حINHUA اقپاراتتىق اگەنتتىگى قازاقستان ورتالىق سايلاۋ كوميسسياسىنىڭ الدىن الا قورىتىندىلارىنا ءسايكەس, قازىرگى ەل پرەزيدەنتى قاسىم-جومارت توقاەۆ سايلاۋدا 70,96 پايىز داۋىس جينادى, دەپ حابارلادى.
سونداي-اق «قازاقستاننىڭ جاڭادان سايلانعان پرەزيدەنتى قاسىم-جومارت توقاەۆ دۇيسەنبى كۇنى جۋرناليستەرمەن كەزدەسۋ كەزىندە ءوزىنىڭ يناۋگۋراتسياسى 12 ماۋسىمدا وتەتىنىن ايتتى. يناۋگۋراتسيادان كەيىن ەل پرەزيدەنتى بىشكەكتە وتەتىن شانحاي ىنتىماقتاستىق ۇيىمى سامميتىنە بارادى», دەپ جازدى.
سونىمەن قاتار اگەنتتىك سايلاۋدا قىتاي بايقاۋشىلارىنىڭ: «قازاقستانداعى پرەزيدەنت سايلاۋى حالىقارالىق ستاندارتتارعا ساي ۇيىمداستىرىلدى. بارلىق ۋچاسكەلەردە سايلاۋ بارىسى اشىق ءارى دەموكراتيالى تۇردە ءوتتى. ەشقانداي دا بۇرمالاۋشىلىق تىركەلگەن جوق», دەگەن ءسوزىن كەلتىرگەن.
TREND اقپاراتتىق اگەنتتىگى قازاقستاندا وتكەن كەزەكتەن تىس پرەزيدەنتتىك سايلاۋدىڭ باستالۋىنان باستاپ, سوڭعى ناتيجەسىنە دەيىن ەگجەي-تەگجەيلى جازدى. اگەنتتىك 2019 جىلعى 9 ماۋسىمدا وتكەن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنىڭ ناتيجەلەرى بويىنشا قاسىم-جومارت توقاەۆ 70,96 پايىز داۋىس جيناعانىن اتاپ كورسەتكەن.
سونىمەن قاتار اقپاراتتىق اگەنتتىك ازەربايجان رەسپۋبليكاسىنىڭ پرەزيدەنتى يلحام اليەۆتىڭ تەلەفون ارقىلى قاسىم-جومارت توقاەۆتى قۇتتىقتاعانىن اتاپ كورسەتتى. «ازەربايجان رەسپۋبليكاسىنىڭ پرەزيدەنتى يلحام اليەۆ قاسىم-جومارت توقاەۆتى قازاقستان رەسپۋبليكاسىنىڭ پرەزيدەنتى سايلاۋىنداعى ايقىن جەڭىسىمەن قۇتتىقتاپ, جوعارى مەملەكەتتىك قىزمەتىنە تابىس تىلەدى», دەلىنگەن اقپاراتتا.
سونداي-اق اگەنتتىك سايلاۋ اشىق ءارى قالىپتى جاعدايدا وتكەنىن حابارلادى. «قازاقستاندا وتكەن كەزەكتەن تىس پرەزيدەنتتىك سايلاۋ ەل زاڭىنا سايكەس جانە حالىقارالىق تارتىپكە ساي ءوتتى. پرەزيدەنتتىك سايلاۋعا بارلىعى 7 كانديدات قاتىستى. ۇمىتكەرلەر اراسىندا جالعىز ايەل ادام بولدى», دەپ جازدى.
تۇركيا اقپارات اگەنتتىكتەرى ەلىمىزدەگى سايلاۋ بارىسىنان اقپارات تاراتىپ, ءدۇيىم جۇرتتى حاباردار ەتىپ وتىردى. TAKVIM گازەتى سايلاۋ اشىق ءارى ءادىل وتكەنىن اتاپ كورسەتتى. سونىمەن بىرگە «قوعامدىق پىكىر» ينستيتۋتىنىڭ 325 سايلاۋ ۋچاسكەسىندە 13 200 سايلاۋشىعا ساۋالداما جۇرگىزگەنىن, ونىڭ ناتيجەسى بويىنشا قاسىم-جومارت توقاەۆتىڭ 70,96 پايىز جيناعانىن جازدى. سونىمەن قاتار باسقا ۇمىتكەرلەردىڭ ناتيجەسىمەن بولىسە وتىرا, قاسىم-جومارت توقاەۆتىڭ مانسابى تۋرالى قىسقاشا اقپارات بەرىپ ءوتتى.
