ايماقتار • 04 ماۋسىم، 2019

تۇركىستان: مەملەكەتتىك رامىزدەردى قۇرمەتتەۋ – وتانشىلدىقتىڭ بەلگىسى

713 رەت كورسەتىلدى

تۇركىستان قالاسىندا «مەملەكەتتىك رامىزدەر – كيەلى قۇندىلىقتارىمىز» اتتى سالتاناتتى جيىن ءوتتى. مەملەكەتتىك رامىزدەر كۇنىنە وراي قالا اكىمدىگى مەن وبلىستىق ىشكى ساياسات باسقارماسىنىڭ ۇيىمداستىرۋىمەن وتكەن جيىندا تۇركىستان وبلىسى اكىمىنىڭ ورىنباسارى مالىك وتارباەۆ جۇرتشىلىقتى قۇتتىقتادى.

«مەملەكەتتىك رامىزدەردى قۇرمەتتەۋ – وتانشىلدىقتىڭ بەلگىسى. كەزىندە تۇركىستاننىڭ سايىپقىرانى بەكزات ساتتارحانوۆ سيدنەي تورىندە چەمپيون اتانىپ، رامىزدەرىمىزدى كۇللى الەمگە تانىتتى. مىنە، قازىرگى جاستار سول بەكزات باتىرداي نامىستى بولىپ، ەلگە قىزمەت ەتۋلەرى ءتيىس. بارشاڭىزدى مەملەكەتتىك رامىزدەر كۇنىمەن قۇتتىقتايمىن! ەلتاڭبامىز ماڭگى جارقىراپ، كوك تۋىمىز ماڭگى جەلبىرەي بەرسىن. كۇللى الاشتىڭ بولاشاعى جارقىن بولسىن!»، – دەدى م.وتارباەۆ.  مەرەكەلىك شارالار اياسىندا كىتاپ كورمەسى ءوتىپ، اقىندار مەن انشىلەر وتانشىلدىققا شاقىراتىن شىعارمالارىن ورىندادى. تۇلپار مىنگەن جىگىتتەر كوك تۋدى جەلبىرەتىپ، تۇركىستان تۇرعىندارى مەن قوناقتارىنا اسقاق رۋح پەن جىگەر سىيلادى. سونداي-اق «اسىل قازىنا» اجەلەر ءانسامبلى، وقۋشىلاردىڭ حور ۇجىمى،  «سەمسەر»، «بولاشاق» توپتارى مەن «شابىت»، «بيسۇلتان» بيشىلەر توبى ونەر كورسەتتى. ساربازدار مەن «جاس ساربازدار» كلۋبىنىڭ مۇشەلەرى مەملەكەتتىك رامىزدەردى ورتاعا الىپ شىعىپ، قۇندىلىقتاردى قۇرمەتتەۋ جونىندە ۇران تاستادى.

ال جەتىساي اۋدانىنىڭ ورتالىعى جەتىساي قالاسىندا مەملەكەتتىك رامىزدەرى كۇنى اياسىندا «مەنىڭ تۋىم» اتتى اكتسيا ۇيىمداستىرىلدى. شارا بارىسىندا جەتىسايلىق جاستار قالانىڭ كورىكتى كوشەلەرىندە ۆەلو، موتو، اۆتوشەرۋ وتكىزىپ، مەرەكەنىڭ ماڭىزىن ايشىقتاي ءتۇستى.

مەملەكەتتىك رامىزدەردى قۇرمەتتەۋگە شاقىرعان ءىس-شارالار تۇركىستاندىقتارعا كوتەرىڭكى كوڭىل-كۇي سىيلاپ، وتانشىلدىق دارىپتەلدى.


تۇركىستان وبلىسى

سوڭعى جاڭالىقتار

جەتى وڭىردە 2 گرادۋس ۇسىك جۇرەدى

اۋا رايى • بۇگىن، 18:48

دوللار ارزاندادى

ەكونوميكا • بۇگىن، 15:50

ۆاكتسينا سالدىرعاندار سانى ارتتى

كوروناۆيرۋس • بۇگىن، 09:17

ۇقساس جاڭالىقتار