۇلدىرشىن قىزعا جانتۇرشىگەرلىك ارەكەت جاساۋشىنى جان-جاقتان كومەك شاقىرعان جانايقايلارىمەن سەسكەندىرىپ, قىلمىسىن جاسىرۋ ءۇشىن جابىرلەنۋشىنىڭ ءومىرىن قيۋدان دا تايىنباس جاۋىزدىقتان اراشالاپ, دەرەۋ پوليتسياعا حابار بەرىپ, سوڭىنان قالماي تىعىلعان جەرىنە دەيىن نۇسقاۋلارى ەكى اياقتى ايۋاندى تەز قۇرىقتاتۋعا سەپتىگىن تيگىزەدى.
قالانىڭ مايقۇدىق ايماعىنىڭ شەتكەرگى 13 شاعىن اۋدانىنداعى بىرەۋى №54 قازاق, ەكىنشىسى №65 ورىس مەكتەبىندە وقيتىن, 14-15-تەگى تەتەلەس بۇلار وسى ماڭداعى كوپ قاباتتى ءۇي تۇرعىندارىنا ۇدايى بىرگە جۇرەتىن كورگەندى جاسوسپىرىمدەر رەتىندە تانىس. قالالىق قۇربى-زامانداستارى قاتارىنا قارقارالىدان كەلىپ قوسىلعان اقان اندرەيدەن ورىسشا سويلەسۋدى ۇيرەنسە, ال اندرەي اقاننان كاراتە كۇرەسىنىڭ ايلا-تاسىلدەرىن ۇيرەنۋگە قۇشتار.
– اقان مەكتەبىمىزدەگى وزات وقۋشىلاردىڭ ءبىرى. جايشىلىقتا ۇياڭ شاكىرتىمىزدىڭ قاجەت بولعان جاعدايدا باتىلدىق تا قاسيەتى بار ەكەن. جارىنان ەرتە ايىرىلعان اناسىنا, وقۋشى اپالارىنا ەر بالا تۇرعىسىندا سۇيەۋ بولۋعا ۇمتىلىسىنان قايراتتىلىق مىنەزدىلىكتى سەزۋشى ەدىك. ونىڭ وسى قىلىعى ۇستازدارىنا ماقتانىش. ەرتەڭ كاراتە بويىنشا ورالداعى رەسپۋبليكالىق جارىستان ورالاتىن اقان ەرلىگىن مەكتەبىمىز بويىنشا ونەگە ەتىپ, اتاپ وتپەكپىز, – دەيدى ديرەكتوردىڭ تاربيە ءىسى جونىندەگى ورىنباسارى رىمكۇل جۇماعۇلوۆا.
ەكى دوستىڭ وسىناۋ ەرلىكتەرىنە, اسىرەسە ءتارتىپ ساقشىلارىنىڭ ريزالىعى دا بولەك بولىپ وتىر. وبلىستىق ىشكى ىستەر دەپارتامەنتىنىڭ باستىعى مەرگەنباي جاپپاروۆ ارىپتەستەرى اتىنان اقان ديدانوۆ پەن اندرەي پەركوۆقا العىسىن جەتكىزىپ, قۇرمەت گراموتاسىن تاپسىردى, قولدارىنا ساعات تاعىلدى. بولاشاقتا قاتارلارىنا قوسىلۋعا شاقىردى.
ايقىن نەسىپباي,
«ەگەمەن قازاقستان».
قاراعاندى.
