قامشىنىڭ سابىمەن ۇرماس بولار…
سارسەنبى, 13 اقپان 2013 7:19
سىبايلاس جەمقورلىقپەن كۇرەسۋ كەرەك. اسىرا سىلتەۋ كەرەك پە؟
وتكەن كۇزدىڭ قىركۇيەگىنەن باستاپ مەملەكەتتىك م ۇلىك جانە جەكەشەلەندىرۋ كوميتەتىنىڭ قوستاناي دەپارتامەنتىنە لاڭ كىردى. لاڭ بولعاندا ۇرىس-جانجال نەمەسە ۇجىم مۇشەلەرى اراسىنداعى پەندەشىلىكتىڭ شىلبىرىنا بايلانعان باسەكە ەمەس, «سىبايلاس جەمقورلىققا جاعداي تۋعىزدى» دەگەن اتتان ار-نامىسىن قالاي قورعاپ قالارىنا باسى قاتقان قىزمەتكەرلەردىڭ سارى ۋايىمى. بىراق, ولاردىڭ ارەكەتىنەن مەملەكەت بيۋدجەتىنە ءبىر تيىن زيان كەلگەن جوق ەدى. مەملەكەتتىك قىزمەتتىڭ اتىنا ۇيات كەلەردەي, تۇلعاسىن تومەندەتەردەي ادەپتەن دە اسقان جوق. ايتسە دە, سوندا بۇل ۋايىم قايدان كەلدى دەيسىز عوي؟
سارسەنبى, 13 اقپان 2013 7:19
سىبايلاس جەمقورلىقپەن كۇرەسۋ كەرەك. اسىرا سىلتەۋ كەرەك پە؟
وتكەن كۇزدىڭ قىركۇيەگىنەن باستاپ مەملەكەتتىك م ۇلىك جانە جەكەشەلەندىرۋ كوميتەتىنىڭ قوستاناي دەپارتامەنتىنە لاڭ كىردى. لاڭ بولعاندا ۇرىس-جانجال نەمەسە ۇجىم مۇشەلەرى اراسىنداعى پەندەشىلىكتىڭ شىلبىرىنا بايلانعان باسەكە ەمەس, «سىبايلاس جەمقورلىققا جاعداي تۋعىزدى» دەگەن اتتان ار-نامىسىن قالاي قورعاپ قالارىنا باسى قاتقان قىزمەتكەرلەردىڭ سارى ۋايىمى. بىراق, ولاردىڭ ارەكەتىنەن مەملەكەت بيۋدجەتىنە ءبىر تيىن زيان كەلگەن جوق ەدى. مەملەكەتتىك قىزمەتتىڭ اتىنا ۇيات كەلەردەي, تۇلعاسىن تومەندەتەردەي ادەپتەن دە اسقان جوق. ايتسە دە, سوندا بۇل ۋايىم قايدان كەلدى دەيسىز عوي؟
وبلىستىق پروكۋراتۋرانىڭ ماماندارى وتكەن جىلى جوسپارلى تەكسەرۋدەن كەيىن «سىبايلاس جەمقورلىققا قارسى كۇرەس تۋرالى» قازاقستان رەسپۋبليكاسى زاڭىنىڭ 12-بابى, 1-تارماعىنىڭ 4 جانە 5-تارماقشالارىنا سۇيەنىپ جاساعان اكتىسىندە ءمۇلىكتى باسقارۋ ءبولىمىنىڭ باس مامانى ساۋلە شوقانوۆا مەن قارجىلىق قامتاماسىز ەتۋ ءبولىمىنىڭ باس مامانى ايناش جۋاسپاەۆاعا «سىبايلاس جەمقورلىققا جاعداي تۋعىزدى» دەپ تۇجىرىپ, دەپارتامەنتتىڭ باستىعى شاراپيدەن تاجىباەۆقا ولاردى تارتىپتىك جاۋاپكەرشىلىككە شاقىرۋدى ۇسىندى. ال بۇل نىساناعا ىلىككەن ەكى باس ماماننىڭ «كىناسى» نە ەدى؟
