جۇك ارتپايىق جۇرەككە
سەنبى, 5 قاڭتار 2013 7:33
ەلباسى ءوزىنىڭ جىل سايىنعى جولداۋلارىندا دەنساۋلىق ساقتاۋ سالاسىنا بايلانىستى ناقتى تاپسىرمالار بەرەدى. سونىڭ ناتيجەسىندە مەملەكەتتىك باعدارلامالار قابىلدانىپ, ونىڭ ىشىندە جۇرەك-قان تامىرلارى اۋرۋلارىنان بولاتىن ءولىم-ءجىتىم كورسەتكىشتەرىن تومەندەتۋگە باستى نازار اۋدارىلۋدا. سوڭعى ءۇش جىل كولەمىندە وڭتۇستىك قازاقستان وبلىسىندا وسى سالادا اۋىز تولتىرىپ ايتارلىقتاي جۇمىستار اتقارىلدى. بۇل رەتتە, وبلىس كولەمىندە كارديولوگيالىق جانە كارديوحيرۋرگيالىق قىزمەتتى ۇيىمداستىرىپ وتىرعان وبلىستىق كارديولوگيالىق ورتالىقتىڭ تىندىرىپ جاتقان جۇمىسى زور.
سەنبى, 5 قاڭتار 2013 7:33
ەلباسى ءوزىنىڭ جىل سايىنعى جولداۋلارىندا دەنساۋلىق ساقتاۋ سالاسىنا بايلانىستى ناقتى تاپسىرمالار بەرەدى. سونىڭ ناتيجەسىندە مەملەكەتتىك باعدارلامالار قابىلدانىپ, ونىڭ ىشىندە جۇرەك-قان تامىرلارى اۋرۋلارىنان بولاتىن ءولىم-ءجىتىم كورسەتكىشتەرىن تومەندەتۋگە باستى نازار اۋدارىلۋدا. سوڭعى ءۇش جىل كولەمىندە وڭتۇستىك قازاقستان وبلىسىندا وسى سالادا اۋىز تولتىرىپ ايتارلىقتاي جۇمىستار اتقارىلدى. بۇل رەتتە, وبلىس كولەمىندە كارديولوگيالىق جانە كارديوحيرۋرگيالىق قىزمەتتى ۇيىمداستىرىپ وتىرعان وبلىستىق كارديولوگيالىق ورتالىقتىڭ تىندىرىپ جاتقان جۇمىسى زور. كارديوورتالىق جەدەل جاردەم كورسەتەتىن مەكەمە بولعاندىقتان, تاۋلىك بويى جۇمىس ىستەيدى. سوندىقتان, وبلىس بويىنشا كەز كەلگەن جەدەل جاردەمگە ءزارۋ اۋىر ناۋقاستاردى كۇندىز-ءتۇنى وسىندا الىپ كەلىپ جاتادى. كارديوورتالىقتىڭ قىزمەتكەرلەرى كەرەك بولعان جاعدايدا قالالار مەن اۋداندارداعى مەديتسينالىق مەكەمەلەرگە بارىپ كونسۋلتاتيۆتىك كومەك كورسەتەدى. ودان باسقا ورتالىقتا كونسۋلتاتيۆتى-دياگنوستيكالىق ەمحانا بار, وعان ءاربىر مەديتسينالىق مەكەمەنىڭ جولداماسىمەن ناۋقاستار كەلىپ, دياگنوستيكالىق جانە ەمدىك كەڭەستەر الا الادى.
