ماسەلەن, بىلتىر Damu Research ماركەتينگ جانە الەۋمەتتىك زەرتتەۋ اگەنتتىگى «اتامەكەن» ۇلتتىق كاسىپكەرلەر پالاتاسىنىڭ تاپسىرىسىمەن ەلىمىزدىڭ پارفيۋمەريا جانە كوسمەتيكا نارىعىنا تالداۋ جاساعان ەكەن. وسى مالىمەتكە سايكەس, تەك 2017 جىلى اتالمىش نارىقتىڭ اۋقىمى 222,1 ميلليارد تەڭگە قاراجاتتى قۇراعان. قازاقستاندىقتاردىڭ 80 پايىزى قالتاسىنا قاراي, باعاسى مەن ساپاسىنىڭ دەڭگەيى ءارتۇرلى كوسمەتيكالىق بۇيىمداردى ساتىپ الادى.
الايدا, وكىنىشكە قاراي, كوسمەتيكالىق بۇيىمدارعا دەگەن سۇرانىس ارتىپ كەلە جاتقانىنا قاراماستان, ءالى دە بۇل نارىقتا وتاندىق كومپانيالار ساۋساقپەن سانارلىق. اياقتارىنان تۇرىپ, بيزنەستەرىن دوڭگەلەتىپ اكەتۋگە الميساقتان كەلە جاتقان, جارناماسى جولعا قويىلعان تانىمال برەندتەر ءال بەرمەيدى.
دەگەنمەن, بۇل جەردە اتاپ وتەتىن تاعى ءبىر ۇلكەن ماسەلە بار. شەتەلدەردەن اكەلىنىپ جاتقان كوسمەتيكالىق بۇيىمداردىڭ ساپاسى, تاسىمالدانۋ بارىسىنداعى تەمپەراتۋرانىڭ ساقتالۋى, قۇرامى مەن تاعىسىن-تاعىلارعا كىم جاۋاپ بەرەدى؟ كۇماندى جاعدايلار جەتكىلىكتى. قارا بازارلاردى جاۋلاپ العان قىتاي مەن كورەيا كوسمەتيكالارىنىڭ كوپشىلىگى كونترافاكتىلىق تاۋارلار ەكەنىنە دە كوزدى جۇمىپ قاراۋعا بولمايدى.
وسى ورايدا تابيعي كوسمەتولوگيا تامىرشىسىنداي, تابيعي سۇلۋلىقتى دارىپتەپ, وتاندىق كوسمەتولوگيا سالاسىندا جيىرما جىلدان بەرى ۇزدىكسىز ىزدەنىپ, تاجىريبە بايىتقان بەلگىلى كوسمەتولوگ گۇلشاش ءاۋباكىرقىزىنىڭ جاڭا تاۋەكەلى قۇپتاۋعا دا, قولداۋعا دا تۇرارلىق.
سونىمەن الماتىدا كوپتەن كۇتكەن قازاقستاندا شىعارىلعان «AG cosmetics» ونىمدەرىنىڭ تۇساۋى كەسىلدى. حيميالىق قۇرامى وڭتۇستىگىمىزدە جاسالعان وتاندىق بەت كۇتىمىنە ارنالعان ونىمدەردىڭ تۇساۋكەسەر راسىمىنە كوسمەتولوگ گۇلشاش اۋباكىرقىزىنىڭ تۇراقتى كليەنتتەرى – تانىمال ونەر ادامدارى, بيزنەستەگى قىز-كەلىنشەكتەر مەن بەلگىلى جۋرناليستەر قاتىستى. وتاندىق كوسمەتيكانىڭ تۇساۋى كەسىلدى دەپ ايتۋعا وڭاي بولعانىمەن, ونىڭ جۇمىسى جەڭىل ەمەس.
قاراپ وتىرساق, ايماقتاردا سوڭعى جىلدارى وتاندىق كوسمەتيكالىق ونىمدەر شىعارىپ جۇرگەن كاسىپكەرلەر بار. الايدا ولاردىڭ بارلىعى دەرلىك ۇلكەن سۇرانىسقا يە بولىپ, نارىقتى قامتاماسىز ەتىپ وتىر دەپ ايتۋ قيىن. بىراق نارىقتى جاۋلاپ كەتە الماي وتىرعان بۇل قازاقستاندىق ونىمدەردىڭ ساپاسى جاقسى ەكەندىگىن مويىنداۋ كەرەك. ويتكەنى ساقتاۋ مەرزىمى شەكتەۋلى, قۇرامى باقىلاۋعا الىنعان, از, شاقتاۋلى مولشەردە شىعارىلادى. ايتپەسە, «تۋعان جەردىڭ توپىراعى دا ەم» دەگەن ءسوز قايدان شىعادى.
