ارمان وكتيابر – الماتىدان:
ارىستاعى اعايىننىڭ باسىنا تۇسكەن توسىن جاعدايدى الماتى جۇرتشىلىعى دا كۇيزەلىسپەن قابىلدادى. قالا اكىمى باۋىرجان بايبەك ءوزىنىڭ الەۋمەتتىك جەلىدەگى پاراقشاسىنا الماتى قالاسى تاراپىنان قيىندىققا تاپ بولعان تۇرعىندارعا جان-جاقتى كومەك كورسەتۋ شارالارى قولعا الىنعانىن جەتكىزدى. «ارىستاعى قايعىلى وقيعا ەشكىمدى بەيجاي قالدىرمادى. بارلىق الماتىلىقتاردىڭ اتىنان قازا بولعانداردىڭ وتباسىلارىنا كوڭىل ايتامىن, زارداپ شەككەندەردىڭ تەزىرەك ساۋىعىپ كەتۋىن تىلەيمىن. تۇركىستاندىق ارىپتەستەردەن ساعات سايىن حابار الىپ وتىرمىز. جۋىق ۋاقىتتا تسەمەنت, ەسىك-تەرەزە سىندى قاجەتتى قۇرىلىس ماتەريالدارى تيەلگەن العاشقى جۇك كولىكتەرى ارىسقا اتتانادى», دەلىنگەن اكىمنىڭ جازباسىندا.
الماتى قالاسى اكىمدىگى قىزمەتكەرلەرى, قالاداعى بىرقاتار كاسىپورىندار مەن جەكەلەگەن ۇجىمدار بىركۇندىك جالاقىسىن اۋداردى. «مەن – الماتىلىقپىن» ەرىكتىلەر قوزعالىسىنىڭ بەلسەندىلەرى كيىم-كەشەك پەن ازىق-ت ۇلىك, باسقا دا كەرەك-جاراقتارمەن كومەك كورسەتۋدە بەلسەندىلىك تانىتۋدا. سونىمەن قاتار Nur Otan پارتياسى قالالىق فيليالىنىڭ باستاماسىمەن زارداپ شەككەندەرگە قايىرىمدىلىق اكتسياسى باستالدى. شاھار كاسىپكەرلەرى دە ءوز بىرلىكتەرىن كورسەتىپ, كۇش جۇمىلدىردى.
گۇلايىم شىنتەمىرقىزى – اقتاۋدان:
ماڭعىستاۋلىقتار جارىلىستان زارداپ شەككەن ارىستىقتارعا اقشالاي, ازىق-ت ۇلىك, كيىم جانە ەڭ قاجەتتى زاتتار جيناۋدى باستاپ كەتتى. قازىرگى ۋاقىتتا ۇيىمدار مەن ەرىكتىلەر باستاماسىمەن 10-نان استام گۋمانيتارلىق كومەك قابىلداۋ پۋنكتتەرى اشىلدى.
مەملەكەتتىك قىزمەتكەرلەر, «اتامەكەن» كاسىپكەرلەر پالاتاسى, دارىگەرلەر بىركۇندىك جالاقىسىن اۋداردى. Nur Otan پارتياسى ماڭعىستاۋ وبلىستىق فيليالى جانىنان ارىس قالاسىنا گۋمانيتارلىق كومەك كورسەتەتىن جۇمىسشى توبى قۇرىلدى. ونىڭ قۇرامىنا پارتيانىڭ وبلىستىق, قالالىق, اۋداندىق فيليالىنىڭ قىزمەتكەرلەرى جۇمىلدىرىلدى. بۇل جۇمىسقا وبلىستاعى باستاۋىش پارتيا ۇيىمدارى دا تارتىلماق. بۇعان قوسا, پارتيانىڭ وبلىستىق فيليالىنىڭ ۇجىمى بىركۇندىك جالاقىلارىن اۋدارۋ تۋرالى شەشىم قابىلدادى. فيليال توراعاسىنىڭ ءبىرىنشى ورىنباسارى ەلۋباي ءابىلوۆ قيىندىقتى جەڭۋدىڭ جولى بىرىگۋ ەكەنىن ايتتى.
