ءۇمىت اقتالا ما؟
سەنبى, 20 ءساۋىر 2013 0:57
كۇمان كوپ نەمەسە كاسىبي مەدياتورلاردى دايارلاۋ نەگە جولعا قويىلماعان؟
2011 جىلدىڭ تامىز ايىنان باستاپ «مەدياتسيا تۋرالى» قر زاڭى قولدانىسقا ەندى. وسى زاڭناما نەگىزىندە ەلىمىزدە داۋ-دامايلاردى شەشۋدىڭ بالاما جاڭا فورمالارى ەنگىزىلىپ, بىتىمگەرشىلىك ارقىلى ەكى جاقتى دا ريزا ەتەتىندەي ءتيىمدى شەشىم قابىلداۋعا مۇمكىندىك تۋعىزىلىپ وتىر. ارينە, مەدياتورعا سۋديانىڭ وكىلەتتىگى بەرىلمەگەن. ول ناقتى شەشىم قابىلداي المايدى جانە تاراپتاردى ءوز شەشىمىن ورىنداتۋعا مىندەتتەي المايدى. بىراق ول كەلىسسوزدەردىڭ ءتيىمدى جۇرگىزىلۋىنە بارىنشا كومەكتەسەدى جانە ولاردى قاجەتتى ارناعا بۇرا الادى.
سەنبى, 20 ءساۋىر 2013 0:57
كۇمان كوپ نەمەسە كاسىبي مەدياتورلاردى دايارلاۋ نەگە جولعا قويىلماعان؟
2011 جىلدىڭ تامىز ايىنان باستاپ «مەدياتسيا تۋرالى» قر زاڭى قولدانىسقا ەندى. وسى زاڭناما نەگىزىندە ەلىمىزدە داۋ-دامايلاردى شەشۋدىڭ بالاما جاڭا فورمالارى ەنگىزىلىپ, بىتىمگەرشىلىك ارقىلى ەكى جاقتى دا ريزا ەتەتىندەي ءتيىمدى شەشىم قابىلداۋعا مۇمكىندىك تۋعىزىلىپ وتىر. ارينە, مەدياتورعا سۋديانىڭ وكىلەتتىگى بەرىلمەگەن. ول ناقتى شەشىم قابىلداي المايدى جانە تاراپتاردى ءوز شەشىمىن ورىنداتۋعا مىندەتتەي المايدى. بىراق ول كەلىسسوزدەردىڭ ءتيىمدى جۇرگىزىلۋىنە بارىنشا كومەكتەسەدى جانە ولاردى قاجەتتى ارناعا بۇرا الادى.
ءسويتىپ, ول ءوزىنىڭ بەيتاراپتىعى ارقاسىندا داۋ-دامايدىڭ ءمان-جايىن ءادىل باعالاپ, پروبلەمانىڭ وڭتايلى شەشىلۋىنە ناقتى ىقپال ەتە الادى. بۇل ءبىر جاعىنان سوتتاردىڭ جۇمىسىن جەڭىلدەتسە, ەكىنشىدەن, داۋلاسۋشى جاقتاردىڭ ءوزارا كەلىسىمگە كەلۋلەرىنە كومەكتەسىپ, ولاردىڭ قىرعي-قاباق بولماي, تاتۋلاسا وتىرىپ تاراۋلارىنا جول اشادى.
وكىنىشكە قاراي, بۇگىنگى تاڭدا بۇل زاڭ ءىس جۇزىندە ورىندالماي, ودان كۇتكەن ءۇمىتتىڭ اقتالماي وتىرعاندىعى كوڭىلدى الاڭداتادى. نەگە؟ ءبىزدىڭ ويىمىزشا ونىڭ باستى سەبەبىنىڭ ءبىرى – ول جوعارىدا اتالعان زاڭنىڭ 1-بابىنىڭ 1-تارماعىندا كورسەتىلگەن ساناتتاعى ىستەر بويىنشا سوت ءىسىن جۇرگىزۋ بارىسىندا جەرگىلىكتى جەرلەردەگى سوتتاردا قارالاتىن داۋلاردى رەتتەۋگە قاتىساتىن كاسىبي مەدياتورلاردىڭ جوقتىعى. اۋداندىق نەمەسە قالالىق سوتتار مۇنداي ىستەرگە قاتىساتىن مەدياتورلارمەن قامتاماسىز ەتىلمەگەن. ال ولاردى دايىنداۋ ماسەلەسىن العا تارتىپ, ءوز وڭىرلەرىندە باستاپقى مەدياتورلار ۇيىمىن قۇرۋ ماقساتىندا باستاما كوتەرىپ وتىرعان قانداي دا ءبىر مۇددەلى ورگاندار جوق سەكىلدى.
