شوراز تۇرماق قوراز اتانسا دا قاشقىن قىلمىسكەر ءادىل جازادان قۇتىلا المايدى
بەيسەنبى, 14 ناۋرىز 2013 2:35
الماتى قالاسىنداعى ۇلتتىق ءباسپاسوز كلۋبىندا ەۋروپالىق ادۆوكاتتار دوكتور گابريەل لانسكي, زاڭگەر-ديپلومات اننا تسايتلينگەر جانە ماگيستر نوربەرت حازلحوفەردىڭ قاتىسۋىمەن «راحات اليەۆتىڭ قىلمىستىق ىسىنە» بايلانىستى ۆەنانىڭ فەدەرالدىق جوعارعى جەر سوتىنىڭ سوڭعى شىعارىلعان قاۋلىسى مەن اتالمىش ءىستىڭ بۇدان ءارى ءوربۋ ۇدەرىسىنە قاتىستى ءباسپاسوز ءماسليحاتى بولدى.
بەيسەنبى, 14 ناۋرىز 2013 2:35
الماتى قالاسىنداعى ۇلتتىق ءباسپاسوز كلۋبىندا ەۋروپالىق ادۆوكاتتار دوكتور گابريەل لانسكي, زاڭگەر-ديپلومات اننا تسايتلينگەر جانە ماگيستر نوربەرت حازلحوفەردىڭ قاتىسۋىمەن «راحات اليەۆتىڭ قىلمىستىق ىسىنە» بايلانىستى ۆەنانىڭ فەدەرالدىق جوعارعى جەر سوتىنىڭ سوڭعى شىعارىلعان قاۋلىسى مەن اتالمىش ءىستىڭ بۇدان ءارى ءوربۋ ۇدەرىسىنە قاتىستى ءباسپاسوز ءماسليحاتى بولدى.
بۇگىنگى تاڭدا «راحات اليەۆ ءىسى» اۆستريا قۇقىق قورعاۋ قىزمەتىندەگى ەڭ قوماقتى دا اسا شىتىرمان قىلمىستىق ءىس رەتىندە قوزعالىپ وتىرعاندىعىن بايانداي كەلە ەۋروپالىق قورعاۋشىلار اتالمىش ىسپەن 2011 جىلدان باستاپ ۆەنا پروكۋرورى, ارناۋلى زاڭگەر ماماندار مەن پوليتسيا قىزمەتكەرلەرى, پروكۋرورلىق قولداۋ توپتارى بىرلەسە اينالىسىپ جاتقاندىعىن جەتكىزدى. سونىمەن قاتار, ۆەنا قالاسىنىڭ فەدەرالدىق جوعارعى سوتىنىڭ 17.12.2012 جىلعى شەشىمىنە ساي «جوعارعى سوت ر.اليەۆتىڭ بوپسالاۋ جانە قىلمىستىق جولمەن تاپقان اقشانى استىرتىن شەتەل اسىرۋ ءۇشىن قىلمىستىق ۇيىمداسقان توپ قۇرعاندىعى جانە ونى باسقارعاندىعى ءجونىندەگى ايىپتاۋدى راستايتىنىن; جوعارعى سوت «نۇربانك» ءىسى بويىنشا قازاقستاندىق تەرگەۋ قورىتىندىسىن جانە وسى ىسكە بايلانىستى شىعارىلعان قازاقستاندىق ۇكىم مەن جابىرلەنۋشى ارمانگۇل قاپاشەۆا مەن ءابىلماجىن عىلىموۆتىڭ بەرگەن دالەلدەرىن زاڭدى دەپ تاپقاندىعىن; سونداي-اق, جوعارعى سوتتىڭ پىكىرى بويىنشا ر.اليەۆتىڭ ساياسي مالىمدەمەلەرى ودان قىلمىستىق جاۋاپكەرشىلىكتى الىپ تاستاي المايتىندىعىن; ۆەنا قالالىق پروكۋراتۋراسىنىڭ ر.اليەۆكە قاتىستى جۇرگىزگەن جەكە تەرگەۋ-انىقتاۋ ءىسى ايىپتالۋشىعا دەگەن كۇدىكتى كۇشەيتەتىندىگىن جانە اتالمىش قىلمىستارعا تىكەلەي قاتىسى بار ەكەندىگىنە سەندىرە تۇسەتىندىگىن» حابارلادى.
