ارينە, زىمىران زاماننىڭ توقتاۋسىز زۋلايتىنى بارىمىزگە بەلگىلى. ايتسە دە ءسوز ويناتۋ ادىسىمەن قۇرىلعان توسىنداۋ تىركەستىڭ اسەر كۇشى اجەپتاۋىر بولادى ەكەن.
ۋنيۆەرسيتەتتە بىزگە ادەبيەت تەورياسىنان ءدارىس وقىعان سۇڭعىلا ۇستازىمىز قادىر مىرزا ءالىنىڭ «قازاق قادىرىنە جەتە الماي جۇرگەن ءبىر نارسە بولسا, ول – ۋاقىت» دەيتىنى دە ەسىمىزدە قالىپ قويىپتى. ويشىل پوەزيانىڭ وسىناۋ ورنى بولەك وكىلى وتپەلى ءومىردىڭ ارزان الدانىشتارىنا ونشا كوپ بوي الدىرماي ءونىمدى ەڭبەك ەتكەنى امبەگە ايان. سونىڭ ايعاعىنداي بولىپ سوڭىندا توم-توم كىتاپتارى قالدى. ال قۇدايدىڭ بەرگەن قابىلەتىن ءارتۇرلى سەبەپتەرمەن تولىق قۋاتىندا پايدالانباي ارماندا كەتكەن اعالارىمىز قانشاما. ولاردىڭ كوبىسى ويىن-ساۋىق قۋىپ, قالامدارىن ەرتە قاڭتاردى. جازۋ-سىزۋدا جانكەشتىلىك تانىتا المادى. «ءتاتتى تامۇققا» بالاناتىن شىعارماشىلىق تىرلىكتىڭ ازابىنا شىدامادى. كۇندىزگى كۇلكىلەرىن, تۇنگى ۇيقىلارىن قيمادى. جاستىقتىڭ جانارتاۋلارى ۇنەمى اتقىلاپ تۇراتىنداي كوردى. ءسويتىپ كەلەلى ىستەردى كەيىنگە ىسىردى. ۋاقىتتىڭ ۋىستا تۇرمايتىنىن ەسكەرمەدى.
ۋاقىت – باعا جەتپەس بايلىق. قادىرىن بىلمەگەندەر قاپى قالادى. بۇل اسىرەسە, كەيىنگى تولقىنعا اقىل رەتىندە ايتىلۋعا ءتيىس كەپ بولسا كەرەك. ويتكەنى وسكەلەڭ ۇرپاق ۋاقىتتى قۇر بوسقا وتكىزبەي, ءىلىم-ءبىلىم جيناۋعا دەن قويۋ قاجەتتىگىن سانالارىنا سىڭىرسە قۇبا-قۇپ.
ىردۋ-دىردۋمەن ىسىراپ بولعان ۋاقىتتىڭ ەسەسى تولۋى ەكىتالاي. وسىندايدا ەرىكسىز ەسكە تۇسەدى. سيدنەي وليمپياداسىنان كەيىن سول دۇنيەجۇزىلىك سپورت دوداسىندا توپ جارعان دۇلدۇلدەرىمىزدى ۇلىقتاۋ سالتاناتى ەكى-ءۇش ايعا سوزىلدى. ماڭدايعا باسقان ماقتاۋلى قىز, جىگىتتەرىمىز ارقانى كەڭگە سالىپ, التاي مەن اتىراۋدىڭ اراسىن الاڭسىز ارالادى. ات ءمىندى, شاپان كيدى, اس ءىشىپ, اياق بوساتتى. بۇلجىماس كەستەنىڭ بۇزىلۋى كەسىرىنەن جاتتىعۋ ۇردىسىنەن جاڭىلدى. اقىرىندا سپورتتىق باپتارىنان ايىرىلدى. ال ايدى اسپانعا شىعارسا دا اسىپ-تاسۋدى بىلمەيتىن كۋبا قابىلاندارى بىرەر اپتالىق دەمالىستان سوڭ بوكس زالىنا قايتا ورالدى. جەڭىسكە جەتۋ جولىنداعى ءاربىر مينۋتىن ءتيىمدى پايدالاناتىن سولاردىڭ الەمدىك ايدىك جارىستاردا جۇلدىزى جانباعاندا قايتەدى ەندى. قاراگوز قانداستارىمىز اراسىنان ەڭ قۇرىعاندا ەكى دۇركىن وليمپيادا چەمپيونىن شىعارا الماي ميتىڭداعان ءبىزدىڭ ءجۇرىسىمىز مىناۋ.
