جابدىقتار جاڭارعان, جاعداي جاسالعان, ەندى تالاپ تا كۇشەيەدى
بەيسەنبى, 14 اقپان 2013 7:45
مەملەكەت باسشىسى نۇرسۇلتان نازارباەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا: «ءبىز قۇقىق قورعاۋ ورگاندارى مەن ارنايى قىزمەتتەردىڭ رەفورماسىن جالعاستىرۋعا ءتيىسپىز. ونسىز ءبىز تارتىپسىزدىككە مۇلدەم توزبەۋدى قالىپتاستىرۋ جانە جەمقورلىقتى تۇبىرىمەن جويۋ جونىندەگى مىندەتتەردى شەشە المايمىز. سوڭعى ءۇش جىلدا قۇقىق قورعاۋ ورگاندارى مەن ارنايى قىزمەتتەردىڭ بىرقاتار ماڭىزدى رەفورمالارى جۇرگىزىلدى. بۇل – مەملەكەتتىكتى نىعايتۋدىڭ ماڭىزدى قادامى», دەپ قاداپ ايتقانى بەلگىلى.
بەيسەنبى, 14 اقپان 2013 7:45
مەملەكەت باسشىسى نۇرسۇلتان نازارباەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا: «ءبىز قۇقىق قورعاۋ ورگاندارى مەن ارنايى قىزمەتتەردىڭ رەفورماسىن جالعاستىرۋعا ءتيىسپىز. ونسىز ءبىز تارتىپسىزدىككە مۇلدەم توزبەۋدى قالىپتاستىرۋ جانە جەمقورلىقتى تۇبىرىمەن جويۋ جونىندەگى مىندەتتەردى شەشە المايمىز. سوڭعى ءۇش جىلدا قۇقىق قورعاۋ ورگاندارى مەن ارنايى قىزمەتتەردىڭ بىرقاتار ماڭىزدى رەفورمالارى جۇرگىزىلدى. بۇل – مەملەكەتتىكتى نىعايتۋدىڭ ماڭىزدى قادامى», دەپ قاداپ ايتقانى بەلگىلى. وسىعان بايلانىستى قۇقىق قورعاۋ ورگاندارى جۇمىسىنىڭ قۇقىقتىق بازاسى جاقسارتىلدى. ولاردىڭ اتقاراتىن وزىندىك فۋنكتسيالارى ناقتى ايقىندالدى. قىزمەتتىڭ دە قايتالانۋى جويىلدى. قىلمىسقا قاتىستى ساياسات ىزگىلەندىرىلدى. ءسويتىپ, ءتارتىپ ودان ءارى جاقسارا ءتۇسسىن دەگەن نيەتپەن بارلىق قۇقىقتىق قۇرىلىمداردىڭ قىزمەتكەرلەرى تۇگەلدەي اتتەستاتتاۋدان وتكىزىلدى. 100 مىڭنان استام ادامنان 12,5 مىڭ ادام اتتەستاتتاۋدان وتپەي قالدى جانە ورگانداردان بوساتىلدى. الايدا, وسىنشاما وڭالتۋ جۇمىستارى بىرىنەن سوڭ ءبىرى جۇرگىزىلگەنمەن قۇقىق قورعاۋ ورگاندارىنىڭ جۇمىسىندا وڭ ناتيجە از.
