قازاقستان قوناقۇيىندە جۋرناليستەرمەن ءباسپاسوز ءماسليحاتىن وتكىزگەن پولشادان كەلگەن باقىلاۋشى ۆيولەتتا پوروۆسكانىڭ سوزىنشە, مەملەكەت تاريحىنداعى تاعدىرشەشتى وقيعا بارلىق تالاپتارعا ساي ءوتىپ جاتىر.
«قازاقستان سايلاۋعا جوعارى دەڭگەيدە دايىندالعان. حالىقارالىق باقىلاۋشىلاردىڭ جۇمىسىنا ەشقانداي شەكتەۋ قويىلعان جوق. ءبىز ءبىر-بىرىمىزبەن ەركىن پىكىر الماسىپ, بارلىق پروتسەستى باقىلاپ وتىردىق. مەن ءبىر ۋچاسكەدە 47-ءشى بايقاۋشى بولىپ قاتىستىم. بۇل دەگەنىڭىز سايلاۋدى كوپتەگەن ەلدىڭ بايقاۋشىلارى باقىلىپ وتىردى دەگەن ءسوز. سايلاۋ ءادىل ءارى اشىق ءوتىپ جاتىر دەپ ايتا الامىن. مۇمكىندىگى شەكتەۋلى ازاماتتاردىڭ تاريحي وقيعادان تىس قالماۋى ەسكەرىلگەنى قۋانتادى. مەن №4 اۋرۋحانادا جابىق ۋچاسكەدە بولدىم. ول جەردە جۇرە الاتىن ناۋقاستار ءوزى بارىپ ءۇنىن جەتكىزسە, توسەكتە جاتقان ناۋقاستاردىڭ كونستيتۋتسيالىق قۇقىعىن پايدالانۋعا دا مۇمكىندىك بەرىلدى», – دەيدى ۆيولەتتا پوروۆسكا.
رۋمىن ەلىنەن كەلگەن قوس بىردەي بايقاۋشى تريف رارەش پەن يۋركون جوناش فلوريش تە وسى پىكىرگە توقايلاستى. الماتىداعى 10 سايلاۋ ۋچاسكەسىنە بارىپ, پروتسەسستى ءوز كوزدەرىمەن باقىلاعان ساراپشىلار ازىرگە ەشقانداي زاڭبۇزۋشىلىق ارەكەتىن بايقاماعاندارىن جەتكىزدى.
«ماعان قازاقستانداعى سايلاۋ پروتسەسىن باقىلاۋ وتە قىزىق بولدى. سايلاۋعا جاستاردىڭ بەلسەندى قاتىسقانىن انىق بايقادىم. بۇل – جاس بۋىننىڭ ەل ەرتەڭىنە نەمقۇرايلى قارامايتىنىن اڭعارتسا كەرەك. تۇسكە دەيىن سايلاۋشىلاردىڭ 20 پروتسەنتى داۋىس بەرۋگە كەلدى. بۇل وتە جوعارى كورسەتكىش», دەيدى يۋركان جوناش فلوريش.
«ەشقانداي زاڭعا قايشى جاعدايدى بايقاعان جوقپىن. تەك ءبىر ايەل ازامات ءوزىن داۋىس بەرۋشىلەر تىزىمىنەن تاپپادى. ونداي جاعدايلار ءجيى بولىپ تۇرادى. سايلاۋشىلاردىڭ اراسىندا جاس ستۋدەنتتەردىڭ كەزەكتە تۇرعانىن باقىلادىق. بۇل – ازاماتتىق قوعامداعى دەموكراتيانىڭ سالتانات قۇرعانىن كورسەتەدى», دەدى حالىقارالىق ادام قۇقىقتارىن قورعاۋ ۇيىمىنىڭ كەڭەسشىسى رارەش تريف.
بۇل كۇنى قوعامنىڭ سان سالاسىندا ەڭبەك ەتىپ جۇرگەن تانىمال تۇلعالار مەن زيالى قاۋىم وكىلدەرى سايلاۋ ۋچاسكەلەرىنە كەلىپ ازاماتتىق بەلسەندىلىگىن تانىتقانىن ايتا كەتكەن ءجون. №40 مەكتەپتە ورنالاقان سايلاۋ ۋچاسكەسىنە وتباسىمەن كەلىپ تاڭداۋ جاساعان قالا اكىمى باۋىرجان بايبەك بولاشاعىمىزدى ايقىندايتىن ساتتە ەلىم دەگەن ءاربىر ازامات سايلاۋدان قالىس قالماۋ قاجەت دەيدى. بۇدان بولەك التىنبەك قورازباەۆ, روزا رىمباەۆا باستاعان تاعى باسقا دا ونەر مايتالماندارى بارشا قالا جۇرتشىلىعىن بەلسەندى بولۋعا شاقىردى.
تاعى ءبىر ايتا كەتەرلىگى قالاداعى بارلىق قوعامدىق كولىكتەر جولاۋشىلارعا تەگىن قىزمەت كورسەتۋدە.
ارمان وكتيابر,
عالىم سۇلەيمەن,
«Egemen Qazaqstan»
الماتى
