– ەلىمىزدىڭ ءۇشىنشى مەگاپوليسىنە ارنايى كەلگەن پيتەر فوستەر مىرزاعا العىسىمدى بىلدىرەمىن. العاشقى رەيستىڭ ءساتتى قونۋىمەن قۇتتىقتايمىن. بۇل – قالا تۇرعىندارى مەن قوناقتارى ءۇشىن تاماشا جاڭالىق. ويتكەنى ءبىزدىڭ قالامىز ارقىلى كورشىلەس وبلىس پەن وزبەكستان ازاماتتارى ۇشادى. ەندىگى شىمكەنتتىكتەر مەن قالا قوناقتارى ارزان باعامەن وڭتۇستىك استاناعا ۇشا الادى. اۋەكومپانياسىنىڭ الداعى جۇمىستارىنا ساتتىلىك تىلەيمىن, - دەدى قالا اكىمى.
بۇل باعىتتا ەندى 180 ورىندى زاماناۋي Airbus A320 اۋە كەمەلەرى كۇندە قاتىنايدى. ايتا كەتۋ كەرەك, الماتىدان شىمكەنتكە ءبىرىنشى رەيس تولىپ كەلدى, ءبىراز بيلەت ەڭ مينيمالدى تاريفپەن, 10 000 تەڭگەگە دەيىنگى باعامەن ساتىلعان. «ەير استانا» كومپانياسىنىڭ پرەزيدەنتى پيتەر فوستەر شىمكەنت ەلىمىزدىڭ رەسپۋبليكالىق ماڭىزعا يە مەگاپوليستەرىنىڭ ءبىرى ەكەنىنە توقتالدى.
– FlyArystan كومپانياسىنىڭ كومەگىمەن جولاۋشىلار التىن ۋاقىتتارىن ۇنەمدەپ, لوۋكوستەرمەن ساپار شەگۋدى تاڭدايدى دەگەن سەنىمدەمىن. الداعى ۋاقىتتا رەيستەر مەن اۋە باعىتتارى كوبەيەدى, - دەدى پيتەر فوستەر.
ايتا كەتەيىك, شىمكەنتكە ەڭ تومەنگى ۇشاق بيلەتى 4999 تەڭگەدەن باستالادى. جۇگىڭىز 5 كەلىدەن ارتىق بولىپ, بورت ىشىندە تاماقتاناتىن جاعدايدا بيلەت باعاسى دا ارتا تۇسەدى. وسى تۇستا FlyArystan وكىلدەرى جولاۋشىلارعا flyarystan.com سايتىندا جاريالانعان تاريف ەرەجەلەرىمەن مۇقيات تانىس بولۋدى سۇرايدى.
