ايماقتار • 13 ماۋسىم، 2019

كوشپەندىلەر الەمىنىڭ كورىنىستەرى

تابيعاتى عاجاپ الاتاۋدىڭ ەتەگىندەگى «بورالداي ساق قورعاندارى» ارحەولوگيالىق پاركىندە جىل سايىنعى « ۇلى دالا – كوشپەندىلەر الەمى» حالىقارالىق ەتنوفەستيۆالى وتۋدە. وعان الەمنىڭ 18 ەلىنەن 140-تان استام وكىل قاتىستى.

Egemen Qazaqstan

ەكى كۇن ىشىندە الماتى تۇرعىندارى مەن قوناقتارى ءبۇركىتشىلەردىڭ، شاباندوزداردىڭ، كوكپارشىلاردىڭ، ساداق اتۋشىلاردىڭ شەبەرلىكتەرىنە ءتانتى بولىپ، باتىرلاردىڭ جەكپە-جەگىن، جەلدەي ەسكەن ات ۇستىنەن تەڭگە ىلگەندەردىڭ ەپتىلىگىن، ۇلتتىق ويىنداردى تاماشالادى، ۇلتتىق اس مازىرىنەن ءدام تاتتى. « ۇلى دالا – كوشپەندىلەر الەمى» قازاقتار مەن تۇركى حالىقتارىنىڭ باي مۇراسىمەن كەڭىنەن تانىسۋعا مۇمكىندىك بەردى.

«فەستيۆالدا ءىرى ەتنومۋزىكانتتار مەن سپورتشىلار، ءبۇركىتشىلەر، قولدانبالى ونەر شەبەرلەرى وزدەرىنىڭ تالانتتارىن كورسەتتى. ەتنومادەنيەت فەستيۆالىنىڭ باستى ماقساتى – كوشپەلى حالىقتىڭ ەرتە تاريحىن جاڭعىرتۋ، وسكەلەڭ ۇرپاققا ءار ۇلتتىڭ ءوزارا ۇقساستىعىن ءتۇسىندىرۋ»، دەدى قالالىق مادەنيەت باسقارماسىنىڭ باسشىسى نۇرلان سىدىقوۆ.

شارا بارىسىندا قازاقستاننىڭ جەتى دۇركىن، الەمنىڭ ەكى دۇركىن چەمپيونى، گينەسستىڭ رەكوردتار كىتابىنا ەكى رەت ەنگەن سەرگەي تسىرۋلنيكوۆتىڭ باسقارۋىمەن الىپتار شوۋى بولدى. ولار كۇرەستى، شەگەنى قولدارىمەن قاقتى، تەمىردى مايىستىردى، گىر كوتەردى. بۇدان وزگە، اندروش بيرونىڭ باسقارۋىمەن ماجارستاننان كەلگەن قوناقتار اسكەري ات ويىندارىنا قاتىسىپ، بۋرياتتىق شامان ۆەليگتو بادماەۆ ىستىق تاستار ارقىلى كوز تيۋدەن قورعادى. باشقۇرتستاننان كەلگەن ساداقشىلار جاياۋ جانە ات ۇستىندە تۇرىپ «مەرگەن ۋكسى» مەرگەندىك ونەرلەرىن كورسەتتى. قىرعىزدىڭ «سالبۋرۋن» كومانداسى بۇركىتپەن جانە تازى يتپەن اڭ اۋلاۋ شەبەرلىگىن ۇسىندى.

الماتى قالاسىنىڭ اكىمى باۋىرجان بايبەك بورالداي قورعاندارى اۋماعىندا ساق مادەنيەتى ورتالىعى قۇرىلىسىنىڭ جوباسىمەن تانىستى. ونىڭ جوبالىق-سمەتالىق قۇجاتتارى جاسالىپ، مەملەكەتتىك ساراپتاماعا جىبەرىلگەن. قالا باسشىسى ءوزىنىڭ سوزىندە مۇنداي ورتالىقتىڭ پايدا بولۋى الماتىنىڭ تۋريستىك الەۋەتىن، ەل تاريحىنا دەگەن قىزىعۋشىلىقتى ارتتىراتىنىن، قۇندى ارحەولوگيالىق پاركتى قورعاۋعا، بولاشاق وسكەلەڭ ۇرپاق ءۇشىن تاريحي-مادەني مۇرا جاۋھارىن كوزدىڭ قاراشىعىنداي ساقتاۋعا مۇمكىندىك بەرەتىنىن ايتتى.

ەلباسىنىڭ « ۇلى دالانىڭ جەتى قىرى» باعدارلامالىق ماقالاسى اياسىندا الماتىدا رايىمبەك باتىردىڭ ماۆزولەيى رەكونسترۋكتسيالانباق. وسىناۋ كيەلى ورىندا مەموريالدىق مۋزەي كەشەنى اشىلادى. بۇلاردان وزگە، «ەتنولەند» ەتنومادەني كەشەنىن سالۋ جوسپارلانىپ وتىر.

فەستيۆال اياسىندا بىرقاتار زاماناۋي ۇلتتىق ونەر كورمەلەرى ۇيىمداستىرىلدى، «تۇران»، «حاسساك» ەتنو-فولكلورلىق انسامبلدەرى، ءتۇركيادان، موڭعوليادان، التاي مەن تىۆادان، چۋۆاشيا مەن قىرعىزستاننان جانە باسقا ەلدەردەن كەلگەن تانىمال ارتىستەر ءوز ونەرلەرىن كورسەتتى.

ساپارباي پارمانقۇل،

«Egemen Qazaqstan»