ەكى باس ماماننىڭ, ودان قالدى دەپارتامەنت باستىعىنىڭ شاقشاداي باسىن شاراداي ەتكەن دەنيسوۆ اۋدانىنداعى ۇزىندىعى 0,36 شاقىرىم, سوناۋ وتكەن عاسىردىڭ 50-ءشى جىلدارى توسەلگەن, توزىعى جەتكەن تەمىر جول تۇيىعى مەن قوستاناي قالاسىنداعى «ەڭبەك» رمك بالانسىندا تۇرعان اۋماعى 218 شارشى مەتر ەسكى عيمارات بولاتىن. الگى تەمىر جول تۇيىعىن بىرنەشە جىل بويى «يمانوۆكا» جاۋاپكەرشىلىگى شەكتەۋلى سەرىكتەستىگى جالعا الىپ وتىرعان. ولاردان وزگە سۇراۋشى بولماعاندىقتان, شالعاي اۋدانداعى تەمىر جول تۇيىعىن پايدالانۋداعى ەركىن باسەكەنىڭ قاعيداتى بۇزىلعان جوق. 2011 جىلدىڭ 23 قاراشاسىندا اۋماعى 100 شارشى مەتردەن اساتىن عيماراتتار مەن قۇرىلىمداردى جالعا بەرۋدى تەندەرلىك نەگىزدە وتكىزۋ كەرەكتىگى جونىندە ۇكىمەتتىڭ قاۋلىسى شىقتى. ال سودان ءبىر جارىم ايدان اسا ۋاقىتتان كەيىن, ياعني 2012 جىلدىڭ 16 قاڭتارىندا «قوستاناي وبلىستىق اۆتوموبيل جولدارى» مەملەكەتتىك مەكەمەسىنىڭ بالانسىنداعى الگى تەمىر جول تۇيىعى تاعى دا «يمانوۆكا» جاۋاپكەرشىلىگى شەكتەۋلى سەرىكتەستىگىنە جالعا بەرىلەدى. بۇل جۇمىستىڭ ورىندالۋىن قوستاناي وبلىستىق مەملەكەتتىك م ۇلىك جانە جەكەشەلەندىرۋ دەپارتامەنتىنىڭ قارجىلىق قامتاماسىز ەتۋ ءبولىمىنىڭ باس مامانى ايناش جۋاسپاەۆا اتقارادى.
مەنى پروكۋراتۋرا تەمىر جول تۇيىعىن تەندەر ارقىلى جالعا بەرمەدىڭ دەپ كىنالايدى. راس, ۇكىمەت قاۋلىسى 2011 جىلدىڭ اياعىندا شىقتى. بىراق قاۋلىنى ءبىر ايدىڭ ىشىندە جۇزەگە اسىرا قويارلىقتاي مۇمكىندىك بولعان جوق. سەبەبى, 2012 جىل باستالىسىمەن ءبىزدىڭ مينيسترلىكتىڭ جەرگىلىكتى دەپارتامەنتتەرىن, اۋماقتىق بولىمشەلەرىن قايتا قۇرۋ ءجۇرىپ جاتتى. وسىعان بايلانىستى مەملەكەتتىك م ۇلىك جانە جەكەشەلەندىرۋ كوميتەتىندە قارجىلاندىرۋ ۇدەرىسى كەشىكتى. ەكىنشىدەن, جىلدىڭ باسى بولعاندىقتان بيۋدجەتكە قارجى ءتۇسىرۋ كەرەكتىگى جونىندە بىزگە كوميتەت تاراپىنان اۋىزشا نۇسقاۋ دا بولدى. ەڭ باستىسى, مەن باس مامان رەتىندە ءىستى اتقاردىم, تۇپكىلىكتى شەشىم قابىلداۋ مەنىڭ قۇزىرىما جاتپايدى, دەيدى ايناش جۋاسپاەۆا.