تۇركيانىڭ بەدەلدى گازەتى «ەلدە العاش رەت ايەل ۇمىتكەر دانيا ەسپاەۆانىڭ دوداعا قاتىسۋى قازاقستانداعى گەندەرلىك ساياساتتىڭ جولعا قويىلعانىن, ايەل ادامنىڭ قوعامدا ويىن اشىق بىلدىرە الاتىنىن كورسەتتى», دەگەن ساراپشىلار پىكىرىن كەلتىرگەن. سونىمەن بىرگە دانيا ەسپاەۆانىڭ: «مەن قازاقستان ايەلدەرىنىڭ اتىنان, كاسىپكەرلەرىنىڭ اتىنان سايىسقا ءتۇسىپ وتىرمىن», دەگەن ءسوزىن دە جازدى.
MILLIYET گازەتى بولسا, پرەزيدەنتتىكتەن ۇمىتكەرلەرمەن, ولاردىڭ باعدارلامالارىمەن تانىستىرادى. ودان ءارى باسىلىم 9 274 110 ادام قاتىسقان سايلاۋدا Nur وtan پارتياسىنىڭ وكىلى قاسىم-جومارت توقاەۆتىڭ جەڭىسكە جەتكەنىن مالىمدەيدى. 10 حالىقارالىق ۇيىمنان جانە بىرنەشە مەملەكەتتەن بايقاۋشىلار باقىلاعانى, وپپوزيتسيالىق كانديدات ءامىرجان قوسانوۆ 16,23% پايىزبەن ەكىنشى ورىن العانى تۋرالى مالىمدەيدى.
تۇركى تىلدەس ەلدەر پارلامەنتتىك اسسامبلەياسىنىڭ بايقاۋشى كوميسسياسىنىڭ مۇشەسى, قىرعىزستان پارلامەنتىنىڭ دەپۋتاتى رىسكەلدى مومبەكوۆتىڭ وننان استام سايلاۋ ورتالىعىنا بارعانىن جانە سايلاۋدىڭ حالىقارالىق ستاندارتتارعا سايكەس تىنىش جانە بەيبىت جاعدايدا وتكىزىلگەنىن جازادى.
IRAN PRESS اقپارات اگەنتتىگى حالىقتىڭ 77,4%-ى قاتىسقان سايلاۋدا ۇمىتكەر ق.توقاەۆ 70,96%, ال وپپوزيتسيا وكىلى ءا.قوسانوۆتىڭ 16,23% داۋىس جيناعانىن حابارلادى. وپپوزيتسيا وكىلى ءا.قوسانوۆتىڭ ۇمىتكەرلەر قاتارىنان كورىنۋى شەتەلدىك باسىلىمدا ەرەكشە نازارعا الىنىپ, كەڭىنەن تالقىلاندى.
«19 ناۋرىزدا قازاقستاننىڭ تۇڭعىش پرەزيدەنتى نۇرسۇلتان نازارباەۆ وكىلەتتىگىن توقتاتتى. ودان كەيىن مەملەكەت باسىنا كەلگەن قاسىم-جومارت توقاەۆ كەزەكتەن تىس سايلاۋ بولاتىنىن مالىمدەدى. 7 ۇمىتكەر قاتىسقان سايلاۋدا ق.توقاەۆتىڭ جەڭەتىنىنە ەش كۇمان بولعان جوق», دەپ جازادى اتالعان اقپارات اگەنتتىگى. سونىمەن بىرگە شەتەلدىك اگەنتتىك سايلاۋعا حالىق بەلسەنە اتسالىسىپ, كوتەرىڭكى كوڭىل كۇيدە بولعانىن اتاپ كورسەتتى.
