قالاداعى العاشقى iQala قالالىق قىزمەتتەر ورتالىعى نۇر-سۇلتان اكىمدىگىنىڭ باستاماسىمەن قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قولداۋىمەن «استانا – ادالدىق الاڭى» جوباسىنىڭ اياسىندا قۇرىلدى. باستامانى «Astana» اكك» اق جۇزەگە اسىرىپ وتىر.
ورتالىقتىڭ اشىلۋ سالتاناتىنا كەلگەن قالا اكىمى باقىت سۇلتانوۆ پەن اگەنتتىك باسشىسى اليك شپەكباەۆ جاڭا ورتالىقتىڭ تەحنيكالىق مۇمكىندىكتەرىمەن تانىسىپ, تۇرعىنداردىڭ بارلىق ساناتتارىنا قولايلى ءارى جايلى بولاتىن جاعدايلاردى باعالادى.
«استانا – ادالدىق الاڭى» جوباسىنىڭ اياسىندا جەمقورلىقتىڭ الدىن الۋ ماقساتىندا تاعى ءبىر مەكەمە قۇرىلىپ وتىر. مۇندا قالا تۇرعىندارىنا «ءبىر تەرەزە» قاعيداتى بويىنشا ءتۇرلى قىزمەتتەر كورسەتىلەتىن بولادى. بۇل ورتالىقتىڭ IQala دەپ اتالۋى ينتەللەكتۋالدىلىعىن بىلدىرەدى. ەندىگى «ءبىر تەرەزە» قاعيداتىمەن شەكتەلىپ قالماي مەملەكەتتىك قىزمەتتىڭ ساپاسىن ارتتىرۋ بويىنشا ءتيىستى جۇمىستار اتقارىلادى. بۇل بايلانىستاردى بارىنشا ازايتۋدى, ءتۇرلى قىزمەتتەردى, كونسۋلتاتسيالار مەن رۇقساتتاردى الۋدى بارىنشا جەدەلدەتۋدى كوزدەيتىن وزدىگىنەن داميتىن زياتكەرلىك جۇيە بولادى. مۇنداي جۇيەلەر كاسىپكەرلەرگە ءوز شىعىندارىن تومەندەتۋگە مۇمكىندىك بەرەدى, بۇل باعاعا, تاريفتەرگە جانە جوبالاردىڭ سوڭعى قۇنىنا اسەر ەتەدى», – دەدى قالا باسشىسى باقىت سۇلتانوۆ.
«استانا – ادالدىق الاڭى» جوباسى 2018 جىلى ساۋلەت, قالا قۇرىلىسى جانە جەر قاتىناستارى ماسەلەلەرى بويىنشا ۇسىنىلاتىن قىزمەتتەردىڭ بيزنەس-پروتسەستەرىنە تالداۋ جاساعان بولاتىن.
«ناتيجەلەر وسى سالادا كورسەتىلەتىن قىزمەتتەر قوسارلانعان قۇجاتتار اينالىمىنا, قىزمەت الۋشىمەن تىكەلەي بايلانىس جاساۋعا, كوپتەگەن اكىمشىلىك توسقاۋىلدارعا, قىزمەت كورسەتۋدىڭ ۇزاق مەرزىمدىلىگى مەن تارتىپتەردىڭ ورىندالماۋىنا جانە تۇرعىندار ءۇشىن جايسىزدىق تۋعىزاتىن جاعدايلارعا يە ەكەندىگىن كورسەتتى», – دەدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانالىق دەپارتامەنتىنىڭ باسشىسى جازيرا جىلقىشيەۆا.
ول سونداي اق, وتكەن جىلدىڭ شىلدە ايىندا وسى جوبا بويىنشا بىرىڭعاي ورتالىق قۇرۋ جانە وندا قىزمەت كورسەتەتۋ پروتسەسىنە قاتىساتىن بارلىق مەكەمەلەردى توپتاستىرۋ تۋرالى باستاما كوتەرگەندىگىن اتاپ ءوتتى. iQala – قالا بيلىگى مەن تۇرعىندارىنىڭ ارا-قاتىناسىنىڭ جاڭا فورماتى.
iQala فرونت-ءوفيسى اتقارۋشى ورگاندار مەن كوممۋنالدىق جانە مۋنيتسيپالدىق قىزمەتتەردىڭ, كاسىپكەرلىكتى دامىتۋ جانە قولداۋ ينستيتۋتتارىنىڭ قىزمەتتەرىن ءبىر جەرگە توعىستىرىپ, تۇرعىندارعا «ءبىر تەرەزە» نەگىزىندە قىزمەت كورسەتەدى.
الاڭنىڭ ماقساتى – تۇرعىندار مەن شوب وكىلدەرىنىڭ مەملەكەتتىك جانە مەملەكەتتىك ەمەس قىزمەتتەردى الۋ پروتسەستەرىن مەيلىنشە جەڭىلدەتۋ.
بولاشاقتا ورتالىقتا 25 كومپانيا توپتاستىرىلىپ, بارلىعى 130 قىزمەت كورسەتىلەدى. iQala جوباسىنىڭ اياسىندا ارنايى ينتەرنەت-پورتال جانە ءموبيلدى قوسىمشا جۇمىسىن باستاپ, ولاردىڭ كومەگىمەن قالا قىزمەتتەرىن online رەجىمدە الۋعا مۇمكىندىك تۋادى.
«iQala جۇمىسىنىڭ ناتيجەسىندە استانالىق مەكەمەلەردىڭ قىزمەت كورسەتۋ تيىمدىلىگى ارتادى, قىزمەت كورسەتۋ پروتسەستەرى جەڭىلدەتىلەدى, بارلىق قىزمەت كورسەتۋ پروتسەسى اشىق ءارى ايقىن بولادى», – دەپ اتاپ ءوتتى «Astana» اكك» اق باسقارما توراعاسىنىڭ ءبىرىنشى ورىنباسارى تەمىرلان نۇرعيساەۆ.
iQala قالالىق قىزمەت كورسەتۋ ورتالىعىنىڭ فرونت-ءوفيسى جۇمىس كۇندەرى ساعات 09:00- 18:00-گە دەيىن قوشقارباەۆ داڭعىلى, 29 ءۇي مەكەن-جايى بويىنشا قىزمەت كورسەتەدى. قالالىق قىزمەت كورسەتۋ ورتالىعىنىڭ جۇمىسىنا قاتىستى تۋىنداعان سۇراقتار بويىنشا 109 قالالىق بىرىڭعاي بايلانىس ورتالىعىنا حابارلاسۋعا بولادى.