ەندى باس مامان ساۋلە شوقانوۆانىڭ «كىناسىن» بىلەيىك. ول 2012 جىلدىڭ 3 شىلدەسىندە «MAN» جاۋاپكەرشىلىگى شەكتەۋلى سەرىكتەستىگىنە قوستاناي قالاسىنداعى «ەڭبەك» رەسپۋبليكالىق مەملەكەتتىك كاسىپورنىنىڭ بالانسىنداعى ەسكى عيماراتتى جالعا بەرەدى. كەلىسىم-شارتتا ونىڭ تەندەر جەڭىمپازى انىقتالعانعا دەيىنگى مەرزىمگە بەرىلگەنى كورسەتىلدى. ساۋلە شوقانوۆا دا پروكۋراتۋرا تەكسەرىسىنەن كەيىن «سىبايلاس جەمقورلىققا جاعداي جاساعان» بولىپ شىقتى.
قوستاناي قالاسىنىڭ شەتىندە, «ەڭبەك-قوستاناي» رمك, ياعني ەڭبەكپەن تۇزەۋ مەكەمەسىنە قاراستى وندىرىستىك ەسكى عيماراتتىڭ ءىشىندە نە كاناليزاتسياسى, نە اۋىز سۋ قۇبىرى جوق, قاڭسىپ تۇرعاندىقتان ونى جالعا الۋدى كوپ جىلدار بويى ەشكىم سۇراعان ەمەس. نيەت ءبىلدىرۋشى تابىلعان سوڭ, مەملەكەتتىك م ۇلىك جانە جەكەشەلەندىرۋ كوميتەتىندەگىلەردىڭ «بيۋدجەتكە قارجى تۇسە بەرسىن, تەندەرگە دەيىن بەرە بەرىڭدەر» دەگەن اۋىزشا نۇسقاۋىنان كەيىن كەلىسىم-شارت جاساعانمىن. تەندەر ءوتكىزۋگە ول كەزدە قارجى بولعان جوق. مەن ءىستى اتقارۋشى عانامىن, تۇپكىلىكتى شەشىمدى شىعارۋ مەنىڭ قۇزىرىمدا ەمەس, دەيدى ساۋلە شوقانوۆا.
ۇكىمەت قاۋلىسى شىققاننان كەيىن وسى ەكى نىساندى تەندەر وتكىزبەي تۇرىپ جالعا بەرۋ تۋرالى شەشىم قابىلداعان دەپارتامەنت باستىعى شاراپيدەن تاجىباەۆ قاراماعىنداعى ەكى باس ماماندى وبلىستىق پروكۋروردىڭ ورىنباسارى د.سىزدىقوۆتىڭ ۇسىنىسىمەن «تارتىپتىك جاۋاپكەرشىلىككە» شاقىرا المايتىن ەدى. ويتكەنى, قازاقستان رەسپۋبليكاسىنىڭ مەملەكەتتىك اكىمشىلىك قىزمەتشىلەرىنە تارتىپتىك جازا قولدانۋ ەرەجەسى بويىنشا باس ماماندار شوقانوۆا مەن جۋاسپاەۆا س-و-5 ساناتىنا جاتادى. پروكۋراتۋرا ولاردىڭ ءىسىن «سىبايلاس جەمقورلىققا قارسى كۇرەس تۋرالى» زاڭنىڭ 12-بابى, 1-تارماعىنداعى 4- 5-تارماقشالارىنا