شاراينا
سارسەنبى, 3 ءساۋىر 2013 2:15
ەرەكشە جاعدايعا كەلتىرىلدى
كەشە امەريكا قۇراما شتاتتارى وڭتۇستىك كورەيانىڭ وڭتۇستىك-باتىس جاعالاۋىنا ەسكادەريالىق مينا تاسىمالداۋشىلارىن ورنالاستىردى. بۇل جونىندە «فرانس-پرەسس» اقپارات اگەنتتىگى حابارلادى.
سارسەنبى, 3 ءساۋىر 2013 2:15
ەرەكشە جاعدايعا كەلتىرىلدى
كەشە امەريكا قۇراما شتاتتارى وڭتۇستىك كورەيانىڭ وڭتۇستىك-باتىس جاعالاۋىنا ەسكادەريالىق مينا تاسىمالداۋشىلارىن ورنالاستىردى. بۇل جونىندە «فرانس-پرەسس» اقپارات اگەنتتىگى حابارلادى.
كحدر مەملەكەتتىك بۇقارالىق اقپارات قۇرالدارىنىڭ جازۋىنا قاراعاندا, سولتۇستىك كورەيا بيلىگى تۇبەكتەگى جاعدايعا بايلانىستى ەلدىڭ قارۋلى كۇشتەرى ەرەكشە جاعدايعا كەلتىرىلگەن. ونىڭ ىشىندە 2007 جىلى «تۇمشالانعان» يونبەندەگى يادرولىق رەاكتورى دا قايتا ىسكە قوسىلۋى مۇمكىن. رەسمي سەۋل سولتۇستىككورەيالىقتاردىڭ بۇل ارەكەتىن ارانداتۋ دەپ باعالاپ, وعان قارسى جاۋاپ قايتارۋعا دايىن ەكەندىكتەرىن مالىمدەدى.
ەكى جىلدان سوڭ قايتاردى
بەلورۋسسيا مەملەكەتتىك قاۋىپسىزدىك كوميتەتى وپپوزيتسيونەر اناتولي لەبەدكوعا 10 مىڭ دوللاردى قايتاردى. «حارتيا 97» اگەنتتىگىنىڭ حابارلاۋىنشا, بۇل قارجى ودان وسىدان ەكى جىل بۇرىن «كامپەسكەلەنىپ» الىنعان ەكەن.
دەرەك كوزدەرىنە قاراعاندا, 2010 جىلى وتكەن پرەزيدەنتتىك سايلاۋدا, ونىڭ ناتيجەسىنە كوڭىلى تولماعان وپپوزيتسيونەرلەر ەرەۋىلگە شىققان. ونىڭ سوڭى تارتىپسىزدىكتەرگە ۇلاسقان. ال سول جىلدىڭ جەلتوقسانىندا ەلدىڭ ارنايى قىزمەت ورگاندارى ا.لەبەدكونىڭ پاتەرىنە ءتىنتۋ جۇرگىزگەن كورىنەدى. الگى 10 مىڭ دوللار سوندا تاركىلەنگەن ەكەن.
قورعايمىن دەپ سوققىعا جىعىلدى
كەشە قىرعىزستان جوعارعى سوتىندا ادۆوكات شامشيدين نيازاليەۆ سوققىعا جىعىلدى. بۇل جونىندە «فەرعانا» اقپارات اگەنتتىگى حابارلادى.
دەرەك كوزدەرىنە قاراعاندا, تەگى وزبەك بولىپ تابىلاتىن وعان سوت وتىرىسى بارىسىندا ونداعان ادام قوقان-لوقى كورسەتكەن. قاعازدارىن تارتىپ الىپ, جىرتىپ تاستاعان. وكىنىشتىسى, وعان ەشكىم اراشا تۇسپەگەن. شامشيدين نيازاليەۆ قىرعىزستانداعى وزبەك دياسپوراسىنىڭ قۇقىعىن قورعاۋشى بولىپ تابىلادى.
