«پەتروپاۆل قالاسىندا تۇراتىن سولتۇستىك قازاقستان وبلىسىنىڭ قۇرمەتتى ازاماتتارى جاقسىلىق ىسقاقوۆ پەن بولات ساعىندىقوۆ, سونداي-اق زەينوللا ولجاباەۆ, تاڭات سۇگىرباەۆ, امانگەلدى كەنجەعوزينوۆ, احمەتجان قۋانتاەۆ, جانگەلدى ءتاجين جانە ساعىندىق سالمۇرزين سىندى بەلسەندى اعالارىمىز ەلىمىزدەگى پرەزيدەنت سايلاۋى قارساڭىندا «Nur Otan» پارتياسىنان ۇسىنىلعان كانديدات قاسىم-جومارت توقاەۆتىڭ وبلىستىق قوعامدىق قابىلداۋ بولمەسى ارقىلى پارلامەنت ءماجىلىسىنىڭ دەپۋتاتى رەتىندە ماعان حات جولداپ, استانامىز نۇر-سۇلتان قالاسىندا كورنەكتى مەملەكەت جانە قوعام قايراتكەرى جۇمابەك تاشەنەۆكە ەسكەرتكىش ورناتۋعا كومەكتەسۋىمدى سۇراعان ەدى.
مەن وسى جونىندە نۇر-سۇلتان قالاسىنىڭ بۇرىنعى اكىمى باقىت سۇلتانوۆقا حات جازىپ, حالقىمىز ايرىقشا ارداق تۇتاتىن تاريحي تۇلعانىڭ دۇنيەگە كەلگەنىنە كەلەسى جىلى 105 جىل تولاتىندىعىن ەسكەرە وتىرىپ, وعان استانادا لايىقتى ەسكەرتكىش ورناتۋ ماسەلەسىن قاراۋىن وتىنگەن بولاتىنمىن.
بۇگىن استانا اكىمىنىڭ ورىنباسارى ەرلان كاناليموۆ قول قويعان رەسمي جاۋاپتى الىپ, قۋانىپ وتىرمىن. قالا اكىمدىگى جۇمابەك تاشەنەۆكە ەسكەرتكىش ورناتۋ ءۇشىن جەر تەلىمى جانە قارجى كوزى قاراستىرىلىپ جاتقاندىعىن حابارلاپتى»-دەپ جازدى كارىباي مۇسىرمان. ونىڭ سوزىنە قاراعاندا قايراتكەرگە ارنالعان ەسكەرتكىش نۇر-سۇلتان قالاسىنداعى جۇمابەك تاشەنەۆ كوشەسىنىڭ بويىندا ورناتىلادى ەكەن.
ال قازاق جەرىنىڭ بولشەكتەنۋىنە جول بەرمەگەن ساياساتكەرگە بىرنەشە جىل بۇرىن پەتروپاۆل قالاسىندا ەسكەرتكىش ورناتىلعان بولاتىن.