سايكەستەندىردى, ياعني قوس باس مامان «شەشىمدەر ازىرلەۋ مەن قابىلداۋ كەزىندە زاڭدى جانە جەكە تۇلعالارعا زاڭسىز ارتىقشىلىقتار كورسەتكەن», «كىمگە بولسا دا تابىس الۋعا بايلانىستى كاسىپكەرلىك جانە وزگە دە قىزمەتتى جۇزەگە اسىرۋدا زاڭداردا كوزدەلمەگەن كەز كەلگەن جاردەم كورسەتكەن» بولىپ شىقتى. قازاقستان رەسپۋبليكاسى پرەزيدەنتىنىڭ 1999 جىلى 31 جەلتوقسانداعى قاۋلىسى بەكىتكەن مەملەكەتتىك قىزمەتشىلەردى اكىمشىلىك تارتىپكە شاقىرۋ ەرەجەسى بويىنشا س-و-5 ساناتىنا جاتاتىن مەملەكەتتىك قىزمەتشىلەر سىبايلاس جەمقورلىققا قارسى كۇرەس زاڭدىلىقتارىن بۇزعان جاعدايدا ولاردىڭ ماسەلەسى تەك مەملەكەتتىك قىزمەت ىستەرى اگەنتتىگىنىڭ وبلىستارداعى, استانا مەن الماتى قالالارىنداعى تارتىپتىك كەڭەستەرىندە عانا قارالادى. وسى زاڭناماعا سايكەس دەپارتامەنتتە باس ماماندار شوقانوۆا مەن جۋاسپاەۆانىڭ ءىسىن پروكۋراتۋرانىڭ ۇسىنىسى بويىنشا ءوزى قاراۋعا تاجىباەۆتىڭ قۇقى بولعان جوق, سوندىقتان ول ءىستى تارتىپتىك كەڭەسكە جىبەرۋگە ءماجبۇر بولدى. تارتىپتىك كەڭەس تە قازاقستان رەسپۋبليكاسى زاڭدارىن باسشىلىققا الاتىنى بەسەنەدەن بەلگىلى. «سىبايلاس جەمقورلىققا قارسى كۇرەس تۋرالى» زاڭنىڭ جوعارىدا ايتقان 12-بابى, 1-تارماعىنىڭ 4 جانە 5-تارماقشالارىنا سايكەستەندىرىلگەن پروكۋرور تۇجىرىمىنان كەيىن تارتىپتىك كەڭەس ۇسىنىسى بويىنشا شوقانوۆا مەن جۋاسپاەۆا جۇمىستان شىعارىلىپ, قايتادان مەملەكەتتىك قىزمەتتىڭ قاراسىن كورمەۋى ءتيىس. ال «سىبايلاس جەمقورلىققا جاعداي جاسادى» دەگەن اتتان قورعانۋ, ار-نامىس ودان دا كۇشتى. مىنە, ءوز ار-نامىسىن قورعاپ شىرىلداعان, جاس وتباسىندا ءبىرى ءبىر بالا, ەكىنشىسى ءۇش بالا تاربيەلەپ وتىرعان ەكى ايەل قالالىق سوتقا جۇگىندى. ءادىل سوت شوقانوۆا مەن جۋاسپاەۆانىڭ ارىز-تالابىن قاناعاتتاندىردى.