ءباسپاسوز ءماسليحاتىندا ەۋروپا جەرىندە بوي تاسالاپ ءجۇرگەن راحات اليەۆتىڭ قازىرگى تاڭدا ءوز تەگىن وزگەرتىپ راحات شوراز اتانعانىنا قاراماستان, وعان قاتىستى قىلمىستىق ءىستىڭ قالىڭداعانى جانە بۇل قىلمىستىق توپقا قاتىسى بار جاڭا دەرەكتەردىڭ انىقتالىپ جاتقاندىعى باياندالدى. ماسەلەن, راحات اليەۆتىڭ سەنىمدى وكىلى ءارى قورعاۋشىسى بولىپ جۇرگەن كريستيان لەسكوشەكتىڭ ۇيىنە, زاڭگەرلىك كەڭسەسى مەن ول قىزمەت ەتكەن ءىرى كوممەرتسيالىق كومپانيالارعا اۆستريا قۇقىق قورعاۋ قىزمەتى 2012 جىلدىڭ جازىندا جۇرگىزگەن تەكسەرىس بارىسىندا قازاقستان اۋماعىنان ەۋروپا جەرىنە 112 ميلليون ەۋرونىڭ بەلگىسىز ماقساتتا اۋدارىلعاندىعى انىقتالىپ وتىر. ودان وزگە ك.لەسكوشەكتىڭ كوپتەگەن حالىقارالىق كومپانيالارعا تىكەلەي قاتىسى بارى جانە ول ارقىلى ر.اليەۆ پەن وعان جاقىن ادامداردىڭ اتالمىش كوممەرتسيالىق قۇرىلىمداردىڭ قارجىلىق قۇرالدارىنا ەركىن قاتىناسا الاتىندىعى, سول ارقىلى بۇگىنگى كۇنگە دەيىن كريستيان لەسكوشەك زاڭسىز قاراجاتتارمەن راحات اليەۆكە قارجىلاي قولداۋ كورسەتىپ كەلگەندىگى جونىندە ءىس قوزعالا باستادى. وسىعان وراي ۆەنانىڭ فەدەرالدىق جوعارعى جەر سوتىنىڭ ءۇش بىردەي كاسىپقوي سوتتارى: دوكتور دوستال, ماگيستر برۋتسەك جانە ماگيستر حايندل بىرلەسىپ ۆەنا پروكۋرورىنىڭ راحات شورازعا (اليەۆ) قاتىستى 2010 جىلعى 29 ماۋسىمدا قوزعاعان قىلمىستىق كودەكستىڭ 153, 165-باپتارىنا ساي شىعارعان قاۋلىسى ءوز كۇشىندە قالاتىنىن جانە 2012 جىلدىڭ 28 ماۋسىمىندا كريستيان لەسكوشەكتىڭ مۇلكىنە ءتىنتۋ جۇرگىزۋگە قاتىستى كۇدىكتى تاراپتىڭ تۇسىرگەن ارىز-شاعىمىن نەگىزسىز دەپ تابۋ جونىندە شەشىم قابىلدادى.