قازاقستاندا وتكەن پرەزيدەنت سايلاۋى تۋرالى حابارلار ەۋروپانىڭ ەڭ وقىلىمدى ءباسپاسوز بەتتەرىندە جارىق كوردى. سونىڭ ءبىرى فرانتسيانىڭ سالماقتى باسىلىمى Le Monde گازەتى قاسىم-جومارت توقاەۆتىڭ سايلاۋشىلاردىڭ 70 پايىزدان جوعارى داۋىسىنا يە بولىپ, جەڭىسكە جەتكەنىن جازدى. «ورتالىق ازيادا وزىندىك ورنى بار ەل – قازاقستانداعى كەزەكتەن تىس وتكىزىلگەن بۇل ساياسي ناۋقان ەلدىڭ دامۋ باعدارىنا جاڭا سەرپىن بەرەتىنى كۇمانسىز», دەيدى باسىلىم.
سونداي-اق گازەت سايلاۋشىلاردىڭ 77,4 پايىزى داۋىس بەرگەنىن جازىپ, باسقا كانديداتتاردىڭ دا قانشا داۋىس جيناعانىنا, ونىڭ ىشىندە كىمدەردىڭ كورسەتكىشى جوعارى بولعانىنا توقتالعان. مىسالى, قاسىم-جومارت توقاەۆتان كەيىن ەكىنشى ورىنعا تۇراقتاعان ءامىرجان قوسانوۆتىڭ 16,23 پايىز داۋىس جيناعانىن بولەك اتاپ, بۇل وسى ۋاقىتقا دەيىنگى ەل تاريحىندا وتكەن سايلاۋلاردا باستى كانديداتقا قارسىلاس بولعانداردىڭ اراسىنداعى ەڭ جوعارى ناتيجە ەكەنىن اتاعان.
رەسەي استاناسى ماسكەۋدىڭ باس باسىلىمى قازاقستانداعى سايلاۋ ناۋقانىنىڭ ءار جاڭالىعىن قالت جىبەرمەي, وقىرمان نازارىنا ۇسىنىپ وتىردى. وندا ورتالىق سايلاۋ كوميسسياسى جاريالاعان كانديداتتاردىڭ كورسەتكىشىن شىعارىپ, ەلدىڭ قازىرگى پرەزيدەنتى قاسىم-جومارت توقاەۆتىڭ ايقىن باسىمدىقپەن جەڭىسكە جەتكەنىن حابارلادى.
بۇعان قوسا, «ۆەچەرنيايا موسكۆا» گازەتى قازاقستانداعى سايلاۋعا قاتىستى ساراپشىلاردىڭ كوزقاراستارىن سۇراپ بىلگەن. ايتالىق, حالىقارالىق جاڭا مەملەكەتتەر ينستيتۋتىنىڭ ديرەكتورى الەكسەي مارتىنوۆ قازاقستاندا وتكەن پرەزيدەنت سايلاۋى ەلدىڭ الداعى دامۋ بارىسىن ايقىنداعان نۇكتەسى دەپ سانايدى. ونىڭ ايتۋىنشا, بۇل سايلاۋدىڭ ەرەكشەلىگى – ەلدىڭ تۇڭعىش پرەزيدەنتىنىڭ قاتىسۋىنسىز وتكەنى جانە وپپوزيتسيا وكىلىنىڭ بۇعان دەيىنگىلەردىڭ ىشىندە جوعارى پايىزعا يە بولعانى. ساياساتتانۋشى جاڭا مەملەكەت باسشىسى رەسەيمەن تاتۋ كورشىلىك قارىم-قاتىناستاردى جالعاستىرادى جانە دامىتا بەرەدى دەگەن پىكىرىن كەلتىرگەن. ويتكەنى قازاقستاننىڭ وركەندەۋىنە ىقپال ەتكەن نۇرسۇلتان نازارباەۆتىڭ جۇرگىزگەن ساليقالى ساياساتىن جالعاستىرۋ – الداعى ۋاقىتتا دا تۋرا جولعا باستاي بەرمەك.