وبلىستىق پروكۋروردىڭ ورىنباسارى د.سىزدىقوۆ «سىبايلاس جەمقورلىققا جاعداي جاساعان» باس ماماندار ەمەس, وعان قورىتىندى قول قويعان دەپارتامەنتتىڭ باستىعى ەكەن عوي» دەگەندەي, وبلىستىق مەملەكەتتىك م ۇلىك جانە جەكەشەلەندىرۋ دەپارتامەنتىنىڭ باستىعى شاراپيدەن تاجىباەۆتىڭ ۇستىنەن تارتىپتىك ءىس قوزعاۋ جونىندە قاۋلى شىعاردى. زاڭدىلىقتى قاداعالاۋ ورگانى دەپارتامەنتتەگى زاڭنىڭ ورىندالۋ ۇدەرىسىن بۇزۋشىلىقتىڭ ءبىر فاكتىسىنە وسىلاي ەكى رەت ءىس قوزعاپ, شۋلاتىپ, «ءبىر تويدا ەكى جار جوقتىڭ» كەرىن كەلتىرەدى. تاجىباەۆ سوتقا جۇگىنگەنمەن, ونىڭ تالاپ-ارىزى قاناعاتتانعان جوق. ونىڭ ءىسى تارتىپتىك كەڭەسكە جىبەرىلدى. پروكۋراتۋرانىڭ تەمىر جول تۇيىعى مەن وندىرىستىك عيماراتتى تەندەرسىز بەردىڭ دەپ, ءىستى «سىبايلاس جەمقورلىققا قارسى كۇرەس تۋرالى» زاڭنىڭ 12-بابى, 1-تارماعىنداعى 4-5-تارماقشالارىنا سايكەستەندىرۋىن قاراپايىم تۇسىنىككە سالعان ادام دا قۇپتاماس ەدى. ءبىر نىسانعا تالاسار ەكى سۇرانىس بولماسا, جالعىز كاسىپكەر زورعا تابىلىپ تۇرعاندا مەملەكەتتىك قىزمەتكەر كىمگە قانداي «ارتىقشىلىق» جاساي قويۋى مۇمكىن؟ قوستاناي جۇمىس تا, قۇرىلىس تا, ءومىر دە قايناپ جاتاتىن استانا, الماتى سياقتى ءىرى ورتالىق ەمەس. جەرگىلىكتى جەردىڭ ەرەكشەلىگىن وبلىستىق پروكۋراتۋرا ماماندارى بىلمەيدى دەۋگە دە ادام سەنبەيدى. ال پروكۋراتۋرانىڭ «سىبايلاس جەمقورلىققا جاعداي جاسادى» دەپ جالاۋلاتۋىنا سەبەپ بولىپ وتىرعان تەمىر جول تۇيىعى ءتىپتى ايدالادا جاتىر.
«مەملەكەتتىك م ۇلىك تۋرالى» قازاقستان رەسپۋبليكاسى زاڭىنىڭ 6-بابىندا قوعام يگىلىگى مەن باسەكەنى دامىتۋدى قامتاماسىز ەتۋ ءۇشىن مەملەكەتتىك م ۇلىكتى بارىنشا ءتيىمدى پايدالانۋ كەرەكتىگى ايتىلعان. مەملەكەتتىك م ۇلىكتەردى جالعا بەرىپ وتىرعان دەپارتامەنت ماماندارى وسى زاڭدا ايتىلعان تالاپتاردى ءوز جۇمىسىنا ۇستانىم ەتىپ العان.
دەنيسوۆ اۋدانىنداعى تەمىر جول تۇيىعىن سول اتىراپتى كومىرمەن قامتاماسىز ەتىپ وتىرعان «يمانوۆكا» جاۋاپكەرشىلىگى شەكتەۋلى سەرىكتەستىگى 1998 جىلدان پايدالانىپ كەلەدى. ءبىز ونى 2010 جىلدان بەرى كەلىسىم-شارت بويىنشا جالعا بەرىپ كەلدىك, ول ءۇشىن جالعا الۋشى ايىنا 32 099,67 تەڭگە تولەپ وتىردى. ءبىز «يمانوۆكاعا» كەلىسىم-شارت بويىنشا تەمىر جول تۇيىعىن سوڭعى رەت جالعا بەرگەن ون شاقتى ايدىڭ ىشىندە مەملەكەت بيۋدجەتىنە 3 34 600 تەڭگە قارجى ءتۇستى. ەگەر بۇل نىساندى كاسىپكەرگە جالعا بەرۋدى جاڭا مەرزىمگە جالعاستىرماعانىمىزدا بيۋدجەتكە وسى قارجىنىڭ ءوزى تۇسپەس ەدى. تەمىر جول تۇيىعىن تەندەرگە قويۋ ءۇشىن 2012 جىلدىڭ 22 قازانىندا «يمانوۆكامەن» كەلىسىم-شارتتى بۇزدىق, دەيدى شاراپيدەن تاجىباەۆ.