– ارىستاعى توتەنشە جاعداي زارداپتارىنان كوز جۇمعان وتباسىنا كوڭىل ايتامىز. سونداي-اق جاراقات العاندار تەز ارادا ساۋىعىپ وتباسىنا ورالادى دەپ سەنەمىز. ال بالالارىن جوعالتقان اتا-انالار بولسا, جاقىن ارادا بالالارىمەن قاۋىشۋىن تىلەيمىز. كەز كەلگەن ادام وسىنداي قيىن جاعدايعا تاپ بولۋى مۇمكىن ەكەنىن جوققا شىعارۋعا بولمايدى. ارىس قالاسىندا ورىن العان جاعداي بارشا قازاقستاندىقتاردى بىرىكتىردى. ءبىز, ماڭعىستاۋ وبلىسىنىڭ تۇرعىندارى, ويىمىزبەن جانە جۇرەگىمىزبەن سىزدەرمەن بىرگەمىز. الداعى ۋاقىتتا بارلىعى جاقسى بولادى دەپ سەنەمىز, دەدى ە.ءابىلوۆ.
– ارىستاعى جاعدايدى ەستىگەننەن كەيىن نازارىمىز سول اعايىنداردا بولىپ تۇر. بارلىعىمىز دا ۋايىمداپ, الاڭداپ وتىرعان جايىمىز بار. وسى حاباردى ەستي سالا قول قۋسىرىپ وتىرماي وڭىردەگى جاستار ۇيىمدارى, ەرىكتىلەر توبى, باسقا دا بەلسەندى جاستار ارىستاعى اعايىندارعا كومەك كورسەتۋگە دايىن. قازىردىڭ وزىندە ەسەپشوتتار اشىلىپ, WhatsApp جەلىسىندە چاتتار قۇرىلىپ, كاسىپكەرلەر دە مۇمكىندىگىنشە قارجىلاي نەمەسە زاتتاي كومەك كورسەتۋگە دايىن ەكەندەرىن جەتكىزدى, دەدى «ۇلتتىق رۋح» قوعامدىق بىرلەستىگىنىڭ توراعاسى ايات سۇگىرباي.
باقىتگۇل باباش – اتىراۋدان:
اتىراۋدا 20 توننا گۋمانيتارلىق جۇك جينالدى. ونىڭ ىشىندە ازىق-ت ۇلىك ونىمدەرى, گيگيەنا قۇرالدارى جانە ءبىرىنشى كەزەكتەگى قاجەتتى زاتتار بار. «دينا» ساۋدا ورتالىعى ديرەكتورىنىڭ ايتۋىنشا, مۇنايلى وڭىردەن العاشقى گۋمانيتارلىق جۇك 25 ماۋسىم كۇنى اتتاندى. كومەككە ساۋدا ورتالىعىن جالعا الىپ وتىرعان 100-دەن استام كاسىپكەر قاتىستى.
– وبلىس اكىمى نۇرلان نوعاەۆ ارىس قالاسىنداعى توتەنشە جاعداي سالدارىنان زارداپ شەككەندەردى قولداۋعا جانە تۇرعىندارعا كومەك كورسەتۋگە شاقىردى. 20 توننا قاجەتتى جۇك جينالدى. قازىر بارلىق جۇكتى تيەپ جاتىرمىز. بۇدان بولەك, باق جاريالاعان بانك شوتتارىنا قاراجاتتارىن اۋدارۋدا, دەيدى «دينا» ساۋدا ورتالىعىنىڭ ديرەكتورى نۇرلان تاۋەكەل.
ارىستاعى جارىلىستان زارداپ شەككەندەرگە كومەك رەتىندە اتىراۋ وبلىستىق اكىمدىگى مەن جەرگىلىكتى اتقارۋشى ورگانداردىڭ بارلىق ۆەدومستۆولىق مەكەمەلەرىنىڭ قىزمەتكەرلەرى بىركۇندىك جالاقىلارىن اۋدارادى. سونىمەن قاتار Nur Otan پارتياسى اتىراۋ وبلىستىق فيليالىنىڭ عيماراتىندا قابىلداۋ بولىمشەسى اشىلدى. ول جەردە باستاپقى تۇرمىستىق قاجەتتىلىكتەر, كيىم-كەشەكتەر جيناقتالىپ, گۋمانيتارلىق كومەك رەتىندە ارىس قالاسىنا جىبەرىلۋدە. وبلىستىڭ كاسىپكەرلەرى دە بەلسەندىلىك كورسەتىپ, ارىستىقتارعا قارجىلاي كومەكتەسۋ ءۇشىن قاراجات جيناپ جاتىر.
