اعىمداعى جىلى جازعى دەمالىس 1-10 سىنىپ وقۋشىلارى ءۇشىن بىرنەشە باعىت بويىنشا ۇيىمداستىرىلادى. بالالار اقمولا وبلىسى اۋماعىنداعى «بوروۆيچوك» جانە «ارمان» لاگەرى, ەرەيمەنتاۋ اۋدانى اۋماعىنداعى «باتىر» شاتىرلى لاگەرىندە, سونداي-اق «تۇلپار» كيىز ءۇي لاگەرىندە دەمالا الادى.
«سونىمەن قاتار, 77 مەكتەپتىڭ جانىندا 1-4 سىنىپ وقۋشىلارىنا ارنالعان مەكتەپ جانىنداعى لاگەر جۇمىس ىستەيتىن بولادى. 5-6 سىنىپ وقۋشىلارى ءۇشىن مەكتەپ جانىنداعى «ديدارلى جاز» سپورتتىق-ويىن الاڭدارى جۇمىس ىستەيدى. 8-10 سىنىپ وقۋشىلارى «ايبىندى ماۋسىم» اسكەري-پاتريوتتىق باعىتتاعى باعدارلاماعا تارتىلادى», – دەپ حابارلادى قالالىق ءبىلىم باسقارماسىنىڭ ءباسپاسوز قىزمەتىندە.
سونداي-اق, مەكتەپتەردە جۇمىسپەن قامتۋدىڭ بىرنەشە ءتۇرى ۇيىمداستىرىلادى: مەكتەپ اۋماعىن كوگالداندىرۋ جانە اباتتاندىرۋ بريگادالارى, زياتكەرلىك, شىعارماشىلىق جانە تىلدىك ۇيىرمەلەر, شىعارماشىلىق كونكۋرستار. وقۋشىلار سارايلارىنىڭ جانىندا «بالالاردىڭ بويتۇمارى» جازعى دەمالىس اكادەمياسى جانە «جازعى شىعارماشىلىق مەكتەبى» ۇيىمداستىرىلادى.
ۆەدومستۆودا اتاپ وتكەندەي, باعدارلاماعا ءجۇزۋ ەلەمەنتتەرىنە وقىتۋ, لينگۆيستيكا ساباقتارى, العاشقى شاحمات ويىنىن ۇيرەتۋ, ينتەراكتيۆتى پارك ەكسپوناتتارىندا جۇمىس ىستەۋ داعدىلارىنا ۇيرەتۋ, باعدارلامالاۋ ساباقتارى, بەينەلەۋ ونەرى ساباقتارى, تەاتر ستۋدياسى جانە ت.ب. ەنگىزىلگەن.
سونداي-اق, حالىقتىڭ الەۋمەتتىك جاعىنان وسال توپتارىنىڭ بالالارى ءۇشىن الماتى قالاسىندا رەسپۋبليكالىق جىل بويعى «بوبەك» لاگەرى جۇمىس ىستەيدى.
«اتا-اناسىنىڭ قامقورلىعىنسىز قالعان بالالار, از قامتىلعان وتباسىلارىنان شىققان بالالار, سونداي-اق, مۇگەدەك بالالار مەكتەپتەردىڭ وتىنىمدەرى بويىنشا تەگىن نەگىزدە دەمالۋدىڭ, ساۋىقتىرۋدىڭ جانە جۇمىسپەن قامتۋدىڭ بارلىق تۇرلەرىمەن قامتاماسىز ەتىلەدى», – دەلىنگەن قالالىق ءبىلىم باسقارماسىنىڭ ءباسپاسوز حابارلاماسىندا.
