كەڭەس مۇشەلەرى قازاقستان مەن مالايزيانىڭ ىسكەرلىك مۇمكىندىكتەرى تۋرالى ءوز تاجىريبەلەرىمەن ءبولىسىپ, بيزنەسكە قولداۋ كورسەتۋ, ينۆەستيتسيالاردى قورعاۋ جانە وتاندىق, شەتەلدىك كومپانيالار ءۇشىن تەڭ جاعدايلاردى قامتاماسىز ەتۋ ءۇشىن قارجى قۇرالدارىن جەتىلدىرۋگە باعىتتالعان قازاقستاننىڭ ساياساتىنا ەرەكشە نازار اۋداردى.
مالايزياداعى قازاقستان ەلشىسى بولتا يمانباەۆ ءىس-شارا قاتىسۋشىلارىن قارسى الا وتىرىپ كۋالا-لۋمپۋر قازاقستاننىڭ وڭتۇستىك شىعىس ازياداعى نەگىزگى ساۋدا ارىپتەسى ەكەنىن اتاپ ءوتتى. 2018 جىلدىڭ قورىتىندىسى بويىنشا, قوس مەملەكەت اراسىنداعى ساۋدا-ساتتىق 4 ەسە ءوسىپ, 500 ملن اقش دوللارى شاماسىن قۇراعان. سونداي-اق, قازىرگى تاڭدا, قازاقستاندا مالايزيالىق كومپانيالارمەن جانە ينۆەستورلارمەن بىرلەستىكتە مۇناي-گاز, اۋىلشارۋاشىلىق جانە قۇرىلىس سالالارىندا جالپى قۇنى 1 ملرد اقش دوللارىنا تەڭ جوبالار جۇزەگە اسىرىلىپ جاتقانى تۋرالى حاباردار ەتتى.
ب.يمانباەۆ قازاقستان تاراپى يسلامدىق قارجىلاندىرۋ, حالال يندۋستريا, ەلەكتروندىق كوممەرتسيا, تۋريزم, دەنساۋلىق ساقتاۋ, اقپاراتتىق قاۋىپسىزدىك ءتارىزدى باسىم باعىتتار بويىنشا ەكىجاقتى ارىپتەستىكتى نىعايتۋعا مۇددەلى ەكەندىگىن جەتكىزدى.
سونىمەن قاتار قمىك-ءنىڭ تەڭ توراعالارى داتۋك لۋ دجي مەن داتو بەرىكقازى سەكسەنباەۆ يسلامدىق قارجىلاندىرۋ, حالال يندۋستريا, ەلەكتروندى كوممەرتسيا, تۋريزم, دەنساۋلىق ساقتاۋ, اقپاراتتىق قاۋىپسىزدىك سياقتى پەرسپەكتيۆالى باعىتتار بويىنشا ەكىجاقتى ىنتىماقتاستىقتى تەرەڭدەتۋگە قىزىعۋشىلىق تانىتتى. ولاردىڭ پىكىرىنشە, ىسكەرلىك كەڭەس ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ كەشەندى سۇحبات جۇرگىزەتىن جانە ەكى ەلدىڭ ىسكەر توپتارى اراسىنداعى بايلانىستاردى جانداندىراتىن ءتيىمدى الاڭ بولىپ تابىلادى.
قمىك مۇشەلەرىنىڭ جۇمىس كەزدەسۋى اياقتالعاننان كەيىن ەكى ەلدىڭ ىسكەر توپتارى ينۆەستيتسيالىق جانە ساۋدا-ەكونوميكالىق ىقپالداستىقتى ودان ءارى نىعايتۋعا ۋاعدالاستى.