قايرات ءابىلدا – قاراعاندىدان:
قاراعاندى وڭىرىندە وبلىستىق, قالالىق جانە اۋداندىق اكىمدىكتەردىڭ قىزمەتكەرلەرى بىركۇندىك جالاقىلارىن ارىس قالاسىنىڭ الاپات جارىلىستان زارداپ شەككەن تۇرعىندارىنا كومەك رەتىندە اۋدارادى.
سونداي-اق كومەك قولىن سوزۋعا نيەت تانىتقان ازاماتتار ءۇشىن قاراعاندى قالاسى, ءاليحانوۆ كوشەسى, №4-ۇيدەگى Nur Otan پارتياسىنىڭ فيليالى بازاسىندا ارنايى پۋنكت اشىلىپ, جۇمىس ىستەي باستادى. قازىرگى تاڭدا بىرنەشە تەلەفون ءنومىرلەرى بويىنشا جەدەل جەلى جۇمىس ىستەپ تۇر.
قاراعاندى وبلىسى اكىمدىگىنىڭ باستاماسى بويىنشا ارىس قالاسىنا 10 توننا گۋمانيتارلىق جۇك جونەلتۋ شاراسى ۇيىمداستىرىلدى. ازىق-ت ۇلىك تاعامدارىن, ءبىرىنشى قاجەتتىلىك تاۋارلارىن, جەكە باس گيگيەناسى زاتتارىن جيناۋ ىسىنە مەتسەناتتار, دەمەۋشىلەر جانە ءوڭىردىڭ قايىرىمدى تۇرعىندارى اتسالىستى.
سونىمەن قاتار وبلىستاعى بىرقاتار مەكەمەلەر مەن ۇيىمداردىڭ ۇجىمدارى بىركۇندىك ەڭبەكاقىلارىن ارىس قالاسىنىڭ قيىن جاعدايعا تاپ بولعان تۇرعىندارىنا كومەك رەتىندە اۋداردى.
باقتيار تايجان – قىزىلوردادان:
سىر ەلىنىڭ گۋمانيتارلىق كەرۋەنى تۇركىستان وبلىسىنا جولعا شىقتى. توتەنشە وقيعاعا بايلانىستى قىزىلوردا وبلىسى تاراپىنان ارنايى اۆتوكەرۋەن جاساقتالىپ, 14,5 توننا كۇرىش, 10 توننا ۇن, 5 توننا قاراقۇمىق, 1,5 توننا ءسۇت جىبەرىلدى. سونداي-اق جەرگىلىكتى اتقارۋشى ورگاندارداعى 2083 مەملەكەتتىك قىزمەتشى بىركۇندىك جالاقىسىن اۋدارماق. بۇدان بولەك, زارداپ شەككەندەرگە ازاماتتىق قوعام وكىلدەرى, كاسىپكەرلەر جانە جەكە ازاماتتار دا ءوز ەرىكتەرىمەن قولداۋ كورسەتىپ جاتىر.