شالعايداعى ەسكى تەمىر جول تۇيىعىن ءبىز جالعا العاننان ەشكىمگە زيان كەلگەن جوق ەدى. مەملەكەتكە سالىق, جالعا الۋ اقىسىن تولەپ تۇردىق. ءبىز ون بەس جىل بويى وسى تۇيىق ارقىلى اۋدان ورتالىعىن قوسقاندا ءتورت ەلدى مەكەنگە ەكىباستۇزدان كومىر جەتكىزىپ بەرەمىز. تۇيىق ەسكى بولعاندىقتان وعان جوندەۋ جۇمىستارىن جۇرگىزىپ تۇردىق. كەلىسىم-شارتتى بۇزعان دەپارتامەنتتە ءۇش ايدان بەرى جۇمىس توقتاپ تۇر. كومىردىڭ ەڭ سوڭعى تونناسىن اۋىل ادامدارىنا جەلتوقسان ايىندا ارتىپ بەردىك. قازىر بىزدە جۇمىس ىستەيتىن جەتى ادام بوس وتىر. كەلىسىم-شارت بۇزىلعالى تەمىر جول تۇيىعى قاراۋسىز قالعان. كەڭسەمىز وسى جەرگە جاقىن بولعاندىقتان ونى ءبىز كۇزەتىپ وتىرمىز. ايتپەسە, تەمىرىنەن تۇك قالدىرماي الىپ كەتەر ەدى, دەيدى «يمانوۆكا» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ءسالىمجان بۋحانوۆ.
دەپارتامەنتتىڭ باس مامانى ساۋلە شوقانوۆا تەندەر جەڭىمپازى انىقتالعانعا دەيىن جالعا بەرۋگە كەلىسىم-شارت جاساعان «MAN» جاۋاپكەرشىلىگى شەكتەۋلى سەرىكتەستىگى دە عيمارات ءۇشىن ايىنا 47 770,12 تەڭگە تولەپ تۇرعان. ولاردان كەلىسىم-شارتتى بۇزعانعا دەيىن بيۋدجەتكە 2 64 822 تەڭگە قارجى تۇسكەن. مەملەكەتتىك م ۇلىك جانە جەكەشەلەندىرۋ كوميتەتىنىڭ كەش قارجىلاندىرىلۋىنا حابارلاندىرۋ, مەملەكەتتىك ساتىپ الۋ جۇمىستارىنىڭ سوزىلۋىنا بايلانىستى تەندەر وتكەن جىلدىڭ قىركۇيەك جانە قاراشا ايلارى اراسىندا كەشىگىپ ءوتتى. «سىبايلاس جەمقورلىققا جاعداي جاساۋدىڭ «قۇرالىنا» اينالعان» ەكى نىسان دا تەندەرگە قويىلادى. بىراق تەندەر وتكەن جوق, سەبەبى, كاسىپكەرلەر مەن كاسىپورىندار تاراپىنان ولاردى الۋعا نيەت بىلدىرگەن جان بولمادى. ءتىپتى «MAN» جاۋاپكەرشىلىگى شەكتەۋلى سەرىكتەستىگى ىشىندە سۋى, قۇبىرى جوق قولايسىز ەسكى عيماراتتى تەندەر وتپەي تۇرىپ-اق تاستاپ كەتتى.
