ۇكىمەت باسشىسى ءوڭىر اكتيۆىنىڭ قاتىسۋىمەن جۇمىس كەڭەسىن وتكىزدى. ماڭعىستاۋ وبلىسىنىڭ اكىمى ە. توعجانوۆ ەلىمىزدىڭ الەۋمەتتىك-ەكونوميكالىق دامۋىن قامتاماسىز ەتۋ بويىنشا قابىلدانىپ جاتقان شارالار تۋرالى باياندادى. بيىلعى 4 ايدىڭ قورىتىندىسى بويىنشا وڭىردە ونەركاسىپتىك ءونىم ءوندىرىسىنىڭ كولەمى 943,6 ملرد تەڭگەنى قۇرادى, سونىڭ ىشىندە 20,1%-عا ماشينا جاساۋ ءوسىمىن قامتاماسىز ەتۋ ەسەبىنەن بولدى. نەگىزگى كاپيتالعا ينۆەستيتسيالار 121,8 ملرد تەڭگەنى قۇرادى. جالپى العاندا, بيىل ءوڭىردىڭ ينۆەستيتسيالىق قورجىنى 1,6 ترلن تەڭگەگە 44 ينۆەستيتسيالىق جوبادان تۇرادى, ولاردىڭ ىشىندە 67 ملرد تەڭگەگە 22 جوبانى ىسكە اسىرۋ 2019 جىلعا جوسپارلانعان.
كەڭەس بارىسىندا ۇلتتىق ەكونوميكا ۆيتسە-ءمينيسترى ە. الپىسوۆ, يندۋستريا جانە ينفراقۇرىلىمدىق دامۋ ۆيتسە-ءمينيسترى ب. قاماليەۆ, ەنەرگەتيكا ۆيتسە-ءمينيسترى م. مىرزاعاليەۆ «اۋىل – ەل بەسىگى» جوباسىن ىسكە اسىرۋ, وڭىردە كولىك ينفراقۇرىلىمىن جانە مۇناي-گاز كەشەنىن دامىتۋ تۋرالى باياندادى.
«ەلباسى ماڭعىستاۋ وبلىسىنىڭ دامۋىنا ەرەكشە كوڭىل بولەدى», — دەپ اسقار مامين, قر تۇڭعىش پرەزيدەنتىنىڭ تاپسىرماسى بويىنشا «نۇرلى جول» باعدارلاماسى بويىنشا بىرقاتار ستراتەگيالىق ماڭىزى بار ءىرى ينفراقۇرىلىمدىق جوبالار ىسكە اسىرىلعانىن اتاپ ءوتتى, قازىرگى تاڭدا اتالعان جوبالار ەلىمىزدىڭ ترانزيتتىك جانە ەكسپورتتىق الەۋەتىن دامىتۋعا ەلەۋلى تۇردە ىقپال ەتۋدە.
مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا وڭىردە جاڭاوزەن قالاسىن الەۋمەتتىك-ەكونوميكالىق دامىتۋدىڭ 2025 جىلعا دەيىنگى كەشەندى جوسپارىن ىسكە اسىرۋ جۇمىستارى باستالدى. 67 ءىس-شارا جوسپارلانعان, سونىڭ ناتيجەسىندە 16,3 مىڭ جۇمىس ورنى اشىلادى.
كەڭەس قورىتىندىسىن شىعارا وتىرىپ, اسقار مامين ماڭعىستاۋ وبلىسى قازاقستاننىڭ باتىس قاقپاسى ەكەنىن ايتىپ, ونەركاسىپ جانە كولىك-لوگيستيكا سالالارىن, ءتۋريزمدى ودان ءارى دامىتۋدىڭ قاجەتتىگىن اتاپ ءوتتى.
قر پرەمەر-ءمينيسترى اسقار مامين كاسپي تەڭىزىنىڭ جاعالاۋىندا جاڭا جوبا سالىناتىن جەردە تاس سالۋ راسىمىنە قاتىستى. اكۆاپاركى, سپورت الاڭدارى مەن كونگرەسس-حولى بار, 2000 ورىنعا شاقتالعان 600 ءنومىرى بار تۋريستىك كەشەندى 2020 جىلدىڭ شىلدە ايىندا پايدالانۋعا بەرۋ جوسپارلانعان. بۇل جوبانى ىسكە اسىرۋ وبلىستا ءتۋريزمنىڭ دامۋىنا زور سەرپىن بەرەدى, اتالعان جوبادا 2000-عا جۋىق جۇمىس ورنىن اشۋ كوزدەلگەن.
وڭىردە جاڭا 45 قوناق ءۇي كەشەنىن سالۋ ءۇشىن جەكە ينۆەستيتسيالار تارتۋ جۇمىستارى جۇرگىزىلىپ جاتىر.
سونىمەن قاتار, قر ۇكىمەتىنىڭ باسشىسىنا جۇمىس ساپارى بارىسىندا ينۆەستيتسيالار كولەمى $1,8 ملرد استام بولاتىن «اقتاۋ تەڭىز پورتى» اەا ايماعىندا مەتانول مەن ولەفين ءوندىرۋ زاۋىتىن سالۋ جوسپارلارى تانىستىرىلدى. جوبا يمپورتتى الماستىرۋعا باعىتتالعان, زاۋىتتا گاز مەتانولعا قايتا وڭدەلەدى جانە 40-تان استام ءونىم اتاۋىن شىعارۋعا مۇمكىندىك بەرەتىن باسقا دا قۇراۋىشتار شىعارىلادى.