تەمىر جول ستانسالارىندا وقيعاعا وراي كىدىرگەن 5 جولاۋشى پويىزىنداعى 1200 جولاۋشىعا ىستىق تاماق پەن سالقىن سۋ تەگىن تاراتىلدى جانە 15 جولاۋشىعا مەديتسينالىق كومەك كورسەتىلدى. ەكى جولاۋشى پويىزى («موسكۆا – بىشكەك», «اتىراۋ – الماتى») «سەكسەۋىل» ستانساسى ارقىلى جەزقازعان باعىتىمەن الماتى, بىشكەك قالالارىنا ساپارىن جالعاستىردى. جولاۋشىلار پويىزىنىڭ باعىتى وزگەرۋىنە بايلانىستى «سەكسەۋىل» ستانساسىنان قىزىلوردا, تۇركىستان وبلىستارىنا باراتىن 500 جولاۋشىعا مەجەلەنگەن جەرىنە جەتۋى ءۇشىن ارنايى 14 ۆاگوندىق ستانساارالىق پويىز بەن 6 اۆتوبۋس قىزمەت كورسەتتى. شيەلى ستانساسىنان 82 جولاۋشىنى الماتى قالاسىنا اۆتوبۋسپەن, 22 ازاماتتى لۋگوۆوي, تاراز جانە شىمكەنت قالالارىنا شاعىن كولىكتەرمەن جونەلتۋ ۇيىمداستىرىلدى. سونىمەن قاتار تۇركىستان وبلىسىنا شىمكەنت قالاسىمەن اراداعى جولاۋشىلاردى تاسىمالداۋ ءۇشىن بەس ۇلكەن سىيىمدىلىقتى اۆتوبۋس جىبەرىلدى. وبلىس اكىمى جانىنان جەدەل شتاب قۇرىلىپ, كەز كەلگەن ۋاقىتتا ءتۇرلى كومەك كورسەتۋگە دايىن تۇر.
قازبەك قۇتتىمۇرات ۇلى – ورالدان:
رەسپۋبليكالىق اكتسياعا باتىس قازاقستان وبلىسى دا بەلسەنە قاتىسۋدا. «اپات تۋرالى اقپارات جەتكەن العاشقى كۇنى-اق ورالدان قۇرىلىس ماتەريالدارى تيەلگەن العاشقى كەرۋەن اتتانىپ كەتتى» دەپ حابارلادى وبلىس اكىمىنىڭ ءباسپاسوز حاتشىسى داۋرەن ساكەن ۇلى. اكتسيا اياسىندا كوپتەگەن ۇيىمداردىڭ قىزمەتكەرلەرى بىركۇندىك جالاقى كولەمىندە قارجىلاي كومەكتى جاپا شەككەندەرگە اۋدارۋ جونىندە شەشىم قابىلدادى. ولاردىڭ الدىڭعى لەگىندە ورال قالاسى اكىمدىگىنىڭ قىزمەتكەرلەرى, «باتىس سۋ ارناسى» جشس-ءنىڭ 900 قىزمەتكەرى بار.
«ءبىز بارلىق تۇرعىنداردى, جاستاردى, ەرىكتىلەردى اپاتقا ۇشىراعان ادامدارعا كومەك كورسەتۋگە شاقىرامىز. ءبىزدىڭ وتانداستارىمىزعا قولداۋ قاجەت!» دەيدى باتىسقازاقستاندىق ەرىكتىلەر.
ورال قالاسىندا ءۇش جەردە: ن.نازارباەۆ داڭعىلى بويىنداعى №188-ءۇيدىڭ ءبىرىنشى قاباتىندا, قادىر مىرزا ءالى كوشەسىندەگى №18-ۇيدە ورنالاسقان «باستاۋ» كوۆوركينگ ورتالىعىندا جانە ج.مولداعاليەۆ كوشەسىنىڭ №19-ۇيىندە ارنايى ورتالىق اشىلىپ, جۇمىس ىستەۋدە. 25 ماۋسىم كۇنى ءتۇس اۋا ورال قالاسىنان 30 توننا گۋمانيتارلىق جۇك تيەگەن تاعى ءبىر كەرۋەن ارىسقا قاراي بەت الدى. كومەك كولىگىندە 6 توننا ۇن, 2 توننا ماكارون ونىمدەرى, 2 توننا وسىمدىك مايى, 5 توننا تاۋىق ەتى, بالالار كيىمدەرى, ت.ب. قاجەتتى زاتتار بار. بۇل «بەلەس-اگرو», «تەرەكتى ماي كومبيناتى», «كۇبىلەي», «جايىق ەت», «ورال ترانسفورماتور زاۋىتى» سەكىلدى ءىرى كاسىپورىندار ۇسىنعان العاشقى كومەك.