سوندىقتان دا, مەملەكەت باسشىسى نۇرسۇلتان نازارباەۆ قۇقىق قورعاۋ ورگاندارىنىڭ وتكەن جىلعى جۇمىسىن قورىتىندىلاعان جانە «قازاقستان-2050» ستراتەگياسىن جۇزەگە اسىرۋ مىندەتتەرىنە ارنالعان كەڭەستە ەلىمىزدىڭ قۇقىق قورعاۋ ورگاندارىنىڭ قىزمەتىن قاتتى سىنعا الدى. باس پروكۋروردىڭ بايانداماسىنا ساي سول كەزدە تالاي بىلىقتىڭ كوزى اشىلىپ, كەيبىر ساقشىلاردىڭ حالىقتىڭ قۇقىن قورعاۋداعى شىنايى بەت-پەردەسى سىپىرىلدى. سول كەڭەستە ولاردىڭ ءتارتىبىن تەزگە سالۋ, جاڭاشا جۇمىس ىستەۋ كەرەكتىگى باسا ايتىلدى. مەملەكەت باسشىسى قۇقىق قورعاۋ جۇيەسىن جەتىلدىرۋ, قۇقىق ءتارتىبى مەن زاڭدىلىقتاردى بەكىتۋ بويىنشا بىرقاتار تاپسىرمالار بەرگەن بولاتىن. وسىعان وراي ەلباسىنىڭ قۇقىق قورعاۋ ورگاندارىنىڭ باسشىلىق قۇرامىمەن وتكىزگەن كەڭەستە ايتىلعان ناقتى تاپسىرماسىنا سايكەس كەشە پرەمەر-مينيستر سەرىك احمەتوۆ ىشكى ىستەر مينيسترلىگىنە كەلىپ, پوليتسيانىڭ وسى ورايدا اتقارىپ جاتقان جۇمىسىمەن تانىستى.
ساپتىق الاڭعا ءىىم كورسەتۋگە تۇرارلىق ءتۇرلى تەحنيكالارى شىعارىلىپ, ءتىزىلىپ قويىلىپتى. ولار وسىلايشا پوليتسيا قىلمىس اتاۋلىعا قارسى كۇرەستە ناقتى تويتارىس بەرە الۋى ءۇشىن بارلىق امالدى قاراستىرىپ جاتقاندىعىن, سوعان وراي قىلمىسكەرلەرمەن كۇرەسۋدەگى جاڭا تەحنيكالاردىڭ مۇمكىندىكتەرى زور ەكەنىن پاش ەتسە كەرەك. ۇكىمەت باسشىسى سەرىك احمەتوۆ اتالعان ۆەدومستۆونىڭ كريميناليستيكالىق قىزمەتىنىڭ عىلىمي-تەحنيكالىق جاراقتالۋىمەن, ونى دامىتۋعا ارنالعان جاڭا عىلىمي-تەحنيكالىق قۇرال-جابدىقتارمەن قامتاماسىز ەتىلۋىمەن تانىسىپ, ينجەنەرلىك-ساپەرلىك جانە بايلانىس كەشەندەرىنىڭ, جەدەل جوسپارلاۋ ورتالىعىنىڭ, شاعىن جىلدامدىق ولشەۋىشتەر مەن بورتتىق كومپيۋتەرلەرى بار اۆتوپاترۋلدەردىڭ جۇمىس جانە تەحنيكالىق جاعدايىن ءبىلدى. سونىمەن قاتار, ۇكىمەت باسشىسى جىلجىمالى كريميناليستيكالىق زەرتحانا ءىشىن ارالاپ كوردى. بۇل جەردە ۇكىمەت باسشىسىنىڭ نازارىنا قىلمىس جاسالعان ورىندى تەكسەرۋگە ارنالعان جورىقتىق شاتىرلار تۇرلەرى دە ۇسىنىلدى.
بۇدان كەيىن سەرىك احمەتوۆ جەدەل-كريميناليستيكالىق قىزمەتتىڭ گەنومدىق جانە فيزيكالىق-حيميالىق زەرتحاناداعى زاماناۋي قۇرالدار ءمۇمكىندىگىمەن تانىسىپ, بالليستيكالىق جانە تراسسولوگيالىق زەرتحانالار مەن كريميناليستيكالىق پوليگوندا بولدى. جالپى, وتكەن 2012 جىلى پوليتسيانىڭ كريميناليستيكالىق قىزمەتتى جۇزەگە اسىرۋ بويىنشا بىرقاتار قۇزىرەتى كەڭەيتىلگەنى ءمالىم. سوعان وراي ىشكى ىستەر ورگاندارىنىڭ كريميناليستەرى سالىستىرمالى تۇردە زەرتتەۋلەر ءوندىرىسى قۇقىعىنا يە بولعاندىقتان, ولار ەندى زاتتاي دالەلدەمەلەر تىزبەسىنە ەنگىزىلگەن قورىتىندىلار بەرە الادى. بۇل ءىىم الدىنا الدىن الا تەرگەۋ جانە جەدەل ىزدەستىرۋ ءىس-شارالارىن تەحنيكالىق-كريميناليستيكالىق قامتاماسىز ەتۋ دەڭگەيى مەن تيىمدىلىگىن ارتتىرۋ بويىنشا جاڭا مىندەتتەر قويادى.