وڭتۇستىك قازاقستان وبلىسىندا حالىق تىعىز ورنالاسقان. وڭىردە 2 ميلليون 600 مىڭداي ادام تۇرادى. ارينە, كوپشىلىكتى ورتادا ءتۇرلى اۋرۋدىڭ بەلەڭ الاتىنى بەلگىلى. دۇرىس تاماقتانباۋ, دەنساۋلىققا كوڭىل بولمەۋ, ارتىق سالماق قوسۋ, ەكولوگيانىڭ دۇرىس ساقتالماۋى سەكىلدى فاكتورلار ءجۇرەك-قان تامىرلارى اۋرۋلارىنىڭ كوبەيۋىنە سوقتىرادى. ونىڭ ۇستىنە حالقىمىزدىڭ قانىنا ءسىڭگەن جامان ادەت – كوپشىلىك جۇرت اۋرۋى ءابدەن مەڭدەگەن تۇستا, جان القىمعا تايانعاندا بارىپ ءدارىگەردىڭ ەسىگىن قاعادى. مۇنداي كەزدە جاردەم بەرۋ ەڭ بىلىكتى دەگەن ماماننىڭ وزىنە اۋىر سوعادى. ناتيجەسىندە, جۇرەك جانە قان تامىرى اۋرۋلارىنىڭ سالدارىنان ەڭبەك قابىلەتىن جوعالتۋشىلار سانى ءوسىپ, مەملەكەتىمىزگە وراسان زور الەۋمەتتىك جانە ەكونوميكالىق زيان كەلتىرىپ وتىر.
قازىرگى ۋاقىتتا كارديوورتالىق سوڭعى دياگنوستيكالىق ءجانە ەمدىك ءادىس-تاسىلدەردى قولدانىپ جاتىر. سوڭعى جىلدارى ورتالىق بىرقاتار دياگنوستيكالىق انىقتاۋ جانە ەمدەۋ اپپاراتتارىمەن جابدىقتالدى. ءبۇگىنگى كۇنى جۇرەك-قان تامىرلارى اۋرۋىنىڭ كەز-كەلگەن تۇرىنە دياگنوز قويىپ, جوعارى دارەجەدە ەمدىك شارالارىن جاساۋعا ءمۇمكىندىگى بار. وسى رەتتە ارقايسىسى 200 ميلليون تەڭگەدەن استام تۇراتىن انگيوگرافيالىق قوندىرعىلار اكەلىندى. ولار تاۋلىك بويىنا قالىپتى جۇمىس ىستەپ تۇر. ولاردىڭ كومەگىمەن جۇرەكتىڭ تىكەلەي تامىرلارىن تەكسەرىپ, قاي جەرى قىسىلىپ, بىتەلىپ تۇر, سولاردى انىقتاپ, اشىپ, ستەنت قويۋ وپەراتسيالارى جاسالىنۋدا. ايتا كەتۋ كەرەك, جۇرەك اۋرۋىنىڭ كوبىسى ءدارى-دارمەكپەن ەمدەلمەيدى. وعان تەك وپەراتسيا جاساۋ ارقىلى عانا كومەكتەسۋگە بولادى. جالپى, كارديوورتالىقتا 132 توسەك-ورىن بار, ونىڭ 32-ءسى كارديوحيرۋرگيالىق بولىمشەگە تيەسىلى. كەز كەلگەن كۇردەلى وپەراتسيانى جاسايتىن 2 وتا جاساۋ بلوگى بار.
بۇگىنگى كۇنگە دەيىن ورتالىقتا جۇرەككە بايلانىستى 1155 وتا جاسالىندى. ياعني, 1155 ءجۇرەك قايتا سوقتى دەسەك تە بولادى. مۇندا قازاقستان, رەسەي, پولشا, تۇركيا, ليتۆا, گەرمانيا جانە يزرايل كلينيكالارىندا دايىندىقتان وتكەن ماماندار جۇمىس ىستەيدى. بىلىكتىلىك دارەجەلەرى جوعارى. ولار جۇرەككە جاسايتىن وپەراتسيالاردىڭ بارلىق ءتۇرىن مەڭگەرگەن.
بىلتىرعى جىلى ورتالىققا 239 ميلليون تەڭگەگە اريتميانى ەمدەيتىن جاڭا قوندىرعى ساتىپ الىندى. سونىڭ كومەگىمەن جۇرەكتىڭ ىشىندەگى ەلەكتروفيزيولوگيالىق وزگەرىستەردى زەرتتەۋ, ءجۇرەك ىرعاعى بۇزىلعان ناۋقاستارعا ەلەكتروكارديوستيمۋلياتور قويۋ, سونىمەن قاتار كۇردەلى اريتميالارعا راديوجيىلىكتى ابلاتسيا وپەراتسيالارى جاسالىنۋدا. بۇل ۋاقىتقا دەيىن مۇنداي وپەراتسيالار تەك استانادا عانا جاسالىناتىن. بيىلدىڭ وزىندە جۇرەگىنىڭ ىرعاعى بۇزىلعان 88 ناۋقاسقا وپەراتسيا جاسالىندى.