ازامات قاسىم – وسكەمەننەن:
ارىس قالاسىنىڭ تۇرعىندارىنا كومەك كورسەتۋ ماقساتىندا شىعىس قازاقستاندا ارنايى شتاب قۇرىلدى. ايماق باسشىسى جەتەكشىلىك ەتەتىن شتاب قۇرامىنا وبلىس اكىمىنىڭ ورىنباسارلارى, Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى, باق وكىلدەرى مەن قوعامدىق بىرلەستىك وكىلدەرى ەندى. وبلىس اكىمدىگىندە سەلەكتورلىق رەجىمدە وتكەن بريفينگتە دانيال احمەتوۆ ءوڭىر تۇرعىندارىن, ايماقتاعى ءىرى كاسىپورىن باسشىلارى مەن كاسىپكەرلەردى ارىس حالقىنا قولدان كەلگەنشە كومەك كورسەتۋگە شاقىردى. «جيىنعا مەملەكەتتىك قىزمەتشىلەرمەن قاتار بيزنەس وكىلدەرى مەن جۋرناليستەردى دە شاقىردىم. جەرلەستەرىمىز ارىستىقتاردىڭ قايعىسىنا بەيجاي قارامايدى دەپ سەنەمىن. كاسىپورىن باسشىلارى ءوز ۇجىمدارىمەن كەزدەسىپ, ارىپتەستەرىن قيىن جاعدايعا دۋشار بولعان اعايىنعا جاردەمدەسۋگە شاقىرۋى ءتيىس. بارلىق جۇمىس ەرىكتى تۇردە جۇرگىزىلۋى كەرەك. قازىر اپاتتان زارداپ شەككەن وتباسىلاردىڭ بالالارىن شىعىس قازاقستانداعى لاگەرلەردە دەمالتۋ ماسەلەسىن قاراستىرۋدامىز», دەدى وبلىس اكىمى.
قازىر شىعىس قازاقستاندا گۋمانيتارلىق كومەك كورسەتۋ پۋنكتتەرى اشىلىپ, جۇمىس ىستەپ جاتىر. 24 ماۋسىمدا وسكەمەندە Nur Otan پارتياسى وبلىستىق فيليالىنىڭ عيماراتىندا (قاسىم قايسەنوۆ كوشەسى, №121) اشىلعان پۋنكتتە گيگيەنالىق زاتتار, كونسەرۆىلەر, ءداندى داقىلدار مەن ماكارون ونىمدەرى جانە جەمىس-جيدەكتەر, سۋ, بالالارعا ارنالعان كيىم-كەشەكتەر, كورپە جانە كورپەشەلەر قابىلدانادى. فيليال ءتوراعاسىنىڭ ورىنباسارى ولەگ چۋگۋنكوۆتىڭ ايتۋىنشا, جينالعان زاتتار قىسقا مەرزىمدە ارىسقا جونەلتىلەدى.
كەشە وبلىس ورتالىعىنداعى حاليفا التاي مەشىتى «شىعىس ارىسپەن بىرگە» قايىرىمدىلىق اكتسياسىن باستادى. «وبلىستىق مەشىت پەن اۋداندىق مەشىتتەر ءارتۇرلى كومەك تۇرلەرىن قابىلداپ, ارىس تۇرعىندارىنا جونەلتۋگە ءازىر» دەيدى قمدب وسكەمەن ءوڭىرى بويىنشا وكىل يمامى ەرمەك مۇقاتاي.
سونىمەن قاتار وبلىستاعى بارلىق جاستار رەسۋرستىق ورتالىقتارىندا (ولاردىڭ سانى – 20) گۋمانيتارلىق كومەك قابىلدانىپ جاتىر. وسكەمەندەگى گۋمانيتارلىق كومەك كورسەتۋ شتابى پوتانين كوشەسى, №27/1 مەكەنجايىندا ورنالاسقان.