ەۋروپالىق قورعاۋشىلار اۆستريا جەرىنە باس ساۋعالاعان راحات اليەۆ پەن ونىڭ جاقتاستارى وزدەرىنىڭ ۇستىنەن قوزعالعان قىلمىستىق ىسكە ساياسي استار بەرۋگە تىرىسۋ ارقىلى ۋاقىت ۇتقانى جانە سول ارادا اۆستريا ازاماتتىعىن الۋمەن قاتار, سول ەلدەگى ءتۇرلى ساياسي توپتاردىڭ وكىلدەرىن ساتىپ العاندىعى, سونداي-اق ۇلكەن قارجىنىڭ كۇشىمەن الگى سىبايلاس توپتىڭ تەرگەۋ-انىقتاۋ ىسىنە كوپ كەدەرگى كەلتىرگەنى دە ايتىلدى. گەرمانيا فەدەراتيۆتى رەسپۋبليكاسىنىڭ بۇرىنعى ىشكى ىستەر ءمينيسترى, قازىر بەرليندەگى «تاعدىر» قورىنىڭ وكىلى دوكتور بولىپ جۇمىس ىستەيتىن وتتو شيلي ۆەنادا جاساعان مالىمدەمەسىندە: «بۇل كۇندە قىلمىسكەر راحات اليەۆتى قاماۋعا الۋ تۋرالى ماسەلە ابدەن ءپىسىپ-جەتىلدى. بۇكىل ەۋروپا كەڭىستىگىن شۋلاتقان «اليەۆ ءىسى» ەۋرووداقتىڭ كوميسسارى ۆيۆيان رەدينگ پەن ەۋروپارلامەنتتىڭ قۇقىق جونىندەگى كوميتەتىنىڭ توراعاسى كلاۋس-حاينەر لەنەنىڭ ءجىتى نازارىندا ەكەندىگىن العا تارتامىن. كۇدىكتى ر.اليەۆ مىناداي اۋىر قىلمىستارىمەن گەرمانيادا دا, فرانتسيادا دا, ۇلىبريتانيادا دا ەركىندىكتە جۇرۋگە حاقىسى جوق», دەدى. ەۋروپالىق قۇقىق قورعاۋ ءىسىنىڭ بىلگىرى ايتقان وسى سوزدەر قازاقستاندىق قاشقىننىڭ ءىسى تاعى ءبىر قادام العا جىلجۋىنا ۇلكەن ىقپال ەتىپ وتىر.
«نۇربانك» توپ-مەنەدجەرلەرىن ۇرلاپ اكەتۋ جانە ولاردى ازاپتاپ ولتىرۋگە قاتىستى قىلمىستىق ىستەن وزگە ر.اليەۆتىڭ ۇستىنەن ۆەنا پروكۋراتۋراسى اناستاسيا نوۆيكوۆانىڭ ولىمىنە قاتىستى دا ءىستى تياناقتى تەكسەرۋ ۇستىندە. ەستەرىڭىزگە سالا كەتسەك, گۇلشات اليەۆاعا قاتىسى بار بەيرۋتتاعى كوپ قاباتتى ءۇيدىڭ تەرەزەسىنەن قازاقستاندىق اناستاسيا نوۆيكوۆا دەيتىن راحاتتىڭ كوڭىلدەسى بەلگىسىز جاعدايدا قۇلاپ ولگەن ەدى. سول كەزدە نوۆيكوۆانىڭ ءولىمىن راحات «وزىنە قول سالعان» دەپ بەيرۋت بيلىگىن سەندىرۋ ارقىلى ءىس قوزعاتپاي تاستاعان ەدى. وسى قىلمىسقا قاتىستى ليۆان پوليتسياسى قايتادان ءىس قوزعاپ, جيناقتالعان دەرەكتەردى اۆستريا پروكۋراتۋراسىنا تابىستاعان. قازىر تەرگەۋ-انىقتاۋ امالدارى جۇرگىزىلىپ جاتىر.
2010 جىلدان بەرى گەرمانيانىڭ كرەفەلد قالاسىنىڭ پروكۋراتۋراسى راحات اليەۆ پەن ونىڭ «جاڭا» وتباسى مۇشەلەرىنە قاتىستى «زاڭسىز قارجى اينالىمىن جۇرگىزدى» دەگەن باپ بويىنشا تاعىلعان ايىپتى زەرتتەپ, مالتا مەن ليۋكسەمبۋرگ بانكتەرى ارقىلى جاسالعان قارجىلىق وپەراتسيالاردى جانە باسقا دا كوممەرتسيالىق كەلىسىم-شارتتاردى تياناقتى ساراپتاۋ ۇستىندە. قازىرگى تاڭدا راحات اليەۆتىڭ ءوزى مالتادا, ال ونىڭ سىبايلاستارى كوشلياك, مۇساەۆ, يماشەۆ پەن ساپوجنيكوۆتىڭ اۆستريادا ەكەندىگى ەۋروپالىق قۇقىق قورعاۋ قىزمەتتەرىنە ءمالىم.
