قازاقستاننىڭ تۇڭعىش پرەزيدەنتى وسىعان دەيىن ءتورت جىل ىشىندە ۋنيۆەرسيتەتتى 2600-دەن استام ستۋدەنت بىتىرگەنىن ايتتى.
– ۋنيۆەرسيتەت تۇلەكتەرى – ەلىمىزدە جانە شەتەلدە سۇرانىسقا يە بولىپ وتىرعان باسەكەگە قابىلەتتى جاس ماماندار. بۇگىن ۋنيۆەرسيتەتتى ءبىتىرىپ جاتقان 963 تۇلەكتىڭ 565-ءى باكالاۆريات باعدارلاماسى بويىنشا, 378-ءى ماگيستراتۋرا جانە 20-ى دوكتورانتۋرا باعدارلاماسى بويىنشا ءبىلىم الدى. باكالاۆريات باعدارلاماسى بويىنشا وقۋ بىتىرگەندەردىڭ 40 پايىزدان استامى الەمنىڭ ۇزدىك ۋنيۆەرسيتەتتەرىنەن شاقىرۋ الىپ, وقۋىن جالعاستىردى, – دەدى ەلباسى.
نۇرسۇلتان نازارباەۆ ستۋدەنتتەردىڭ عىلىمي-زەرتتەۋ جۇمىسىنىڭ ناتيجەلەرى جانە قول جەتكىزگەن جەتىستىكتەرىن اتاپ ءوتتى.
– بىلتىر عىلىم جانە تەحنولوگيا مەكتەبىنىڭ ستۋدەنتتىك كومانداسى بوستوندا وتكەن iGEM گەندىك-ينجەنەرلىك ماشينالار حالىقارالىق بايقاۋىندا التىن مەدال جەڭىپ الدى. عىلىمي ازىرلەمەلەردى كوممەرتسيالاندىرۋعا قاتىستى iGEM جوباسىن اتاپ وتۋگە بولادى, – دەدى قازاقستاننىڭ تۇڭعىش پرەزيدەنتى.
ەلباسى ۋنيۆەرسيتەتتىڭ جوعارى بىلىكتى جانە باسەكەگە قابىلەتتى كادرلارى قازاقستاننىڭ جوعارى تەحنولوگيالى يندۋسترياسىن دامىتۋعا زور ۇلەس قوسىپ وتىرعانىن ايتتى.
– 2019 جىل جاستار جىلى بولىپ جاريالاندى. جاستار – ەلىمىزدىڭ قازىرگى الەمدەگى باسەكەگە قابىلەتتىلىگىنىڭ نەگىزگى فاكتورى. قازاقستاننىڭ بولاشاعى سىزدەرگە, سىزدەردىڭ بىلىمدەرىڭىزگە, كۇش-قۋاتتارىڭىز بەن پاتريوتتىق سەزىمدەرىڭىزگە بايلانىستى. سىزدەر ءوز الەۋەتتەرىڭىز مەن مۇمكىندىكتەرىڭىزدى تولىق ىسكە اسىرۋ ءۇشى ءبىز بارلىق جاعدايدى جاساپ وتىرمىز, – دەدى نۇرسۇلتان نازارباەۆ.
قازاقستاننىڭ تۇڭعىش پرەزيدەنتى «NU – نازارباەۆ ۋنيۆەرسيتەتى» برەندى الەمدىك اكادەميالىق ورتادا عانا ەمەس, سونىمەن قاتار مەملەكەتتىك باسقارۋ, بيزنەس, مەديتسينا, يننوۆاتسيا, ءىت-تەحنولوگيا سالاسىندا كەڭىنەن تانىمال بولدى.
– بۇل باستاما قازاقستاندا عانا ەمەس, سونداي-اق بۇكىل پوستكەڭەستىك كەڭىستىكتە وزىق جوباعا اينالىپ, ءوز سالاسىندا كوش باستادى. ۋنيۆەرسيتەت قىسقا مەرزىم ىشىندە جوعارى بىلىكتى كاسىبي كادرلار دايىندايتىن, سونداي-اق وتاندىق عىلىمي زەرتتەۋلەر مەن ازىرلەمەلەردى دامىتاتىن ەلىمىزدىڭ بەدەلدى وقۋ ورنى رەتىندە قالىپتاستى. ءبىلىم ورداسىنىڭ باستى اكتيۆى – ونىڭ زياتكەرلىك الەۋەتى سانالاتىن ادامدار – وقىتۋشىلار, ستۋدەنتتەر, باسقارۋشى پەرسونال, – دەدى ەلباسى.
نۇرسۇلتان نازارباەۆ تۇلەكتەردى ەلىمىز بەن قوعامىمىزدى دامىتۋ ىسىنە بەلسەنە اتسالىسۋعا شاقىردى.
– سىزدەر جوعارى بىلىكتى ماماندار عانا ەمەس, سونداي-اق, ازاماتتىق جاۋاپكەرشىلىكتى سەزىنەتىن قوعامنىڭ بەلسەندى مۇشەلەرى بولۋلارىڭىز كەرەك. وقۋدى ودان ءارى جالعاستىرۋ, ەل يگىلىگى ءۇشىن ەڭبەك ەتۋ, قازاقستاننىڭ اتىنان شەتەلدە بولۋ نەمەسە ءوز ءىسىڭىزدى باستاۋ سياقتى قانداي دا ءبىر جولدى تاڭداساڭىزدار دا سىزدەرگە اق جول جانە جوسپارلارىڭىزدى تابىستى ىسكە اسىرۋدى تىلەيمىن, – دەدى قازاقستاننىڭ تۇڭعىش پرەزيدەنتى.