– قازاقستاندا ساپاسى جوعارى وتاندىق كوسمەتيكا ونىمدەرىن دايىنداۋدى وتە كوپ جىلدار بويى ارمانداپ كەلدىم. ءبىز كوبىنەسە شەتەلدىك قىمبات كوسمەتيكا ونىمدەرىن تۇتىنامىز. ونىڭ ساپاسىنا, قۇرامىندا نە بار ەكەنىنە ەشكىم كەپىلدىك بەرمەيدى. كەيدە قىمبات برەندتەردىڭ ءوزى دە كۇتكەنىمىزدەي بولمايدى. ويتكەنى ءبىز ونىڭ دارداي اتىنا اقشا تولەيمىز. ال ارزانقول كوسمەتيكا بۇيىمدارىنىڭ قۇرامىندا ءتيىمدى اسەر بەرەتىن كومپونەنتتەرى تۇگەل ەمەس. ونىڭ ۇستىنە قازىر ەلىمىزگە كورشى ەلدەردەن اعىلىپ كەلىپ جاتقان يمپورتتىق كوسمەتيكا ونىمدەرىندە ەسەپ جوق. ونىڭ كوپشىلىگى قاي ۋاقىتتا ءوندىرىلگەنى, ءتىپتى ەلىمىزگە قالاي جەتكىزىلگەنى, قالاي ساقتالعانى بەلگىسىز. كوپ جاعدايدا شەتەلدىك بەتتى اعارتاتىن كرەمدەردىڭ قۇرامىندا قورعاسىن بولادى. ول بەتتى اعارتقانىمەن, زيانىن دا جوققا شىعارماۋ كەرەك. تىزە بەرسەڭ, ساپاسىز كوسمەتيكالاردىڭ اسەرىنەن كەرىسىنشە تەرى اۋرۋلارىنا دۋشار بولىپ قالاتىن جاعدايلار ءجيى كەزدەسەدى, – دەيدى گۇلشاش.
– وتاندىق ساپالى كوسمەتيكا شىعارۋ جولىندا وتە ۇزاق ىزدەندىم جانە وعان ۇلكەن دايىندىقپەن كەلدىم دەپ ويلايمىن. بۇل كوسمەتيكانىڭ قۇرامى مەن اسەرى جونىندە شىمكەنتتىك عالىمدار وتە كوپ ۋاقىت لابوراتوريالىق سىناقتار جۇرگىزىپ, ناتيجەلەرىن زەرتتەگەن. تەرىگە اسەرى ءتيىمدى ەكەندىگىنە كوز جەتكىزىلگەن. ەڭ باستىسى, كوسمەتيكا قۇرامىنداعى انتيوكسيدانتتار مەن گيالۋرون سياقتى تەرىنى جاسارتاتىن, ءنارلەندىرەتىن تابيعي زاتتاردىڭ بار بولۋىنا ءارى ساپالى بولۋىنا باقىلاۋ جۇرگىزىلەدى. ماسەلەن, قازىر نارىقتا جارناماسى ءجۇرىپ تۇرعان كوسمەتيكالار جەتكىلىكتى. بىراق ولاردىڭ قۇتىسىنداعى جازۋلارىندا بار كوللاگەن, گيالۋرون قىشقىلى جانە ءتۇرلى دارۋمەندەر جوقتىڭ قاسىنداي دەۋگە بولادى. ويتكەنى مۇنداي ساپالى ينگرەديەنتتەردىڭ ەشقايسىسى دا ارزان تۇرمايدى. ونىڭ ءوندىرۋ تەحنولوگياسى دا كۇردەلى.