ۆەنانىڭ فەدەرالدىق جوعارعى جەر سوتىنىڭ جۋىردا شىققان شەشىمىنە وراي راحات اليەۆكە جانە ونىڭ قۇرامى 10 كىسىدەن تۇراتىن قىلمىستىق توبىنا قاتىستى قازاقستاندا جاساعان بوپسالاۋ ارقىلى بيزنەسمەندەردىڭ مۇلكىن تارتىپ الۋ, بانكيرلەردى ۇرلاۋ جانە ازاپتاپ ءولتىرۋ, قازاقستان فۋتبول وداعىنىڭ قاراجاتىن زاڭسىز يەمدەنۋ, شەتەلدىك قارجى ينستيتۋتتارى ارقىلى زاڭسىز قارجى اينالىمىن جۇرگىزۋ ىسىنە قاتىستى قازاقستاندىق قۇقىق قورعاۋ ورىندارىنىڭ شىعارعان ۇكىمىن ناقتىلاپ, بۇل ىستە ساياسي استاردىڭ جوق ەكەندىگى دالەلدەنىپ وتىر, دەيدى دوكتور گابريەل لانسكي.
الماتى قالاسى المالى اۋداندىق سوتى شىعارعان ۇكىمدى جانە قازاقستاندىق تەرگەۋشىلەردىڭ ءىستى ساۋاتتى جۇرگىزگەنىن ايتا كەلىپ گابريەل لانسكي 2011 جىلعا دەيىن, ياعني جوعالعان بانكيرلەردىڭ دەنەسى تابىلعانشا اۆستريا پروكۋراتۋراسى «اليەۆ ءىسى» تۋرالى ناقتى مالىمەتتەرگە قانىق بولماعانىن العا تارتادى. ونىڭ ايتۋىنشا راحات اليەۆ اۆسترياداعى قازاقستان ەلشىلىگىندە قىزمەت ەتە ءجۇرىپ, ۆەنا قالاسىنا كوپتەگەن ينۆەستيتسيا سالعان جانە سول ارقىلى ەۋروپالىق ساياسي ورتا مەن قوعامدا ءوزىنىڭ جاعىمدى كەلبەتىن قالىپتاستىرۋعا الدىن-الا كۇش سالعان. تەك اۆستريالىق قۇقىق قورعاۋ ورىندارى بۇل ىسپەن تەرەڭىرەك اينالىسۋ ءۇشىن قازاقستاندىق جۇزدەگەن توم قۇجاتتاردى نەمىس تىلىنە اۋدارىپ, ەۋروپالىق سوت-مەديتسينا ءىسىنىڭ بىلگىر مامانى ءارى بەرليندەگى شەريتە ينستيتۋتىنىڭ پروفەسسورى تسوكو مىرزا ارنايى الماتىعا كەلىپ, بانكيرلەردىڭ مايىتىنە قازاقستاندىق ماماندارمەن بىرلەسە وتىرىپ تياناقتى زەرتتەۋ جاساعاننان كەيىن اۆستريانىڭ راحات اليەۆكە قاتىستى كوزقاراسى مەن ۇستانعان پوزيتسياسى مۇلدەم وزگەرىپ, راحات اليەۆ پەن ونىڭ جاقتاستارىنا زاڭ تالاپتارى كۇشەيتىلگەن. بۇگىندە جاڭاشا وربىگەن «اليەۆ ىسىنە» قاتىستى ەۋروپانىڭ بۇقارالىق اقپارات قۇرالدارى الەمگە جارىسا اقپارات تاراتىپ جاتىر.