2011 جىلى ناۋرىز ايىندا كارديوورتالىقتا ايماقتىق دەڭگەيدە ءبىرىنشى بولىپ بالالار كارديوحيرۋرگياسى بولىمشەسى اشىلدى. رەسپۋبليكا بويىنشا دۇنيەگە كەلەتىن سابيلەردىڭ 25 پايىزى ءبىزدىڭ وبلىستا. الايدا, قازىر 3000-عا جۋىق جۇرەك اقاۋىمەن تۋىلعان ءسابي ەسەپتە تۇر. ونىڭ 75 پايىزى وپەراتسيانى قاجەت ەتەدى. جالپى, بۇگىنگى كۇنى كارديوورتالىقتا 262 ءسابيگە وپەراتسيا جاسالىندى. ودان بولەك 17 بالانىڭ جۇرەك اقاۋىنا تامىرىشىلىك كاتەتر ارقىلى وككليۋدەر Amplazer قالقانشاسى قويىلدى. ناتيجەلەرى وتە جاقسى. سونىمەن قاتار كارديوورتالىقتا جۇرەك يشەمياسى بار ناۋقاستارعا ەندوۆاسكۋليارلىق ستەنتتەۋ وپەراتسيالارى جاقسى دامىعان. بۇگىنگى كۇنى 1200 ناۋقاستىڭ جۇرەك تامىرىنا ستەنت قويىلدى.
جالپى, ءبىزدىڭ ماقسات – كارديولوگيالىق اۋرۋلاردان بولاتىن ءولىم-ءجىتىمدى ازايتۋ. ول ءۇشىن حالىقتى الماتى مەن استاناعا سابىلتپاي, بارلىق كارديولوگيالىق جانە كارديوحيرۋرگيالىق كومەكتى حالىقارالىق ستاندارتقا ساي دەڭگەيدە ءوزىمىزدە كورسەتۋىمىز كەرەك. بۇل ماقساتقا ۇكىمەت تاراپىنان دا, جەرگىلىكتى بيلىكتەن دە كارديوورتالىققا ۇلكەن قارجىلىق كومەكتەر كورسەتىلۋدە. قىسقاسى, وبلىستىق كارديوورتالىقتىڭ قازىرگى جاعدايى دۇنيەجۇزىلىك ستاندارتقا ساي دەپ ايتۋعا بولادى.
جوعارىدا ايتىلعان يننوۆاتسيالىق تەحنولوگيالىق ەمدىك شارالاردى ەنگىزۋ ناتيجەسىندە جانە كارديوورتالىقتىڭ جەتەكشىلىگىمەن اتقارىلىپ جاتقان وبلىستاعى ۇيىمداستىرۋ, اۋرۋدىڭ الدىن-الۋ ءىس-شارالارىنىڭ ارقاسىندا 2012 جىلدىڭ 7 ايىندا وتكەن جىلدىڭ وسى كەزەڭىمەن سالىستىرعاندا جۇرەك-قان تامىرلارى اۋرۋىنان بولاتىن ءولىم-ءجىتىم 44 پايىزعا, ونىڭ ىشىندە جۇرەكتىڭ يشەميالىق اۋرۋىنان بولاتىن ءولىم-ءجىتىم 53 پايىزعا تومەندەدى.
اركىمنىڭ دەنساۋلىعى ءوز قولىندا. ەڭ باستىسى, ادامدار ءوزارا تۇسىنىستىكتە ارەكەت ەتىپ, ءار ىستە سابىر ساقتاي ءبىلۋى كەرەك. سوندا عانا جۇرەككە سالماق تۇسپەيدى.
سپانديار بەكجىگىتوۆ,
وڭتۇستىك قازاقستان وبلىستىق كارديولوگيالىق
ورتالىقتىڭ باس دارىگەرى, مەديتسينا
عىلىمدارىنىڭ دوكتورى, پروفەسسور.
وڭتۇستىك قازاقستان وبلىسى.
