ال قاراجات حالىققا پايداسى تيەتىن, ناتيجەسى كوزگە كورىنەتىن, جىلدار بويى شەشىمىن تاپپاعان ماسەلەلەردى شەشۋگە جۇمسالۋى ءتيىس. «ەلباسى ن.نازارباەۆتىڭ «اۋىل – ەل بەسىگى» جوباسىنا ساي, ءار اۋداننان ۇلگىلى اۋىل جاساۋىمىز كەرەك. اتالعان جۇمىستار بيىلدىڭ وزىندە اۋدان, اۋىل تۇرعىندارىنىڭ ءومىرىن جاقسارتۋعا مۇمكىندىك بەرەدى», – دەدى وبلىس اكىمى ومىرزاق شوكەەۆ وبلىستىق ءماسليحاتتىڭ كەزەكتى سەسسياسىندا. تۇركىستان قالاسىن, اۋدان جانە اۋىلداردى دامىتۋ, وبلىستىڭ مادەني-رۋحاني سالاسىن جاڭعىرتۋ, اگروونەركاسىپ كەشەنى مەن يندۋستريالىق ايماقتاردى كوتەرۋ – الداعى جىلدارى ءوڭىر ءۇشىن باسىمدىققا يە نەگىزگى باعىت بولماق. جۇيەلى ءناتيجە بەرەتىن, وزەكتى ماسەلەلەردى شەشۋگە باعىتتالعان مىندەتتەردى ايقىنداعان وبلىس اكىمدىگى اتقارىلاتىن ناقتى جۇمىستاردى دا جوسپارلاپ قويىپتى. بۇل ورايدا ءوڭىردەگى 9 يندۋستريالىق ايماققا تالداۋ جۇرگىزىلىپ, ولاردىڭ اراسىندا ناشار نەمەسە مۇلدەم جۇمىس ىستەمەيتىندەرى انىقتالعان. ءسويتىپ جۇمىسى تۇرالاعان ايماقتاردىڭ ورنىنا ماشينا قۇراستىرۋ, ازىق-ت ۇلىك ءوندىرىسى مەن جەڭىل ونەركاسىپ, قۇرىلىس يندۋسترياسى سەكىلدى باعىتتا بەلسەندى سەرپىن بەرەتىن كەنتاۋ, ءتۇركىستان قالاسى مەن ورداباسى اۋدانىنداعى يندۋستريالىق ايماقتارعا باسىمدىق بەرىلمەك. نەگىزگى قارجى دا وسى جوبالارعا سالىناتىن بولادى. ماسەلەن, كەنتاۋداعى يندۋستريالىق ايماقتىڭ كولەمى 300 گەكتارعا ۇلعايتىلادى. يندۋستريالىق ايماقتى ارزان ەنەرگەتيكالىق قورمەن قامتاماسىز ەتۋ ءۇشىن كەنتاۋ قالاسىنداعى جىلۋ ەلەكتر ورتالىعى قايتا قۇرىلىپ, گازبەن قامتۋ ينفراقۇرىلىمىن ءجۇرگىزۋ جوسپارلانۋدا. ارينە ءوڭىر ەكونوميكاسىنىڭ باستى درايۆەرى سانالاتىن اۋىل شارۋاشىلىعى سالاسى دا ەرەكشە نازارعا الىنادى. بۇگىندە وبلىستا اۋىل شارۋاشىلىعىنا ارنالعان 6,7 ملن گەكتار جەر بار, ونىڭ 5,6 ملن گەكتارى جايىلىمدىق جەر. ال 518 مىڭ جەر تەلىمى, ياعني 425 مىڭ گەكتار سۋارمالى. وبلىس اكىمىنىڭ ايتۋىنشا, قوسىمشا 250 مىڭ گەكتار جەردى سۋارمالى جەر قاتارىنا قوسۋ قاجەت. سەبەبى سۋارمالى جەردەن تۇسەتىن كىرىستەر 3-4 ەسە جوعارى بولادى. اتالعان جەردى اينالىمعا ەنگىزۋ ارقىلى وبلىستىڭ 20 مىڭ تۇرعىنىن جۇمىسپەن قامتۋ كوزدەلۋدە. سونداي-اق وبلىس بيۋدجەتىنىڭ كىرىس بولىگى ەكى ەسە ۇلعايتىلماق. «وبلىس تەك 53 ملرد تەڭگە عانا كىرىس تابۋدا. مەنىڭ ويىمشا, وبلىس كىرىسىن 100 ملرد تەڭگەگە دەيىن, ياعني 2 ەسەگە ۇلعايتۋعا قابىلەتىمىز جەتەدى. سوندىقتان دا بيۋدجەتتىڭ كىرىس بولىگىن ۇلعايتۋ ءجونىندەگى جۇمىستى جوسپارلى تۇردە ءجۇرگىزۋ كەرەك. سونداي-اق رەسپۋبليكالىق بيۋدجەت قاراجاتى قارالعان وبلىستىڭ كەشەندى دامۋ جوسپارىن قايتادان دۇرىستاپ قاراۋ قاجەت», دەدى ءو. شوكەەۆ.
ءوڭىردى دامىتۋداعى باسىمدىققا يە ءبىرىنشى نەگىزگى باعىت بويىنشا ءتۇركىستان قالاسى وبلىس ورتالىعى عانا ەمەس, تۇركىتىلدەس ەلدەردىڭ رۋحاني ورتالىعىنا اينالۋى ءتيىس. بۇل ورايدا قالاداعى اكىمشىلىك-ىسكەرلىك ورتالىعىن جانە رۋحاني-مادەني نىسانداردىڭ قۇرىلىسىن ۋاقتىلى ءارى ساپالى جۇرگىزۋ مىندەتى تۇر. جالپى, وبلىس ورتالىعىندا 89 نىساننىڭ قۇرىلىس جۇمىستارى جۇرگىزىلەدى. تۇركىستاننىڭ ەسكى شاعىن اۋداندارىنداعى ۇلكەن 5 كوشە كۇردەلى, 27 كوشە ورتا جوندەۋدى قاجەت ەتەدى, 62 شاقىرىم جول رەتتەلەدى. سونىمەن بىرگە ورتالىق كوشەلەردىڭ جان-جاعىن اباتتاندىرۋ, شامامەن 42 شاقىرىم كوشەگە جارىقتاندىرۋ, تروتۋار سالۋ جۇمىستارى ءجۇرگىزىلەدى. قالانىڭ ورتاسىنان «باتىس ەۋروپا – باتىس قىتاي» ماگيسترالى وتەتىنى ەسكەرىلە وتىرىپ, ساۋدا سالاسىن دامىتۋ, تۋريستەردى كوپتەپ تارتۋ ماقساتىندا زاماناۋي ساۋدا كەشەنى اشىلماق. بىرەگەي قولونەر بۇيىمدارىن, ۇلتتىق بۇيىمداردى دايارلايتىن, تەحنولوگياسىن وقىتاتىن ءىرى قولونەر ورتالىعىن سالۋ دا كوزدەلىپ وتىر.