– مىنە, كاسىبي دەڭگەيدەگى بەت, تەرى كۇتىمىنە ارنالعان ءوز تاۋارلارىمىز قولىمىزعا تيگەن كۇنگە دە جەتتىك. باستاپقىدا 12 ءتۇرلى كوسمەتيكالىق ءونىمدى شىعارساق, كاسىبي دەڭگەيدەگى ءبىر عانا جەلىمەن شىعاتىن ءونىمدەرىمىزدىڭ تۇرلەرى 15-تەن استى. سۇلۋلىق ىشتەن, ىشكى اعزالاردىڭ تازالىعىنان باستالادى. قازىر قولتىقتىڭ, اياقتىڭ ءيىسىن كەتىرەتىن ەمدىك كوسمەتيكالاردى شىعارۋدى قولعا الدىق. ەڭ باستىسى, ءبىزدىڭ كوسمەتيكامىزدىڭ قۇرامىندا نە جازىلعان, ىشىندە دە سول بولادى. سوندىقتان دا ىشىندە انىق قانداي قوسپاسى بار ەكەنىنە كوزىمىز جەتەتىن, ءوزىمىز ساپاسىن باقىلايتىن قازاقستاندىق بەت كۇتىمىنە ارنالعان كرەمدەردى شىعارۋدى كوكسەپ كەلدىم. ارينە وتاندىق ونىمدەر شىعارۋدىڭ دا ءوز ماشاقاتى مەن قيىندىقتارى بار. دەگەنمەن مەنىڭ كوسمەتولوگيا سالاسىنداعى 20 جىلدىق تاجىريبەم ارمانىما جەتۋگە جول اشىپ بەردى, – دەيدى گۇلشاش اۋباكىرقىزى.
سونىمەن قاتار بيىل گۇلشاش رەسپۋبليكامىزدىڭ الىس ايماقتارىنا ءوزىنىڭ «Gulshash» فرانشيزاسىن بەردى. بۇگىندە الماتى, نۇر-سۇلتان, شىمكەنت, اتىراۋ قالالارىندا «Gulshash» ءسان سالونىنىڭ بولىمشەلەرى بار.
– ءبىزدىڭ قىز-كەلىنشەكتەردىڭ ءبارى ادەمى. تەك كۇندەلىكتى كۇيبەڭ تىرشىلىكپەن بەت كۇتىمىنە ءمان بەرە بەرمەيدى. بەت دەگەن كۇتىمدى ەرەكشە قاجەت ەتەدى. ويتكەنى قىسقى ايازدا دا, كۇننىڭ اپتاپ ىستىعىندا دا, جەل مەن شاڭ-توزاڭنان دا بەتىڭىزدى كولەگەيلەپ جۇرە المايسىز. سوندىقتان بەتكە ارنايى ۋاقىت ءبولىپ, وعان كۇتىم جاساپ وتىرۋ كەرەك. بەت – ادامنىڭ ايناسى ىسپەتتى. ىشكى جان دۇنيەڭىز, كوڭىل كۇيىڭىز, ءتىپتى ءتانىڭىزدىڭ ساۋلىعىنىڭ ءوزىن بەتىڭىزگە قاراپ بىلۋگە بولادى ەكەن. ءوز ەلىمىزدە وتاندىق ءونىم شىعارۋ تۋرالى كوپتەگەن جىلدار بويى ارمانداعان ەدىم. بۇل جولدا ۇزاق ىزدەندىم. مەنىڭ كۇتكەن ناتيجەم دە بىردەن بولا قويعان جوق. سوعان قاراماستان, ۇزاق جىلعى ىزدەنىس تابىستى بولىپ, ءوزىمنىڭ ارمانىما اينالعان كوسمەتيكالىق ونىمدەرگە قول جەتكىزىپ وتىرمىن, – دەگەن گۇلشاش قىز-كەلىنشەكتەردىڭ بەتىن اعارتاتىن يمپورتتىق ءونىمدەردىڭ كوپشىلىگىنىڭ قۇرامىندا اعزاعا اسا زياندى قورعاسىننىڭ بولاتىنىن ايتادى.
قازىر قىز-كەلىنشەكتەر سۇلۋ كورىنۋ ءۇشىن پىشاققا ءتۇسىپ, بوتەكس سياقتى ادىستەرمەن بەتىنىڭ جانىن كەتىرىپ, قاباعىن كەسكىزىپ, ءبارىنە بارادى. ءتىپتى ساپاسىز پلاستيكالىق وپەراتسيالاردان ءولىپ كەتەتىندەر بار. مىنە, وسىنىڭ ءبارى اقشا تابۋدىڭ كەسىرىنەن بولىپ جاتىر. قانشاما ايەل ءوزىنىڭ تابيعي تۇرىنەن ايىرىلىپ, ايناعا قاراۋعا جۇرەگى داۋالامايتىن جاعدايلار ورىن الۋدا.
«بەتكە ءاجىم تۇسىرمەۋ دە قىز-كەلىنشەكتەر ءۇشىن ماڭگىلىك ماسەلە بولىپ قالا بەرەدى. ءبىز قازىر قاباقتى كوتەرۋ, سالبىراعان ۇرتتى كەتىرۋ, كوز اينالاسىنداعى اجىمدەردى نۇكتەلەرگە اسەر ەتە وتىرىپ جازۋ ءادىسىن قولدانىپ ءجۇرمىز. كوبىنە ەمدىك شوپتەر, بالدىڭ تۇرلەرىن پايدالانامىز.
