وتىرىستا ۇلتتىق ەكونوميكا ءمينيسترى رۋسلان دالەنوۆ پەن قارجى ءمينيسترىنىڭ ءبىرىنشى ورىنباسارى بەرىك شولپانقۇلوۆ بيۋدجەتتىڭ كىرىس بولىگىن قالىپتاستىرۋ جانە ۇلعايتۋ جونىندەگى مەملەكەتتىك ورگانداردىڭ ۇسىنىستارى تۋرالى باياندادى. بيۋدجەت تۇسىمدەرىن ۇلعايتۋ جونىندە ۇسىنىلعان شارالاردىڭ ىشىنەن تۇسەتىن سالىقتاردى (جەڭىلدىكتەر مەن پرەفەرەنتسيالاردى) رەتتەۋ; شەتەلدىك كومپانيالاردىڭ كىرىستەرىن باقىلاۋ; سالىقتىق جانە كەدەندىك اكىمشىلەندىرۋدى جەتىلدىرۋ ماسەلەلەرى اتاپ ءوتىلدى.
سەنات توراعاسى بىرقاتار سىن-ەسكەرتپەلەر مەن ۇسىنىستار ايتتى. داريعا نازارباەۆا ءبىرىنشى كەزەكتە ەسەپ كوميتەتىن كۇشەيتۋ جانە ەكونوميكالىق تەرگەۋ قىزمەتىنىڭ تيىمدىلىگى ماسەلەسىنە وراي تالداۋ جاسالۋى كەرەك دەپ سانايدى.
د. نازارباەۆانىڭ پىكىرىنشە, سۋبسيديالار, جەڭىلدىكتەر مەن پرەفەرەنتسيالار ساياساتىنا دەگەن كوزقاراستى دا تۇبەگەيلى وزگەرتۋ كەرەك ءارى زاڭدى تۇردە بەكىتۋ قاجەت. سونداي-اق, سالىقتىق جانە كەدەندىك اكىمشىلەندىرۋدى اقپاراتتاندىرۋ تۋرالى دا ۇسىنىس ايتىلدى. «بارلىق مەملەكەتتىك ورگاندار, ازاماتتىق قىزمەتتەر جانە باسقالار قازىرگى زامانعى اقپاراتتىق جۇيەلەردى ەنگىزۋدىڭ ساپاسىنا, ولاردىڭ ۋاقىتىلى جانە ورتاق اقپاراتتىق جۇيەگە كىرىگۋىنە جەكەلەي جاۋاپتى بولۋى ءتيىس. ۋاقىتقا قاتاڭ شەكتەۋلەر مەن ورىندالماعانى ءۇشىن جاۋاپكەرشىلىك بەلگىلەۋ كەرەك», - دەدى سەنات باسشىسى.
د. نازارباەۆا سونداي-اق پروبلەمالىق ماسەلەلەرىنىڭ قاتارىندا حالىقتىڭ شامادان تىس نەسيە الۋىن, مەملەكەتتىڭ ەكونوميكاعا قاتىسۋىن اتاپ ءوتتى.