تۇرمىستىق ءتۇرلى تۇيتكىلدەرمەن ۇلكەندى-كىشىلى شەنەۋنىكتەردىڭ تابالدىرىعىن توزدىرۋعا كەتكەن ۋاقىتتىڭ وبالىن كىمنەن سۇرارىڭدى بىلمەيسىڭ. بالپاڭ باسقان باستىقتاردىڭ كوجەدەي كوپ كومەكشىلەرى مەن ك ۇلىمكوز حاتشىلارىنىڭ كوڭىلىن تاۋىپ, كوزدەگەن ماقساتىنا جەتكەنشە ءالسىز الەۋمەتتىڭ جۇيكەسى جۇندەي ءتۇتىلىپ بىتەدى. كۇنگە شىلىم تۇتاتقانداي مىعىم كەيىپتەگى مىرزالاردىڭ قاراۋىنداعىلارعا قىسقا كۇندە قىرىق جينالىس جاساپ, ولاردىڭ ونسىز دا شاش-ەتەكتەن شارۋالارىن ىستەۋىنە كەدەرگى كەلتىرۋى دە قوعامدى جەگى قۇرتتاي جايلاعان كەسەل.
ءازىل-شىنى ارالاس انەۋبىر انەكدوت بار ەدى عوي. سوعان سەنسەك, دۇنيەدە كەلىسكەن مەرزىمنەن كەشىكپەيتىن ەكى حالىق بار ەكەن. ءبىرى – نەمىستەر, ەكىنشىسى – قازاقتار. نەمىستەر نەگىزىنەن ۋاعدالاسقان ساعاتىندا, ال قازاقتار سول كۇنى كەلەدى دەيدى. شىمبايعا باتسا دا شىندىق. الدىن الا حابارلاپ ارنايى شاقىرعان جەردىڭ وزىنە اسپاي-ساسپاي باراتىنىمىز راس قوي. قالادا دا, دالادا دا ءدال ۋاقىتىندا باستالعان قازاقتىڭ تويىن كوردىڭىز بە؟
بۇگىندە ەسى كىرگەن بالادان ەڭكەيگەن قارياعا دەيىن تەلەفونداعى, تەلەديدارداعى, تاعىسىن تاعىلارداعى «قىزىقتاردان» كوز المايتىن ايىقپاس اۋرۋعا ۇشىرادى. مۇنىڭ دەنساۋلىققا زياندىعىن بىلاي قويعاندا, وي-ءورىستى وسىرەر وڭدى قادامداردى تۇساۋلاپ تاستايتىنىن ەسكەرمەيتىنىمىز وكىنىشتى-اق. الەۋمەتتىك جەلىلەردەگى ءمان-ماعىناسىز اڭگىمەلەرگە ماي قۇيۋعا كۇنى-ءتۇنى شارشاماعاندا, قارتايعان اتا-انامىزبەن تىلدەسۋگە نەمەسە نەمەرە-شوبەرەلەرىمىزبەن تازا اۋادا سەرۋەندەۋگە ۋاقىت تاپپايتىنىمىزدى قايتەرسىڭ.
ءيا, ۇرشىقشا اينالعان ۇشقىر ۋاقىت الدى-ارتىنا قارامايدى. سەنىڭ ىرعالىپ-جىرعالعانىڭدى كوتەرمەيدى. قابىلەت قارىمىڭا قاراي قارمانىپ قالۋىڭ كەرەك. ويتپەسەڭ ءوز قاتارىڭنان كەم قالاسىڭ. وتكەن ۋاقىت قايتىپ ورالمايدى. ەندەشە, وزەك ورتەر وكىنىشپەن «قولىمدى مەرزىمىمنەن كەش سەرمەدىم» دەپ كەمكوڭىل كۇن كەشۋدىڭ بەتىن اۋلاق قىلعاي...