كاسىبىمدى سۇيگەنىم بولار. ايتپەسە وسى جيىرما جىلدا ءبىزدىڭ الماتىدا نەبىر كەرەمەت سۇلۋلىق سالوندارى اشىلدى. دوللارلاپ اقشا تاستايتىن قىمبات كوسمەتولوگتار بار. بىراق قازاقتىڭ ءبىرتۋار تالانتتى قىزدارى مەن تانىمال ادامدارى – مەنىڭ تۇراقتى كليەنتتەرىم. مۇنىڭ ءبارى مەنىڭ ءوز قىزمەتىمە دەگەن ادالدىعىم دەپ ويلايمىن», – دەيدى «AG cosmetics» ونىمدەرىنىڭ يەسى گۇلشاش.
ايتقانداي وتاندىق ءونىمدەردىڭ تۇساۋىن ەكى بىردەي حالىق ءارتىسى, ەكى ەلدىڭ روزاسى كەستى. وسىلايشا وتاندىق شاراعا بىشكەكتەن ارنايى كەلگەن گۇلشاشتىڭ بايىرعى دوسى قىرعىزستاننىڭ حالىق ءارتىسى روزا امانوۆا مەن قازاقستاننىڭ حالىق ءارتىسى روزا رىمباەۆا باستاعان تانىمال تۇلعالار ورتاقتاستى.
وسى سالتاناتتى وقيعاعا ارنايى كەلگەن قازاقستاننىڭ حالىق ءارتىسى روزا رىمباەۆا: «ءبىر-ءبىرىمىزدى قولداماساق, وتاندىق ونىمدەرىمىزدى تۇتىنباساق, كىم ءبىزدى قولدايدى؟! گۇلشاشتىڭ وتاندىق ءوندىرىس اشىپ جاتقانى ۇلكەن ەڭبەك. بۇل كەز كەلگەننىڭ قولىنان كەلمەيدى. مەن وسىنداي باۋىرلارىمىزدىڭ ەڭبەگىنە, جەتىستىگىنە قۋانامىن. ءبىز تەك قانا ەت پەن ۇن ءوندىرىپ قويماي, وزىمىزگە قاجەت تاۋارلاردىڭ ءبارىن شىعارۋىمىز كەرەك. ارقايسىمىز ءوز ونىمدەرىمىزدىڭ تۇتىنۋشىسى بولۋعا ءتيىسپىز. سوندا ەلىمىز داميدى. مەنى شەتەلدىڭ قىمبات كوسمەتيكالارىن پايدالانادى دەپ ويلايتىن بولارسىزدار, ول قاتە پىكىر. ۇستىمدەگى كيىمدەردىڭ بارلىعى قازاقستاندا تىگىلگەن. جازعى دەمالىسىمدى الاكولدە وتكىزەمىن. ەندى مىنە, ەلىمىزدە جاسالىپ جاتقان كوسمەتيكانى قولدانۋعا دايىنمىن. گەرمانيا ماشينا شىعارادى, نەمىستەر مىندەتتى تۇردە ءبىرىنشى كەزەكتە ءوز كولىكتەرىن مىنەدى. سول سياقتى ءبىز دە ءوز وندىرۋشىلەرىمىزدى قولداپ, ەلىمىزدە وندىرىلگەن بۇيىمداردى تۇتىنايىق», – دەپ تىلەكتەستىگىن ءبىلدىردى.
گۇلشاش زامانداسىمىز باق وكىلدەرىنە بەرگەن سۇحباتىندا: «ادامنىڭ دەنساۋلىعى مەن كەلبەتىنە قاتىستى كاسىپپەن اينالىساتىندار ءبىرىنشى كەزەككە ساپانى قويۋ كەرەك. قاۋىپسىز بولۋىنا جاۋاپتى بولۋى ءتيىس. قازىر كوبى كوسمەتولوگيا سالاسىن جىلدام بايتىن بيزنەس دەپ ويلايدى. مۇلدە ولاي ەمەس. ادالدىققا قۇرىلعان كاسىپ قانا مۇرالى بولادى», دەپ ءسوزىن ءتۇيىپ, بيزنەس جولىندا وسى قاعيدادان اينىمايتىندىعىن جەتكىزدى.
