جالپى, مەملەكەتتىڭ تاۋەلسىز بولىپ, ونى ءوز ازاماتىڭ باسقارىپ, قوعامنىڭ بارلىق سالاسىندا, اتقارۋشى ورگانداردا ءوز قانداستارىڭ قىزمەت ەتىپ جۇرسە, مۇنى اللانىڭ بەرگەن نىعمەتى, باعا جەتپەس سىيى دەپ ۇققانىمىز ءجون. ەگەر ءبىز بۇل وراسان زور جەتىستىكتىڭ قادىرىنە جەتە الماساق, وندا موينىڭا وزگەنىڭ قىلبۇراۋى ءتۇسۋى مۇمكىن.
بۇگىندە جۇرتىمىز قوعامىمىزداعى تاتۋلىقتى ەڭ باستى قۇندىلىق سانايدى, ونى ورنىقتى دامۋدىڭ كەپىلى دەپ بىلەدى. بۇل ءوز كەزەگىندە حالقىمىزدىڭ كوڭىل كۇيىنىڭ جاقسى بولۋىنا وزىندىك ىقپالىن تيگىزىپ وتىر. دەگەنمەن, قوعام بولعان سوڭ ءارتۇرلى كەلەڭسىز كورىنىستەر بوي كورسەتپەي تۇرمايدى. مۇنداي جاعداياتتاردىڭ باسىم بولىگى شەشىمىن كۇتكەن بىرقاتار الەۋمەتتىك ماسەلەلەرگە قاتىستى ەكەنى بايقالادى. الايدا ولاردى جالپىۇلتتىق وتە كۇردەلى تۇيتكىل رەتىندە قاراستىرىپ, ءتۇڭىلۋ, ءسويتىپ ونى بيلىكتىڭ باستى ايىبى ساناۋ كوڭىلگە قونىمسىز. اركىم ءوزىنىڭ الەۋمەتتىك احۋالىن ءوزى شەشۋگە ۇمتىلۋى كەرەك. مۇنداي زاماندا ماسىلدىق پيعىلى جۇرە بەرمەيتىنىن ۇمىتپاعان ابزال.
تاۋەلسىزدىك جىلدارىندا مەملەكەتىمىز جاس ۇرپاقتى وتاندىق جانە شەتەلدىك جوعارى وقۋ ورىندارىندا تەگىن وقىتۋدا, حالىقتى باسپانامەن, جۇمىسپەن, تەگىن مەديتسينالىق جاردەممەن قامتۋدا, شاعىن جانە ورتا بيزنەستى, اۋىل شارۋاشىلىعى سالاسىن دامىتۋدا جانە باسقا دا اۋقىمدى شارالاردى جۇزەگە اسىرۋدا كوپتەگەن قولداۋ كورسەتتى. بۇعان جۇرتشىلىق كۋا. مەملەكەتتەن بەرىلەتىن مۇنداي كومەكتەر بارشاعا جاپپاي وڭدى-سولدى ۇلەستىرىلمەيتىنىن, ونىڭ بەلگىلەنگەن شارتتارى بولاتىنىن ەسكەرە سويلەسەك, ۇكىمەت تاراپىنان ناقتىلانعان تالاپتاردىڭ ۇدەسىنەن شىعا الماي, ءتيىستى كومەكتەردى الا الماعاندار مەن بەرىلگەن مۇمكىندىكتى ءوزىنىڭ قىرسىزدىعىنا بايلانىستى ورنىمەن پايدالانباي, شارۋاسى شاتقاياقتاعانداردىڭ كىنانى وزىنەن ەمەس, وزگەدەن ىزدەپ, اقىرىندا بيلىكتى جازعىرىپ شىعا كەلەتىنى بار...
ارامىزدا تۇيمەدەي نارسەنى تۇيەدەي ەتىپ كورسەتىپ, الەۋمەتتىك جەلىلەر ارقىلى كوپشىلىكتىڭ كوڭىل كۇيىن تۇسىرەر سوزدەر ايتىپ, ءوزىن اقيقاتشىل, حالىقشىل, شىندىقتى بەتكە ايتار ازامات رەتىندە تانىتۋعا تىرىساتىندار بارشىلىق. ولاردىڭ زەردەلەنبەگەن, ىشكى ءمانى ب ۇلىڭعىر اقپاراتتارى قاراپايىم حالىقتى ءارى-ءسارى كۇي كەشتىرىپ, تالايلاردىڭ «بۇرق-بۇرق» قايناۋىنا تۇرتكى بولۋدا. وسىنىڭ سالدارىنان سونداي بۇكىر پىكىرلەرگە يمانداي سەنەتىندەر ەل ىشىندە جاسالىپ جاتقان يگىلىكتى ىستەردى, شاراپاتتى باستامالاردى كورىپ تۇرسا دا بايقاماعانسىپ, وزەۋرەيدى. بۇل – قاۋىپتى ءۇردىس, ەلىمىزدەگى يگىلىكتى ىستەردى بۇركەمەلەۋدىڭ ايلاسى, حالىق پەن بيلىك اراسىندا قالىپتاسىپ كەلە جاتقان سەنىم مەن ءوزارا بايلانىسقا سوققى بەرۋدى ماقسات ەتكەن جاعىمسىز ارەكەت.
تاعى ءبىر ەرەكشەلەر ايتا كەتەر جايت, بۇگىندە جەكەلەگەن ازاماتتاردىڭ ءوزدەرىنىڭ الەۋمەتتىك جەكە ماسەلەلەرىن بۇكىل حالىقتىڭ باسىنا تۇسكەن ورتاق اۋىرتپاشىلىق رەتىندە كورسەتۋگە تىرىسۋ ءۇردىسى بايقالادى. بۇل بىزگە ابىروي اكەلمەيدى. ءومىر بولعان سوڭ كەيدە ءبىرەۋلەردىڭ تىرلىگى ونبەي, جۇمىسى جۇرمەي جاتادى. مۇنىسىن قاسىرەت كورىپ, وعان بۇكىل قوعامدى ايىپتى ساناپ, كۇستانالاپ, ءارتۇرلى جاعىمسىز پىكىرلەرگە ەرىك بەرىپ, بايبالام سالاتىندار ەل تىنىشتىعىنا كەرى ىقپالىن تيگىزىپ, قاراپايىم حالىقتى ارانداتىپ جۇرگەنىن ۇقسا دەيمىز.
