كينو • 28 مامىر، 2019

«الاددين» قازاقشا سويلەدى

شىعىس ەرتەگىلەرىن ءسۇيىپ وقيتىن وقىرمان ءۇشىن «الاددين» ەرتەگىسىنە دەگەن قىزىعۋشىلىق ءبىر ءسات تە باسەڭسىگەن ەمەس. ايگىلى «مىڭ ءبىر ءتۇن» جيناعىنا ەنگەن ايتۋلى حيكايانىڭ داڭقى جىلدار العا جىلجىعان سايىن ءتىپتى اسقاقتاپ، تەك اراب ەلىنىڭ ەمەس، جاھانعا ورتاق جاۋھارعا اينالىپ ۇلگەرگەنى قاشان!

نازەركە جۇماباي

ونىڭ ايقىن دالەلى رەتىندە الەمنىڭ تالاي «مەن» دەگەن كينوستۋديالارى مەن رەجيسسەرلەرىنىڭ «الاددينگە» وقتىن-وقتىن ورالىپ، عاجايىپ ەرتەگىنى ارقايسىسى ءوز قيالىندا قايتا تۇلەتۋگە دەگەن قۇشتارلىعىن اتاپ ءوتۋدىڭ ءوزى جەتكىلىكتى دەپ ويلايمىز. كۇنى كەشە الەمدىك پرەمەراسى وتكەن ايگىلى Disney كينوستۋدياسىنىڭ «الاددين» تۋىندىسىن تاماشالاعاننان كەيىن جوعارىداعى ويىمىزعا جانە ءبىر مارتە يلانا تۇسكەندەي بولدىق. كينوتەاتر زالىنا ينە شانشار ورىن قالدىرماي جينالعان جاس-كارىسى ارالاس قالىڭ كورەرمەن ءالى دە ءالادديننىڭ سيقىرلى شامىنىڭ عاجايىبىنا سەنگىسى كەلەتىنىن اڭعارتىپ قويعانداي...

ءيا، قيال-عاجايىپتى كەمەلىنە كەلتىرىپ كەسكىندەۋدە بۇگىندە Disney-ءدىڭ الدىنا تۇسەتىن ستۋديا جوق. كوركەمدىك ساپاسى دا، تەحنيكالىق مۇمكىندىگى دە بالدىرعاندار تۇگىلى ەرەسەك كورەرمەننىڭ ءوزىن ەكران الدىندا تاپجىلتپاي ۇستايدى. ال سول Disney ساپاسىنداعى كوركەمتۋىندى وتاندىق كينوتەاترلاردان قازاق تىلىندە ءۇن قاتسا، ءتىپتى عالامات.

«بولاشاق» كورپوراتيۆتىك قورىنىڭ «وزىڭنەن باستا» جوباسى اياسىندا Disney ونىمدەرىن قازاق تىلىندە دۋبلياجداۋ جۇمىسى ەلىمىزدە 2011 جىلدان بەرى جۇزەگە اسىپ كەلەدى. وسى ۋاقىت ارالىعىندا بارلىعى 29 فيلم قازاقشا سويلەپتى. «الاددين» دە ءسوزسىز سول ۇزدىكتەردىڭ قاتارىندا.

بالدىرعانداردىڭ سۇيىكتى كەيىپكەرلەرىن قازاقشا سويلەتۋگە وتاندىق كينو مەن تەاتردىڭ جەتەكشى اكتەرلەرى تارتىلىپتى. اتاپ ايتار بولساق، الاددين بەينەسىن جاستار تەاترىنىڭ جاس اكتەرى ايسۇلتان جاليەۆ قازاقشالاسا، جاسمين حانشايىم تالانتتى اكتريسا شەحنازا قىزىحانوۆانىڭ ۇنىندە قازاق كورەرمەنىنە جول تارتتى. ال جىندى بەلگىلى تەاتر جانە كينو اكتەرى، قازاقستاننىڭ ەڭبەك سىڭىرگەن قايراتكەرى داۋرەن سەرعازين، جاففاردى – نۇرلان ءالىمجان، سۇلتاندى – قازاقستاننىڭ حالىق ءارتىسى تىلەكتەس مەيراموۆ دىبىستادى. دۋبلياج رەجيسسەرى – شاح-مۇرات ورداباەۆ، مۋزىكالىق رەداكتور – انەل توكيروۆا.

بۇعان دەيىن جۇزەگە اسقان جۇمىستارمەن سالىستىرعاندا ءفيلمدى دىبىستاعان اكتەرلەر ءۇشىن «الادديننىڭ» جاۋاپكەرشىلىگى دە، سالماعى دا زور بولعان سىڭايلى. ويتكەنى شىعارماشىلىق جۇمىس بارىسىندا ولاردىڭ اكتەرلىك شەبەرلىگىنەن بولەك، ۆوكالدىق مۇمكىندىكتەرى دە سىنعا ءتۇسىپتى. مۋزىكالىق ءتۇرلى جانردىڭ باسىن بىرىكتىرگەن تاڭعاجايىپ ەرتەگىنىڭ ءبىراز سارساڭعا سالعانىن ونەر يەلەرىنىڭ وزدەرى دە جاسىرمادى:

– دۋبلياج – اكتەردىڭ جان-جاقتىلىعى، امبەباپتىلىعى سىنعا تۇسەتىن كۇردەلى سالا عوي. بۇل تۋىندىدا ەڭ كوپ سويلەيتىن دە، ءجيى داۋىس قۇبىلتىپ، ءتۇرلى كەيىپكە ەنەتىن دە مەنىڭ كەيىپكەرىم. جىننىڭ ءار ارەكەتى، قيمىلى مەن ءۇشىن جەكەلەي تەاتر بولدى. تىڭعىلىقتى ىزدەنىستى تالاپ ەتتى. ويتكەنى وزدەرىڭىز كۋا بولعانداي، فيلمدە جىن رەپ تە وقيدى، ليريكالىق اندەردى دە كەڭىنەن كوسىلە شىرقايدى. ءبىر امپلۋادان ەكىنشىسىنە اۋىسۋ ءۇشىن اكتەردىڭ داۋىسى دا، ىشكى اكتەرلىك دايىندىعى دا مىقتى بولۋى قاجەت. وسى تۇرعىدان كەلگەندە، «الاددين» – مەن ءۇشىن تاماشا مەكتەپ بولعانى انىق»، دەيدى اكتەر داۋرەن سەرعازين.

شىنىمەن دە، دۋبلياج – ونەر. كەيىپكەرىڭنىڭ جان-دۇنيەسىن داۋىس قۇدىرەتى ارقىلى جەتكىزە ءبىلۋ، ءار ۇلتتىڭ تابيعاتى مەن قالىبىنا ساي شىنايى سويلەتۋ اكتەردەن ۇلكەن شەبەرلىكتى تالاپ ەتەدى. وسى تالاپ ولشەمىنەن قارايتىن بولساق، «الاددينگە» قازاقشا عۇمىر سىيلاعان ونەر يەلەرى شىن مانىندە وزدەرىنە جۇكتەلگەن جاۋاپكەرشىلىكتى كاسىبي جوعارى دەڭگەيدە اتقارىپ شىقتى دەپ سەنىممەن ايتا الامىز. 2019 جىلدىڭ 23 مامىرىنان باستاپ جالپىۇلتتىق كينوپروكاتكا شىققان الەمدىك كلاسسيكانىڭ جاۋھارىن قازاق تىلىندە تاماشالاۋعا اسىعىڭىزدار!

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز