دوڭگەلەك ۇستەلگە ورىس ءتىلدى وقىرماندار دا اتسالىستى. رومان تاقىرىبىن يگەرگەن وقىرماندار كەزەگى كەلگەندە ارقايسىسى ءوزى جەتىك مەڭگەرگەن تىلدە ءوز ويلارىن ورتاعا سالىپ وتىردى. دەگەنمەن, شارا بارىسىندا انا تىلگە دەگەن قۇرمەت ايرىقشا اڭعارىلىپ تۇردى. رومان – اقساق تەمىردىڭ بولمىسىن اشۋعا ارنالعاندىقتان, وتكەن تاريحىمىز ەلباسى ن.نازارباەۆتىڭ « ۇلى دالانىڭ جەتى قىرى» اتتى ماقالاسىنىڭ تاقىرىبىمەن دە ۇيلەسىم تاپتى.
شارا باستاماسىندا ماگيسترانت گۇلۆيرا مۇقانباەۆا «ءبىر ەل – ءبىر كىتاپ» اكتسياسىنىڭ تاريحىنا جالپى شولۋ جاسادى. بۇل جوبانىڭ اقش-تا كەزىندە وتە تانىمال بولعاندىعى, ءبىر كىتاپتى جالپى قالا بولىپ وقۋ يدەياسى اقش-تىڭ سولتۇستىك-باتىسىندا, ۆاشينگتون شتاتىنا قاراستى – سيەتل كوپشىلىك كىتاپحاناسىنىڭ كىتاپ ورتالىعى تاراپىنان ۇسىنىلعاندىعى جونىندە ايتىپ بەردى. ودان ءارى «مەنىڭ جولىم» اتتى سويلەيتىن گازەت پەن «ربنسگ – ۆەستي» جۋرنالىنىڭ رەداكتورى, اقىن نۇرلان ابدىبەكوۆ ءىس-شارانىڭ ماقساتى مەن جازۋشىنىڭ قايتالانباس وزىندىك ەرەكشەلىكتەرى تۋرالى كىرىسپە سوزبەن باستاپ, ودان ءارى دوڭگەلەك ۇستەلدى ءجۇرگىزۋدى ءوز قولىنا الدى. ول جازۋشىنىڭ روماندى جازۋداعى ستيلدىك ەرەكشەلىكتەرىنە توقتالدى. الدىمەن روماننىڭ تاريحيلىعى ماسەلەسى قوزعالدى. روماندى تالداي وتىرىپ ءامىرشىنىڭ تاريحي تۇلعا رەتىندە ناقتى دەرەكتەردى مىسالعا كەلتىرە, ونىڭ ناقتى ءومىربايانى ءسوز بولدى. بۇل اقپارات كوركەم شىعارما كەيىپكەرى مەن ومىردە بولىپ وتكەن تۇلعانىڭ اراسىنداعى بايلانىستار تۋرالى وقىرماندارعا جان-جاقتى ءتۇسىنىك بەردى. سونىمەن قاتار ءابىشتىڭ وبرازداردى اشۋداعى فيلوسوفيالىق وي تولعامدارى دا نازاردان تىس قالمادى. سونداي-اق, تەرەڭ پسيحولوگيالىق تەبىرەنىستەرگە قۇرىلعان كەيىپكەرلەر بەينەسىن سومداۋداعى جازۋشى شەبەرلىگى دە كىتاپتان مىسال كەلتىرىلە وتىرىلىپ تالداندى.
شارادا بەلگىلى اقىن زەينوللا تىلەۋجان ۇلى, قىزدار ۇلتتىق پەداگوگيكا ۋنيۆەرسيتەتىنىڭ مۋزىكا ءپانىنىڭ وقىتۋشىسى, زاعيپ ازامات, پروفەسسور مەدەلحان قونىسباەۆ, زاعيپ اقىن ابەتحان توقتاعاندار جازۋشى تۋرالى ەستەلىكتەر ايتىپ, ءىس-شاراعا كەلگەن قوناقتاردىڭ سونشالىقتى ءبىر جىلى قابىلداۋىنا سەبەپشى بولىپ وتىردى. ولار دا جازۋشىنىڭ ءومىرى مەن شىعارماشىلىعىنا كەڭىنەن توقتالدى. باستى كەيىپكەر ءامىرشىنىڭ كىشى حانىمىنا عاشىق بولعان ورتوبەلىك شەبەردىڭ سەزىمى مەن ماحابباتى ءوزى سوققان مۇنارادا بەينەلەنەدى. ماحاببات مۇناراسى جورىقتان قايتقان ءامىرشىنىڭ كوزىنە وتتاي باسىلادى. شەبەر حانىمعا ءوزىنىڭ سەزىمىن مۇنارا ارقىلى بىلدىرگەنى ءۇشىن اۋىر جازالانادى.
سونىمەن قاتار جازۋشى ءا.كەكىلباەۆتىڭ وزگە دە كىتاپتارى جونىندە جانە تەڭدەسسىز شىعارماشىلىق جۇمىسىنا ءتانتى بولعان كىتاپحانانىڭ زاعيپ وقىرماندارى ۆ.ۆ. يۆانوۆسكي, ي.م. رزاحۋنوۆنا ءوز ويلارىن ورتاعا سالىپ, ءسوز سويلەدى.
شارا سوڭىندا كىتاپحانا ديرەكتورى ا.بايۇزاقوۆ «ءبىر ەل – ءبىر كىتاپ» رەسپۋبليكالىق اكتسياسى اياسىندا قازاق ادەبيەتىندەگى قۇندى تۋىندىلاردى ناسيحاتتاۋ, جاستارعا رۋحاني-پاتريوتتىق تاربيە بەرۋ, وقىرمانداردى كىتاپحاناعا تارتۋ جانە كوركەم ادەبيەت وقۋعا باۋلۋ ماقساتىندا ءارتۇرلى جۇمىس تۇرلەرىن قولدانۋ كەرەك ەكەندىگىن اتاپ ءوتتى.
ساپارباي پارمانقۇل,
«ەgemen Qazaqstan»
