تۇركى تىلدەس الەمنىڭ رۋحاني استاناسى – تۇركىستان قالاسى تاريحىنىڭ, فولكلورىنىڭ, مادەنيەتىنىڭ حالىقارالىق وركەنيەتتەگى ماڭىزدىلىعىن ايقىنداۋ, تاجىريبە الماسۋ جانە پىكىر ءبولىسۋدى ماقسات ەتكەن كونفەرەنتسياعا تۇركىستان وبلىسىنىڭ اكىمى ومىرزاق شوكەەۆ, ق.ا.ياساۋي اتىنداعى حقتۋ رەكتورى بولاتبەك ابدراسيلوۆ, مارمارا ۋنيۆەرسيتەتىنىڭ دوكتورى, پروفەسسور جەنگيز تومار, حالىقارالىق تۇرىك اكادەمياسىنىڭ عىلىم ءبولىمىنىڭ اعا ساراپشىسى, پروفەسسور قادىرالى قونقوباەۆ, وزبەكستان عىلىمدار اكادەمياسىنىڭ پروفەسسورى سارىگۇل باحادىروۆا, ق.ا.ياساۋي اتىنداعى حقتۋ-دىڭ ياساۋيتانۋ عىلىمي-زەرتتەۋ ورتالىعىنىڭ ديرەكتورى دوساي كەنجەتاي سىندى عالىمدار قاتىستى.
وبلىس اكىمى ومىرزاق ەستاي ۇلى قاسيەتتى تۇركىستاننىڭ الەمدىك تاريحتاعى ورنىن زەرتتەۋدى ماقسات تۇتقان حالىقارالىق كونفەرەنتسيا جۇمىسىنا ساتتىلىك تىلەپ, ەلباسىنىڭ « ۇلى دالانىڭ جەتى قىرى» ماقالاسى اياسىندا قولعا الىنعان ءىس-شارا ءوڭىردىڭ رۋحاني-عىلىمي سالاسىن جاڭا ساتىعا كوتەرەدى دەگەن سەنىمىن ءبىلدىردى. «تۇركىستان قالاسىنىڭ تۇركى الەمىندەگى ورنىن عىلىمي تۇرعىدان تارازىلايتىن بۇل كونفەرەنتسيانىڭ ماڭىزى زور. تۇركى حالىقتارى ءۇشىن تۇركىستان قالاسىنىڭ تاريحتاعى ورنى ارقاشان دا قاستەرلى. ەلىمىزدىڭ تۇڭعىش پرەزيدەنتى ن.ءا.نازارباەۆ « ۇلى دالانىڭ جەتى قىرى» اتتى ماقالاسىندا «قازاقستاننىڭ ەجەلگى استاناسى حالقىمىزدىڭ رۋحاني ورتالىعى عانا ەمەس, سونداي-اق, بۇكىل تۇركى الەمى ءۇشىن كيەلى ورىن بولىپ سانالادى» دەپ اتاپ ءوتتى. باۋىرلاس ەلدەردىڭ ورتاق تاريحىندا تۇركىستان - كيەلى مەكەن, قوجا احمەت ياساۋي تۇركى حالقىنىڭ ۇستازى رەتىندە دارىپتەلگەن. ياساۋي جاتقان جەر «باقىتتىڭ استاناسى» رەتىندە تانىلعان», – دەدى وبلىس اكىمى ومىرزاق شوكەەۆ.
سونداي-اق عىلىمي كونفەرەنتسيادا حالىقارالىق تۇركولوگيا اكادەمياسىنىڭ پروفەسسورلىق-وقىتۋشىلىق قۇرامى مەن تۇركيا, قىرعىزستان, وزبەكستان ەلىنىڭ پروفەسسور - عالىمدارى « ۇلى دالانىڭ جەتى قىرى: تۇركى مادەنيەتىن دامىتۋدىڭ وزەكتىلىگى», «قاسيەتتى تۇركىستان جانە ءدىني ساكرالدى قۇندىلىقتار», «ەجەلگى ماسساگەتتەر: توميريس جانە قاراقالپاق حالىق ەپوسى «قىرىق قىز», «ق.ا.ياساۋيدىڭ مادەني مۇراسى», «ياساۋي, «پير-تۇركىستان» تۇرىك ەلىنىڭ ۇستازى», «ازىرەت سۇلتان» تاريحي-مادەني قورىق-مۇراجايى تۋرالى» تاقىرىپتارىندا بايانداما جاسادى.
كونفەرەنتسيا اياسىندا شەتەلدىك جانە وتاندىق عالىمداردىڭ قاتىسۋىمەن پلەنارلىق ءماجىلىس جانە سەكتسيالىق وتىرىستار ءوتتى. اتاپ ايتساق, سەكتسيالىق وتىرىستاردا «ق.ا.ءياساۋيدىڭ الەمدىك مادەنيەتتەگى ورنى مەن تاعىلىمى», «تۇركىستان – تۇركى دۇنيەسىنىڭ كيەلى مەكەنى, رۋحاني تەمىرقازىعى», «تۇركىستان – ۇلى جىبەك جولى بويىنداعى ءىرى قولونەر مەن مۋزىكا ورتالىعى», «تۇركىستان-تۇركى الەمىنىڭ گەنەزيسى» تاقىرىپتارى قامتىلدى.