ايتالىق, 2013 جىلدىڭ 16 اقپانىنداعى سانىندا «Die Presse» گازەتى ءبىرىنشى بەتىندە «اليەۆ كىسى ولتىرگەنى ءۇشىن ۆەنا سوتىندا جاۋاپ بەرۋگە ءازىر» دەگەن تاقىرىپتى ايقايلاتىپ بەرگەن. ونداعى ۆەنانىڭ فەدەرالدىق جوعارعى جەر سوتىنىڭ قازاقستاننىڭ اۆسترياداعى بۇرىنعى ەلشىسى راحات شوراز (بۇرىن اليەۆ) تاراپىنداعى زاڭسىز اقشا اينالىمى جونىندە كۇدىك كەلتىرۋىن ايعاقتاعان ەكسكليۋزيۆتى رەپورتاج ونىڭ قورعاۋشىلارىن «سەزىكتى سەكىرەر» دەگەندەي, سەكەمدەنۋگە ءماجبۇر ەتەدى. ۇستىنەن ءىس قوزعالىپ جاتقان راحات شوراز «بارلىعى ءۇشىن جاۋاپ بەرۋگە دايىن»-مىس, دەيدى ادۆوكات مانفرەد اينەدتەر. «Presse» باسىلىمىنىڭ: «قازىرگى ۋاقىتتا مالتادا جۇرگەن بۇرىنعى ديپلومات كىسى ءولتىردى دەگەن ايىپ بويىنشا سوت الدىنا بارۋعا دايىن با؟» دەگەن سۇراعىنا: قورعاۋشىسى «البەتتە» دەگەن جاۋاپ قايتارادى.
گازەتتىڭ ودان ءارى جازۋىنشا, راحات شورازعا قاتىستى «Media Quarter Marx» (MQM) مەديا-ورتالىعىن قۇرۋ جوباسىنا مافيالىق قاراجاتتى ينۆەستيتسيالادى دەگەن كۇدىك بار. ول St. Marx-ءتىڭ بۇرىنعى قاساپحاناسىنىڭ ورنىنا سالىنعان. سوڭعى ۋاقىتتا ORF تەلەكومپانياسى دا ناق وسى اۋدانعا (كورشى تەلىمگە) ورنىعادى دەگەن سىبىستار ءجۇرىپ وتكەندىگى ايتىلىپ, بۇدان باسقا ر. اليەۆ-شورازعا ەكى قازاقستاندىق بانكيردى ءولتىردى دەگەن كۇدىك كەلتىرىلگەندىگىن, الايدا ول بارلىق ايىپتاۋلاردى جوققا شىعارىپ وتىرعاندىعىن قوزعايدى. ال ر.شورازدىڭ قازىر ۆەنادا ەمەس, مالتادا جۇرگەن جاعدايىن اينەدتەر بىلاي دەپ تۇسىندىرەدى: «ول وندا جاسىرىنىپ جۇرگەن جوق, تۇرىپ جاتىر». شورازعا جۇمىس ىستەيتىن تاعى ءبىر ادۆوكات وتتو ديتريح كىسى ءولتىرۋ جونىندەگى ايىپتاۋلاردىڭ دا, سونداي-اق ارام اقشانى اينالىمعا شىعارعانى جونىندەگى ايىپتاۋلاردىڭ دا دالەلدەنبەيتىنىنە كامىل سەنىمدى.
«Die Presse» 2013 جىلدىڭ 15 اقپانىنداعى ءبىرىنشى بەتىندە «ۆەنانىڭ «مەديا كۆارتال «ماركسىندە» مافيالىق اقشا قايدان ءجۇر؟» دەگەن سۇراقتى باس تاقىرىپقا شىعاردى. مۇندا سوتتىڭ قازاقستاننىڭ اۆسترياداعى بۇرىنعى ەلشىسى راحات شورازدىڭ مافيالىق ۇيىمدى باسقارعانى تۋرالى كۇدىكتىڭ نىعايىپ وتىرعاندىعى جونىندە قاۋلى ەتكەنى ايتىلعان. شوراز ۆەنالىق «مەديا كۆارتال «ماركستىڭ» ينۆەستورى دەپ سانالادى».