ءومىر ەسقالي – پەتروپاۆلدان:
قىزىلجار ءوڭىرىنىڭ تۇرعىندارى دا جانتۇرشىگەرلىك وقيعاعا ورتاقتاسىپ, زارداپ شەككەندەرگە قول ۇشىن بەرۋگە تاس-ءتۇيىن ءازىر ەكەندىكتەرىن ءبىلدىردى. العاشقىلاردىڭ قاتارىندا كاسىپوداق مۇشەلەرى قىزۋ ءۇن قوستى. وبلىستىق كاسىپوداق كەڭەسىنىڭ توراعاسى ەرىك نۇراقاەۆ شۇعىل تۇردە ۇيلەستىرۋ كەڭەسىنىڭ وتىرىسىن وتكىزىپ, كەز كەلگەن كومەككە مۇقتاج وتباسىلارعا قارجىلىق, مورالدىق قولداۋ كورسەتۋدى ازاماتتىق پارىزى سانايتىندارىن ايتتى. وزگە دە تۇرعىندار بىركۇندىك جالاقىلارىن اۋدارۋمەن قاتار باسقا دا ماتەريالدىق جاعىنان قول ۇشىن بەرەتىندەرىن جەتكىزدى. سونىمەن قاتار ارنايى شتاب قۇرىلىپ, سالالىق, باستاۋىش كاسىپوداق ۇيىمدارىنا ۇندەۋ قابىلداندى. وندا قانداي قيىن جاعدايدا دا رۋحى بيىك, بىرلىگى مىقتى, دوستىققا ادال قازاقستاندىقتاردىڭ بىرگە بولاتىنى, كەز كەلگەن قيىندىقتى بىرلەسىپ كوتەرىپ الاتىنى ايتىلعان.
پوليتسيا دەپارتامەنتىنىڭ باسشىلىعى مەن جەكە قۇرامدارى دا ارىس قالاسى تۇرعىندارىنىڭ ايتىپ كەلمەگەن قايعىسىنا ورتاقتاسىپ, زارداپ شەككەندەرگە قاراجات جيناۋدى باستاپ كەتتى. مۇنداي باستاماشىلدىقتاردى باسقا دا دەپارتامەنت, ۆەدومستۆو ۇجىمدارى, كاسىپكەرلەر, جەكەلەگەن ادامدار قولداپ وتىر.
Nur Otan پارتياسى قالالىق ۇيىمى توراعاسىنىڭ ءبىرىنشى ورىنباسارى كەڭەس مۇقىشەۆ ءوڭىر باسشىسى قۇمار اقساقالوۆتىڭ تىكەلەي جەتەكشىلىگىمەن جەدەل شتاب ىسكە كىرىسىپ, گۋمانيتارلىق كومەك كورسەتۋ پۋنكتى قالالار مەن اۋدانداردا قۇرىلعانىن ايتتى. زارداپ شەككەندەرگە 100 تونناعا جۋىق ءدارى-دارمەك, ازىق-ت ۇلىك قورى, قۇرىلىس ماتەريالدارى جينالىپ جەتكىزىلەتىن بولادى. Jas Otan جاستار قاناتىنىڭ مۇشەلەرى دە ارىستىقتارعا ءبىر ميلليون تەڭگە اۋداردى.
قالماحانبەت مۇقامەتقالي – تالدىقورعاننان:
تالدىقورعاندا «جەتىسۋ ارىسپەن بىرگە!» دەگەن اتاۋمەن قايىرىمدىلىق اكتسياسى باستالدى. وبلىس ورتالىعىندا گۋمانيتارلىق كومەكتى قابىلداۋ پۋنكتى شامامەن ءبىر اي كولەمىندە تاڭعى ساعات 09:00-دەن كەشكى 21:00 ارالىعىندا جۇمىس ىستەمەك. قولداۋ اكتسياسىن ۇيىمداستىرۋشىلار الماتى وبلىسىنىڭ اتىنان ارىس قالاسىنا گۋمانيتارلىق كەرۋەن باراتىنىن مالىمدەدى. قازىر زارداپ شەككەن ارىستىقتارعا بەرىلەتىن ەڭ قاجەتتى زاتتاردىڭ ءتىزىمى دايىندالعان. ونىڭ قاتارىندا كونسەرۆىلەر, ءداندى داقىلدار, ماكارون ونىمدەرى, مينەرالدى سۋ جانە بالالارعا ارنالعان كيىمدەر مەن كورپەجاستىقتار بار.
سونداي-اق جەتىسۋلىق مەملەكەتتىك قىزمەتشىلەر باستاماشى بولىپ, ءبىر كۇندىك ەڭبەكاقىلارىن قوعامدىق قورعا اۋدارۋ باستالدى.
ال الماتى وبلىسىنىڭ اكىمدىگى ارىس قالاسىنان 150 بالانى جەتىسۋدىڭ ەمدەۋ-ساۋىقتىرۋ ورىندارىندا تەگىن دەمالۋعا شاقىراتىنىن مالىمدەدى.
