بولاشاققا بالتا ۇرعان
جۇما, 29 ناۋرىز 2013 1:41
قۇرىلىس مەكەمەلەرى سپورت نىساندارىنان 68 ملن. تەڭگە اقشانى قولدى ەتكەن
«ەت تاتتىلىگىن قويسا, مەن ۇرلىعىمدى قويار ەدىم», دەگەن ەكەن باياعىدا ءبىر مىسىق. ءبىزدىڭ اتىراۋدىڭ كەيبىر قۇرىلىس مەكەمەلەرىن باسقارۋشىلار دا قازىر تاپ سول مىسىقتىڭ كەيپىن كەشىپ ءجۇر. جەردە جاتقاننان جونىپ جەپ ۇيرەنگەن ولارعا قانداي قۇرىلىستىڭ قازىناسىنا قول سۇقسا دا ءبارىبىر, تەك تەڭگە تىلەپ, بۇلكىلدەگەن جەمساۋلارىن تولتىرسا بولدى. سولاردىڭ بىرقاتارى ايماقتىڭ بۇرىنعى باسشىسىنىڭ تۇسىندا سپورت نىساندارى قۇرىلىسىن سالۋدىڭ وزىنەن عانا 68 ملن. 323 مىڭ 225 تەڭگە قارجىنى قولدى ەتىپتى.
جۇما, 29 ناۋرىز 2013 1:41
قۇرىلىس مەكەمەلەرى سپورت نىساندارىنان 68 ملن. تەڭگە اقشانى قولدى ەتكەن
«ەت تاتتىلىگىن قويسا, مەن ۇرلىعىمدى قويار ەدىم», دەگەن ەكەن باياعىدا ءبىر مىسىق. ءبىزدىڭ اتىراۋدىڭ كەيبىر قۇرىلىس مەكەمەلەرىن باسقارۋشىلار دا قازىر تاپ سول مىسىقتىڭ كەيپىن كەشىپ ءجۇر. جەردە جاتقاننان جونىپ جەپ ۇيرەنگەن ولارعا قانداي قۇرىلىستىڭ قازىناسىنا قول سۇقسا دا ءبارىبىر, تەك تەڭگە تىلەپ, بۇلكىلدەگەن جەمساۋلارىن تولتىرسا بولدى. سولاردىڭ بىرقاتارى ايماقتىڭ بۇرىنعى باسشىسىنىڭ تۇسىندا سپورت نىساندارى قۇرىلىسىن سالۋدىڭ وزىنەن عانا 68 ملن. 323 مىڭ 225 تەڭگە قارجىنى قولدى ەتىپتى. سوندا ولاردىڭ بۇل مەكەندەر ءوز بالالارى مەن نەمەرەلەرىنىڭ كەمەل كەلەشەگى ءۇشىن سالىنىپ جاتقانىنا دا پىسقىرىپ قاراماعاندارى عوي.
بىراق قاشاندا «مىڭ اسقانعا – ءبىر توسقان» بار. اقىرى ولاردى دا وبلىستىق پروكۋراتۋرا قىزمەتكەرلەرى تۇنىق سۋدىڭ ايدىنىنا تارتىپ شىعارىپ, كون جامىلعان بەتتەرىن جالپاق جۇرتقا كورسەتىپ بەردى. نەگىزىندە ادامدىق پەن اردى اياققا باسقان بۇل ارەكەتتەر وبلىستىق قۇرىلىس باسقارماسى تاراپىنان ۇدايى قولداۋ تاۋىپ وتىرعان. سونىڭ ناتيجەسىندە جۇمىستاردى تولىق ورىنداماۋ نەمەسە ساپاسىز اتقارۋ فاكتىلەرى ءجيى ورىن العان. ال باسقارمانىڭ 2008-2012 جىلدار ارالىعىنداعى جۇمىستارىنا تەكسەرۋ جۇرگىزگەن پروكۋراتۋرا قىزمەتكەرلەرى كوپتەگەن قۇقىق بۇزۋشىلىقتاردىڭ ۇستىنەن تۇسكەن.
بۇل جىلدارى «مەملەكەتتىك ساتىپ الۋ تۋرالى», «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» زاڭداردىڭ اياقاستى ەتىلگەن تۇستارى شاش ەتەكتەن. سونىڭ ءبىرى – جوبالىق-سمەتالىق قۇجاتتارىنىڭ بولماعانىنا قاراماستان, قۇرىلىس جۇمىستارى جۇرگىزىلە بەرگەن. مەردىگەرلەر تاراپىنان العاشقى بولىنگەن قارجىنىڭ جەتكىلىكسىزدىگى تۋرالى ۇسىنىستار ەنگىزىلمەسە دە, بارلىق قۇرىلىس نىساندارىنىڭ سمەتالىق قۇنى ۇنەمى سەبەپسىز ۇلعايتىلىپ وتىرعان. جانە ءبىر قىزىعى, سونىڭ بارىندە بەلگىلى ءبىر قۇرىلىس مەكەمەلەرى كونكۋرستىڭ جەڭىمپازى بولىپ تانىلىپ وتىرعان.
ال مەردىگەر اتانعان مەكەمە قۇرىلىستىڭ كولەمىن ساپاسىز ورىنداعانىنا نەمەسە مۇلدەم ورىنداماعانىنا قاراماستان, بيۋدجەت قارجىسىن ەشبىر كەدەرگىسىز الىپ تۇرىپتى. «ۇيالماعان بۇيىرماعاننان الادى», دەگەن وسى. الايدا, العان نارسەنى ەسەلەپ قايتاراتىن دا كەز تۋادى ەكەن.
جولداسبەك شوپەعۇل,
«ەگەمەن قازاقستان».
اتىراۋ.