مانفرەد زەە دەگەن كەلەسى ءبىر اۆتوردىڭ جازۋىنا قاراعاندا, 2012 جىلدىڭ 3 شىلدەسى كۇنى ەلەڭ-الاڭنان فەدەرالدىق قىلمىستى ىستەر پوليتسياسى باسقارماسىنىڭ قىزمەتكەرلەرى ىسكە جاۋاپتى پروكۋرور بەتتينا ۆاللنەرمەن بىرگە ۆەنالىق ادۆوكات لەسكوشەكتىڭ جەكە پاتەرى مەن كەڭسە جايىندا ءتىنتۋ جۇرگىزدى. ءتىنتۋ تۋرالى قاۋلىعا سايكەس بۇل شارانىڭ ماقساتى – ىشىندە شەتەلدەگىلەرى دە بار, جالپى جيىنى 15 فيرمانىڭ «ەكونوميكالىق مەنشىك يەسى كىم ەكەندىگىن» ايعاقتايتىن اقپاراتتار مەن قۇجاتتاردى تابۋ.
وسى رەتتە A. V. MAXIMUS Holding AG. كومپانياسىنا نازار اۋدارىلدى. بۇل كومپانيا ارقىلى 2007 جىلى قازاقستاننىڭ اۆسترياداعى بۇرىنعى ەلشىسى, قازىردە زاڭسىز اقشا اينالىمىندا جانە بوتەن دۇنيە-م ۇلىكتى قىمقىرۋدا كۇدىكتى بولىپ وتىرعان راحات شوراز (بۇرىن راحات اليەۆ) «مەديا كۆارتال «ماركستى» (مكم) قارجىلاندىرعان.
مكم تۋرالى ايتىلعاندا, اڭگىمە ۆەنا قالاسىنىڭ ۇلگىلى-كورسەتپەلى جوباسى تۋرالى بولادى. ونىڭ كومەگىمەن ست. ماركستىڭ بۇرىنعى قاساپحاناسىنىڭ تاريحي جەرلەرى ولاردا ءارتۇرلى باق-تاردى ورنالاستىرۋ ەسەبىنەن پايدالانىلۋىنا قايتادان جول اشىلۋى ءتيىس-ءتىن. وندا ورف تەلەارناسىن ورنالاستىرۋ تۋرالى وي-پايىمدار بولعان. بىراق ەندى بۇل كوكەيكەستى ەمەس. ادۆوكات لەسكوشەك راحات شورازدىڭ سەنىمدى وكىلى ءارى ءىس باسقارۋشىسى رەتىندە ارەكەت ەتكەن. سونداي-اق, ول دا زاڭسىز اقشا اينالىمىنا قاتىستى قىلمىستىق ىستە كۇدىكتى رەتىندە تەرگەلەتىن بولادى.
جوعارىدا كورسەتىلگەن تىنتۋلەردىڭ نەگىزىندە ەكىنشى دارەجەلى سوت, اتاپ ايتقاندا, ۆەنا فەدەرالدى جوعارعى جەر سوتى پروكۋراتۋرا العا تارتىپ وتىرعان «راحات شوراز جانە كومپانيا» تاراپىنداعى ايىپتاۋلاردى سەنىمدى, ءتىپتى ءىشىنارا دالەلدەنگەن دەپ باعالايدى. ۆەنا فەدەرالدى جوعارعى سوتىنىڭ 2012 جىلعى 17 جەلتوقسانداعى شەشىمىمەن ادۆوكات لەسكوشەكتىڭ تىنتۋگە نارازىلىق بىلدىرگەن شاعىم ارىزى, بىلايشا ايتقاندا, تاس-تالقان ەتىلدى», دەپ جازادى «Die Presse» باسىلىمى.