تەندەرگە قاتىسۋ مۇمكىن ەمەس. ويتكەنى, تەمىر جول تۇيىعىنىڭ جالعا الۋ باعاسىن ايىنا 1 ميلليون 200 مىڭ تەڭگە ەتىپ قويىپتى. ونىڭ جارتىسىنان كوبىن تەندەردىڭ الدىن الا تولەۋ كەرەك. ءوندىرىستى قالا ەمەس, اۋىلدى جەردە ونداي ميلليونداعان تەڭگە اقشانى قايدان الاسىڭ؟ قيسىن دا بولۋى كەرەك قوي. كومىر تاسۋ قازاننان ءساۋىر ايىنا دەيىن جالعاساتىن ناۋقاندىق جۇمىس. جەرگىلىكتى جەردىڭ جاعدايىنان حابارسىز وتىرىپ, قاعاز جۇزىندە تون ءپىشۋ وڭاي, دەيدى ءسالىمجان بۋحانوۆ. كاسىپكەردىڭ بۇلاي قىنجىلاتىنداي ءجونى بار. ويتكەنى, اتالعان دەپارتامەنت ماماندارى نىساندى تەندەرگە قويۋ ءۇشىن ونى بۇرىنعىداي جابدىق ەمەس, قۇرىلىم دەپ قاراپ, ونىڭ كولەمىن قايتا ەسەپتەگەندە وسىنداي باعا شىققان. ۇكىمەت قاۋلىسىنداعى ايتىلعان تالاپ بويىنشا ۇزىندىعى 360 مەتر عانا بولاتىن تەمىر جول تۇيىعى تەندەرگە قويۋعا جارامايدى. قىسىم وسىنداي شاراعا اپارعان.
ش.تاجىباەۆتىڭ ءىسىن قاراعان تارتىپتىك كەڭەس مۇشەلەرى دە بۇل ءىستىڭ قيسىنسىز ەكەنىن تۇسىنگەندەي ەدى. بىراق, جوعارىدا ايتقانىمىزداي, ولار دا زاڭ شەڭبەرىنەن شىقپادى. سوندىقتان, كوپ جىلداردان بەرى دەپارتامەنتتى باسقارىپ كەلە جاتقان تاجىريبەلى باسشى ش.تاجىباەۆتى لاۋازىمدىق قىزمەتىنەن بوساتۋعا ۇسىنىس جاسالدى. تاجىريبەلى دەمەكشى, قاڭتار ايىندا وبلىسقا داريعا نازارباەۆا باستاپ كەلگەن ءبىر توپ ءماجىلىس دەپۋتاتتارىمەن «نۇر وتان» حدپ وبلىستىق فيليالىندا كوررۋپتسياعا قارسى جۋرناليستىك پۋل مۇشەلەرىنىڭ كەزدەسۋىندە تارتىپتىك كەڭەس مۇشەسى تاتيانا شەرستوبيتوۆا سىبايلاس جەمقورلىقپەن كۇرەستە تىم قاتتى كەتەتىن, اسىرا سىلتەۋشىلىك تۇستاردىڭ جيىلەگەنىن ايتقان ەدى. وسى باسقوسۋدا وبلىس اكىمى نۇرالى سادۋاقاسوۆ تا مەملەكەتتىك ورگانداردان بىلىكتى مامانداردىڭ «ۇشىپ» كەتەتىنىن, لاۋازىم يەلەرىنىڭ جۇمىس بارىسىندا ەركىن شەشىم قابىلداۋعا جالتاقتىق تانىتۋى بەلەڭ الىپ كەلە جاتقانىن تىلگە تيەك ەتتى.