ەندەشە, مەدياتورلاردى دايىنداۋدىڭ بالاما جولدارى بار ما, بار بولسا ول قانداي دەگەن سۇراققا كوڭىلدە جۇرگەن وسى ءبىر تۇيتكىلدى ماسەلەنى ورتاعا سالىپ, وي بولىسسەك دەيمىز. اتاپ ايتقاندا, كاسىبي مەدياتور بولامىن دەسەڭىز ءسىزدىڭ مىندەتتى تۇردە ارنايى دايارلىقتان وتكەنىڭىز تۋرالى سەرتيفيكاتىڭىز كەرەك. ونداي قۇجاتتى سىزگە تەك قانا قۇقىقتىق نەگىزدە قۇرىلعان مەدياتورلار ۇيىمى عانا بەرە الاتىنى زاڭمەن بەلگىلەنگەن. ال مۇنداي ۇيىم, ءوز كەزەگىندە, تەك ارنايى وقۋ دايارلىعىنان وتكەن جانە سەرتيفيكاتى بار كاسىبي مەدياتورلاردىڭ باستاماسىمەن عانا قۇرىلا الاتىنىن («مەدياتسيا تۋرالى زاڭىنان» 13-باپتىڭ 1-تارماعى) نازارعا الساق, بۇل ماسەلەنىڭ ءتۇيىنىن شەشۋدە «سيقىرلانعان شەڭبەر» پروبلەماسىنىڭ تۋىندالىپ تۇرعاندىعى انىق. سايىپ كەلگەندە, كاسىبي مەدياتورلارسىز زاڭدى ۇيىم قۇرا المايسىز, ال قۇرىلماعان ۇيىمعا, ارينە, كاسىبي مەدياتور رەتىندە تىركەلىپ كىرە المايسىز. مۇمكىن رەسپۋبليكانىڭ كەيبىر وڭىرلەرىندە باسقاداي تاسىلمەن اشىلىپ, جۇمىس ىستەپ جاتقان مەدياتورلار ۇيىمدارى بار دا شىعار. مۇنىڭ سىرتىندا, باسقا قالالارعا بارىپ, ءوز ەسەبىنەن قوماقتى شىعىن شىعارا وتىرىپ وقۋعا نيەت بىلدىرەتىندەر تابىلا قويار ما ەكەن؟ ەستۋىمىزشە, ءىرى قالالارداعى باسەكەلەستىك ورتالىقتاردا اشىلعان وقۋ نۇكتەلەرىنىڭ باعدارلامالارى بويىنشا ءدارىس الۋ ءۇشىن ءىرى مولشەردە قارجى تولەۋ قاجەت ەكەن. وعان قوسا بارىپ-قايتۋعا قاجەتتى جولاقىسى, تاماعىڭىز, جاتىن ورىنعا تولەيتىن شىعىندارىڭىز بار دەگەندەي…
بۇل پروبلەمانى قالاي ەڭسەرۋگە بولادى؟ ءبىزدىڭ ويىمىزشا, بۇل ماسەلەنى, ارينە, زاڭعا ءتيىستى وزگەرىس ەنگىزە وتىرىپ, تومەندەگىدەي جولمەن شەشىپ كورۋگە بولاتىن سياقتى. اتاپ ايتقاندا, ءاربىر وبلىستىق سوتتىڭ جانىنان ەرەكشە جاعداي رەتىندە قاراستىرا وتىرىپ ۇكىمەتتىڭ 2011 جىلعى 3 شىلدە كۇنگى «مەدياتورلاردى دايارلاۋ باعدارلاماسى بويىنشا وقىتۋدان وتكىزۋ قاعيداسىن بەكىتۋ تۋرالى» قاۋلىسىن نەگىزگە الىپ, «جالپى مەدياتسيا كۋرسى» باعدارلاماسى بويىنشا كاسىبي مەدياتورلاردى دايارلايتىن العاشقى كۋرس ۇيىمداستىرىلۋ قاجەت. ال ونىڭ وقۋ باعدارلاماسى بويىنشا تىڭداۋشىلار كونتينگەنتى قاجەتتى مولشەردە ءاربىر اۋداندىق نەمەسە قالالىق سوتتاردىڭ ۇسىنىسى بويىنشا جەرگىلىكتى جەرلەردەگى بەدەلدى, ابىرويلى جانە ومىرلىك تاجىريبەسى مول, مۇمكىندىگىنشە بۇرىن قۇقىق قورعاۋ سالاسىندا ءمىنسىز قىزمەت اتقارعان ءارى كاسىبي مەدياتور بولۋعا نيەت بىلدىرگەن جوعارى ءبىلىمدى مامانداردان ىرىكتەلىپ الىنۋى ءتيىس. ولارعا ءدارىس بەرۋ, پراكتيكالىق ساباقتار مەن ىسكەرلىك ويىندار وتكىزۋ مىندەتتەرى وبلىستىق سوتتىڭ مامانداندىرىلعان تاجىريبەلى سۋديالارىنا جۇكتەلىپ نەمەسە زاڭدى سەرتيفيكاتى بار جاتتىقتىرۋشى كاسىبي مەدياتورلاردى ءاربىر وبلىس ورتالىقتارىنا شاقىرتىپ وقىتۋ تۇرىندە ۇيىمداستىرىلسا دۇرىس بولماق.
ءسويتىپ, وقۋدى وبلىستىق سوتتار جانىنداعى كۋرستان تابىستى وقىپ اياقتاعان العاشقى تولقىنداعى تىڭداۋشىلارعا سەرتيفيكات بەرۋ قۇقىعىن شەشۋ ماسەلەسى قۇزىرلى ۋاكىلەتتى ورگاننىڭ الدىنا قويىلسا دەيمىز. سوندا سەرتيفيكات العان كاسىبي مەدياتورلار وزدەرىنىڭ زاڭدى ۇيىمدارىن قۇرۋعا قۇقىلى بولار ەدى. سونىمەن قاتار, وقۋ مۇمكىندىگىنشە اقىسىز جۇرگىزىلسە دەگەن پىكىر ءبىلدىرەمىز.
سەيىتقۇل قاليبەكوۆ,
زاڭگەر.
الماتى وبلىسى,
اقسۋ اۋدانى,
جانسۇگىروۆ كەنتى.