اۆستريا سوتى قاراپ جاتقان قىلمىستىق ءىستىڭ ىشىندەگى ەڭ شۋلىسى ءارى كىسى شوشىرلىعى ارينە, «نۇربانك» توپ-مەنەدجەرلەرىن ۇرلاۋ جانە ولاردى ازاپتاپ ءولتىرۋ بولىپ وتىر. ەستەرىڭىزگە سالا كەتەيىك, 2007 جىلى راحات اليەۆ ءوزىنىڭ سىبايلاس دوستارى ۆاديم كوشلياك, ءالنۇر مۇساەۆ جانە باسقالارىمەن بىرلەسىپ «نۇربانك» مەنەدجەرلەرى جولداس تەمىراليەۆ پەن ايبار حاسەنوۆتى ۇرلاپ اكەتكەن بولاتىن. اتالمىش قارجى مەكەمەسىنىڭ باس اكتسيونەرى بولىپ تابىلاتىن راحات اليەۆ ءوزىنىڭ قاراۋىنداعى قىزمەتكەرلەردى بانك ەسەپ-شوتىنان اقشا جىمقىردى دەگەن جەلەۋمەن زاڭسىز تۇتقىنداپ, ولاردى قالا سىرتىنداعى وزىنە تيەسىلى ۇيدە قاماپ ۇستايدى. بىرنەشە كۇن بويى ۇرىپ-سوعىپ, بارلىق دۇنيە-مۇلكىن ءوزى ۇسىنعان ادامداردىڭ اتىنا جازىپ بەرۋىن تالاپ ەتىپ, تامىرلارىنا بەلگىسىز ءدارى ەگەدى, ەڭ سوڭىندا توپ-مەنەدجەرلەردىڭ باستارىنا پوليەتيلەن قاپشىق كيگىزىپ تۇنشىقتىرىپ ولتىرگەن. بۇل قىلمىس تەك 2011 جىلى الماتى جانىنداعى رەميزوۆكا اۋدانى ماڭىنداعى تۇرمىستىق قوقىس الاڭىنا كومىلگەن تەمىر بوشكەلەر تابىلعاندا عانا اشكەرە بولدى. تەرگەۋ ءىسى ءجىپتىڭ ۇشى راحات اليەۆكە بارىپ جالعاسقانىن انىقتاپ, ارتىنشا قىلمىستىق ءىس قوزعاپ, ناتيجەسىندە سوت ۇكىم شىعارعان ەدى.
سونىمەن, ۆەنانىڭ فەدەرالدىق جوعارعى جەر سوتىنىڭ سوڭعى قاۋلىسىنا وراي ەۋروپالىق ادۆوكاتتار دوكتور گابريەل لانسكي, زاڭگەر-ديپلومات اننا تسايتلينگەر جانە ماگيستر نوربەرت حازلحوفەرلەر ەۋروپانى شۋلاتقان «اليەۆ ءىسى» ءوزىنىڭ ناقتى شەشىم قابىلدار مەجەسىنە جەتتى دەپ ەسەپتەيدى جانە بۇل پىكىردى ەۋروپانىڭ الەمگە حابار تاراتاتىن بۇقارالىق اقپارات قۇرالدارى دا قىزۋ قۋاتتاپ وتىر. سوڭعى ءسوزدى جوعارعى سوت ايتادى دەي وتىرىپ, قورعاۋشىلار اليەۆتەن جاپا شەگىپ, ءتۇرلى دەنە جاراقاتىن العان جانە مۇلكىنەن ايىرىلعان 30-دان اسا جابىرلەنۋشىنىڭ كۋالاندىرۋلارىن, بانك توپ-مەنەدجەرلەرىنىڭ ءمايىتىن ساراپتاي كەلە, ولاردىڭ تۋىستارى تۇسىرگەن ارىز-شاعىمنىڭ نەگىزدى ەكەنىن, كۇدىكتىلەردىڭ تەلەفون بيللينگىندەگى اقپاراتتاردىڭ بانكيرلەر ۇرلانعان كۇنگى جازبالارى مەن قىلمىس جاسالعان جەردەن تابىلعان بۇلتارتپاس ايعاقتاردى ەسكەرەدى جانە ءادىل جازاسىن بەرەدى دەپ ەسەپتەيدى.
راحات اليەۆتىڭ كىم ەكەندىگى ونىڭ اتا-بابا اتىنان, ءوز تەگىنەن باس تارتىپ, ايەلىنىڭ اتىنا كوشۋىنەن, ءسويتىپ شوراز بولىپ شىعا كەلۋىنەن-اق كورىنىپ تۇر. بىراق ەندى شوراز تۇرماق قوراز اتانسا دا قاشقىن قىلمىسكەر ءادىل جازادان قۇتىلا المايدى.
قانات ەسكەندىر,
«ەگەمەن قازاقستان».
الماتى.
————————————-
سۋرەتتى تۇسىرگەن
يۋري بەككەر.