دەپارتامەنت باستىعى ش.تاجىباەۆ جانە ەكى باس مامان س.شوقانوۆا مەن ا.جۋاسپاەۆا «سىبايلاس جەمقورلىققا قولايلى جاعداي جاسادى» دەگەن اتتان وزدەرىن اراشالاپ الۋعا ارپالىسىپ جاتقاندا, رەسپۋبليكالىق مەملەكەتتىك م ۇلىك جانە جەكەشەلەندىرۋ كوميتەتىنىڭ توراعاسى ە.وتەپوۆتىڭ بارلىق دەپارتامەنتتەر مەن ولاردىڭ فيليالدارىنا جولداعان حاتى قوستاناي وبلىستىق دەپارتامەنتىنە دە كەلدى. وندا توراعا مەملەكەتتىك م ۇلىكتەردى ءتيىمدى پايدالانۋ جانە رەسپۋبليكا بيۋدجەتىنە قارجى ءتۇسىرۋ ماقساتىندا تەندەر جەڭىمپازى انىقتالعان مەرزىمگە دەيىن جىلجىمايتىن م ۇلىكتى جالعا الۋشىلارمەن كەلىسىم-شارت جاساۋعا بولاتىندىعىن ايتقان. سونىمەن قاتار, كوميتەت ەرەجەگە وزگەرىستەر مەن تولىقتىرۋلار ەنگىزەتىنىن, ونىڭ ىشىندە نىساندى ءبىر عانا ءوتىنىش بەرۋشىگە تەندەر جەڭىمپازى انىقتالعانشا جالعا بەرۋ, سونداي-اق جىلجىمايتىن م ۇلىكتى جالعىز پايدالانۋشىعا تەندەرسىز بەرۋ كەرەكتىگىن دە حابارلاعان. تاجىباەۆ ءوزىنىڭ ءىسى قارالعان تارتىپتىك كەڭەستە دە, سوتتا دا مۇنى ايتتى. بىراق قۇلاق اسقان جان بولمادى.
ايتپاقشى, وسى ماقالا دايىندالىپ جاتقاندا وبلىستىق سوت دەپارتامەنتتىڭ باس ماماندارى شوقانوۆا مەن جۋاسپاەۆانىڭ ءىسى بويىنشا وبلىستىق پروكۋراتۋرانىڭ اپپەلياتسيالىق شاعىمىن قاناعاتتاندىرماي, قالالىق سوتتىڭ شەشىمىن سول كۇيىندە قالدىردى. شەشىم قابىلداۋ قۇزىرىندا جوق, تەك اتقارۋشى عانا باس مامانداردىڭ وسىنشا سوڭىنا تۇسكەن وبلىستىق پروكۋراتۋرانىڭ «قىراعىلىعىن» قالاي تۇسىنۋگە بولادى؟ بۇرىن كەلىسىم-شارتپەن بيۋدجەتكە تيىن-تەبەن ءتۇسىرىپ وتىرعان الگى ەكى وندىرىستىك نىسان قاڭىراپ بوس قالدى, كاسىپكەردىڭ جۇمىسى توقتادى, ادامدار جۇمىسسىز قالدى, شالعاي اۋىلدارداعى اعايىن قىستىڭ كوزى قىراۋدا كومىر ىزدەپ ساندالدى, ار-نامىسىن قورعاعان مەملەكەتتىك قىزمەتشىلەر سەرگەلدەڭگە ءتۇستى. سوندا ۇتقان كىم؟ سىبايلاس جەمقورلىققا قارسى كۇرەستە «جوسپار قۋعان» وبلىستىق پروكۋراتۋرا ما؟
زاڭدى قولدانۋداعى بىرىڭعاي كەمشىلىكتەر مەملەكەتتىك قىزمەتشىلەردى وسىنداي سارساڭعا ءتۇسىرىپ وتىرعانىن جاسىرۋدىڭ قاجەتى جوق. ارينە, زاڭنىڭ الدىندا ءبارىمىز دە بىردەيمىز, وعان قۇرمەتىمىز دە كۇشتى. حالقىمىزدىڭ قازاقى تۇسىنىگىنە جۇگىنسەك, قارا قىلدى قاق جارعان بيلەر قولىنا بۇكتەپ ۇستاعان قامشى ادىلدىكتى تالاپ ەتۋدىڭ بەلگىسىندەي ەدى. ادىلدىك باردا تازالىق بار. بىراق قامشىلاماس بۇرىن, قاسيەتتى قامشىنى دا دۇرىس ۇستار بولار…
ءنازيرا جارىمبەتوۆا,
«ەگەمەن قازاقستان».
قوستاناي.