ودان ءارى پرەمەر-مينيستر س.احمەتوۆ جەدەل-كريميناليستيكالىق قىزمەت قۇرامىنداعى گەنومدىق جانە فيزيكالىق-حيميالىق زەرتحانادا بولدى. بيولوگيالىق, گەنەتيكالىق زەرتتەۋلەر جۇرگىزەتىن زەرتحانا بيولوگيالىق تىزبە جانە دنك-نىڭ گەنەتيكالىق تالداۋلارىن جاساۋ بويىنشا كەشەندى اپپاراتتى قوسا ەسەپتەگەندە, سوڭعى ۇلگىدەگى جاڭا قۇرالدارمەن جابدىقتالعان. فيزيكالىق-حيميالىق زەرتحانا حيميالىق قۇرامدى سايكەستەندىرۋ جانە ۇلگىلەردى سالىستىرمالى زەرتتەۋ ءۇشىن ماتەريالدارعا كەشەندى تالداۋ جاساۋعا مۇمكىندىك بەرەدى.
پوليتسيانىڭ كريميناليستيكالىق بولىمشەلەرىن جاراقتاندىرۋ ءۇشىن بىلتىر وقيعا ورنىندا جۇمىس ىستەيتىن ءۇش ولشەمدىك ۇلگىسىندەگى كەشەندەر جانە ىزدەستىرۋ بالليستيكالىق كەشەندەرى الىندى. ودان باسقا, ءىىم-دە اۋماقتىق بولىمشەلەردەگى كريميناليستەردى وقىتۋ مەن بىلىكتىلىگىن ارتتىرۋ ءۇشىن ارنايى بازا, قازىرگى زامانعى كريميناليستيكالىق پوليگون, قاجەتتى كريميناليستيكالىق تەحنيكالار جانە ادىستەمەلىك قۇرالدارمەن قامتىلعان وقۋ سىنىپتارى قۇرىلدى.
بۇل ورايدا, ءىىم ىشكى اسكەرلەرىنىڭ باس قولباسشىسى رۋسلان جاقسىلىقوۆ بۇگىندە ىشكى ىستەر ورگاندارىنىڭ قىزمەتى ايتارلىقتاي جاقسارىپ, ۇكىمەت قولداۋىنىڭ ارقاسىندا جىل سايىن ىشكى اسكەردىڭ ماتەريالدىق-تەحنيكالىق بازاسى نىعايىپ كەلە جاتقاندىعىن ايتتى. ەلىمىزدىڭ قاۋىپسىزدىگى ءۇشىن قىزمەت ەتەتىن ءتيىستى بارلىق قۇرىلىمدار قاجەتىنشە جاراقتاندىرىلعان. سونىڭ ارقاسىندا كەيىنگى ارنايى جۇرگىزىلگەن وپەراتسيالاردىڭ بارلىعى شىعىنسىز وتۋدە. سەبەبى, ۇكىمەت باسشىسىنىڭ نازارىنا ۇسىنىلعانداي, اسكەري قىزمەتشىلەر ءوز مىندەتىن ساپالى ورىنداۋعا مۇمكىندىك بەرەتىن بۇكىل قاجەتتى جابدىقتارمەن قامتاماسىز ەتىلگەن. ەندەشە, ىشكى ىستەر مينيسترلىگىنىڭ جوعارىداعى كەڭەستە ايتىلعان بارلىق كەمشىلىكتەردى جويىپ, حالىققا تالاپقا ساي قىزمەت كورسەتە الۋىنا تولىق جاعداي جاسالعان دەۋگە نەگىز بار.
الەكساندر تاسبولاتوۆ,
«ەگەمەن قازاقستان».
