ەلوردانىڭ قۇرىلىس جانە تۇرعىن ءۇي ساياساتى باسقارماسىنىڭ مالىمەتىنشە, نىساندى قىركۇيەك ايىندا تاپسىرۋ جوسپارلانىپ وتىر. ءورت ءسوندىرۋ دەپوسى عيماراتىنىڭ ءۇي-جايلارىن جوسپارلاۋ كەزەكشى اۋىسىم جەكە قۇرامىنىڭ دابىلى بويىنشا كەدەرگىسىز قوزعالىستى قامتاماسىز ەتەدى.
اتاپ ايتقاندا, ءورت ءسوندىرۋ بولىمشەلەرىن جەدەل جيناۋ ءۇشىن كەزەكشى اۋىسىمداردىڭ دەمالىس ورنى اۆتوموبيل پاركىنىڭ جانىندا, ياعني ءبىرىنشى قاباتتا ورنالاسادى.
جاڭا دەپونىڭ ءبىرىنشى قاباتىنا ديسپەتچەرلىك بايلانىس تورابىن, پەرسونالعا ارنالعان بولمەنى, كيىم مەن ءورت جەڭدەرىن كەپتىرۋگە ارنالعان ءۇي-جايدى, سونداي-اق شەبەرحانانى ورنالاستىرۋ جوسپارلانعان. اككۋمۋلياتور تامبۋرى بار جەكە ءۇي-جاي دا قاراستىرىلعان.
اس ىشۋگە ارنالعان بولمە ەكىنشى قاباتتا ورنالاسادى. سونداي-اق, كەزەكشى اۋىسىمدارعا ارنالعان كيىمدەر ىلىنەدى. ءۇشىنشى قاباتتا جەكە ايماققا بولىنگەن 40 ورىندىق جاتاقحانا, كەڭەس زالى, پسيحولوگيالىق جەڭىلدەۋ بولمەسى بار سپورت زالى, وقۋ سىنىبى, جول قوزعالىسى قاۋىپسىزدىگى كابينەتى, ينسپەكتورلار كابينەتى جانە حالىققا نۇسقاۋلىق بولمەسى قاراستىرىلعان.
دەپونىڭ ءتورتىنشى قاباتى قىزمەتكەرلەرگە ارنالعان پاتەر رەتىندە پايدالانىلماق. جەرتولەدە قويمالار, گاز ءتۇتىن قىزمەتى بەكەتى, جەلدەتكىش كامەرالار ورنالاسادى.
جاڭا دەپو ۋچاسكەسىندە 50 م3 ءورت ءسوندىرۋ رەزەرۆۋارى جانە اۆتوكولىك تۇراعىنا ارنالعان الاڭى بار ءورت گيدرانتى, ەكى رەزەرۆۋارى بار ەكى باعاناعا اجقس, وقۋ مۇناراسى بار الاڭ, كەدەرگىلەرى بار 100 مەترلىك جولاققا ارنالعان الاڭ, امبەباپ الاڭ, سونداي-اق دەمالۋعا جانە شارۋاشىلىققا ارنالعان الاڭ ورنالاساتىن بولادى.
ءورت ءسوندىرۋ دەپوسىنىڭ قۇرىلىسىنا بارلىعى 91 ادام جۇمىلدىرىلدى.
قازىرگى ۋاقىتتا قالالىق ورتانى رەگەنەراتسيالاۋ باسقارماسى ءۇش ءورت ءسوندىرۋ دەپوسىن, ونىڭ ىشىندە №28 كوشەدە, «كوكتال» تۇرعىن الابى مەن «ۇركەر» تۇرعىن الابىندا جوبالاۋدى باستايدى. جاڭا دەپولاردىڭ قۇرىلىسى 2020 جىلعا جوسپارلانعان.