لوندونداعى زيراتقا جەرلەنەدى
رەسەيلىك كاسىپكەر بوريس بەرەزوۆسكي ۇلىبريتانياداعى گاننەرسبەري زيراتىنا جەرلەنەتىن بولدى. بۇل جونىندە كاسىپكەردىڭ جاقىن تۋىستارى حابارلاعان.
كەيبىر اقپارات قۇرالدارىنىڭ دەرەكتەرىنە قاراعاندا, بەرەزوۆسكيدىڭ تۋىستارى, ونىڭ ىشىندە اناسى بۇرىننان باتىستا تۇرىپ كەلەدى. گاننەسبەري زيراتىندا بەرەزوۆسكيدىڭ جاقىن دوسى الەكساندر پياتيگورسكي جەرلەنگەن ەكەن. بۇگىندە بوريس بەرەزوۆسكيدىڭ ولىمىنە بايلانىستى ءارتۇرلى پىكىرلەر ايتىلۋدا. دەرەكتەر ونىڭ اسىلىپ ولگەنىن, وعان قانداي دا ءبىر كۇش قولدانىلماعانىن العا تارتادى.
ەكى اپتادان كەيىن قايتا جالعاستى
كيپردىڭ قور بيرجاسى ەكى اپتالىق ۇزىلىستەن كەيىن جۇمىسىن قايتا جالعاستىردى. اقپاراتتار بويىنشا العاشقى مينوتتە نەبارى 0,16 ەۋروعا ءبىر عانا مامىلە جاسالعان.
كيپردىڭ قور بيرجاسى ونداعى بانكتەرمەن ءبىر كۇندە جابىلعان بولاتىن. ال بانكتەر وتكەن اپتانىڭ سوڭىندا قايتا اشىلعان ەدى. قارجىلىق قيىندىقتارعا بايلانىستى بۇل ەلدىڭ بانكوماتتارىنان كۇنىنە 300 ەۋرودان استام اقشا الۋعا بولمايدى. بۇل جاعداي وسى ايدىڭ ورتاسىنا دەيىن سوزىلاتىن سياقتى.
ەلشى قىزمەتىنە ۇسىندى
اقش پرەزيدەنتى باراك وباما ەلدىڭ بۇرىنعى پرەزيدەنتى دجون كەننەديدىڭ قىزى كەرولايندى اقش-تىڭ جاپونياداعى ەلشىسى قىزمەتىنە ۇسىندى. ول اقش-تىڭ جاپونياداعى ەلشىسى دجون رۋستى الماستىراتىن بولادى.
كەرولاين كەننەدي ادۆوكات جانە ول جازۋشى, كوپتەن بەرى كوممەرتسيالىق ۇيىمداردا جۇمىس ىستەپ كەلەدى. سونداي-اق, ول 2008 جىلعى پرەزيدەنتتىك سايلاۋدا باراك وبامانى قولداعان. ك.كەننەدي 1963 جىلى اتىپ ولتىرىلگەن دجون كەننەديدىڭ بىردەن-ءبىر مۇراگەرى بولىپ تابىلادى.
قىسقا قايىرىپ ايتقاندا:
*پولشادا قالىڭ قار ءتۇسۋى سالدارىنان 100 مىڭنان استام ادام ەلەكتر جارىعىنسىز قالدى.
* ۋكراينالىق وپپوزيتسيونەرلەر جوعارعى رادا عيماراتىنىڭ الدىندا شەرۋ وتكىزدى. تالابى – كيەۆ قالاسى مەرىنىڭ سايلاۋىن 2 ماۋسىمعا تاعايىنداۋ.
* وتكەن ناۋرىز سيرياداعى ەڭ قانتوگىستى اي دەپ تانىلدى. وسى ايدا 6 مىڭنان استام ادام مەرت بولعان.
*ۆەنەسۋەلا تۇرمەسىندەگىلەر ءتۇرلى-ءتۇستى مۋزىكامەن بەزەندىرىلگەن «تۇنگى كلۋب» اشىپتى. ونىڭ اشىلۋىنا سوتتالعانداردىڭ تۋىستارى قاتىسقان كورىنەدى.
ينتەرنەت ماتەريالدارى نەگىزىندە ازىرلەندى.
