«ادامداردىڭ ءومىر ساپاسىن جاقسارتۋ ءىKomek ورتالىعىن اشۋدىڭ دا, جۇمىسىنىڭ دا باستى ماقساتى. توتەنشە جاعدايلاردان باسقا ماسەلەلەردىڭ بارلىعىنا ورتالىق جاۋاپ بەرەدى», دەيدى ءىKomek ورتالىعىنىڭ ديرەكتورى مارعۇلان القۋات ۇلى.
ورتالىقتا 28 ادام جۇمىس ىستەيدى, ولاردىڭ تورتەۋى اكىمشىلىك توپتا, قالعان 24 ادام وپەراتور, ينسپەكتور, ساراپشى رەتىندە قىزمەت كورسەتەدى. ورتالىقتىڭ اشىلۋ سالتاناتىندا مارعۇلان القۋات ۇلى وبلىس اكىمى ارحيمەد مۇحامبەتوۆكە قىزمەت سيپاتىن بايانداپ بەردى.
«الداعى ۋاقىتتا تۇرعىندار سۇراقتارىن كوممۋنيكاتسيانىڭ بارىق سالالارى ارقىلى, ناقتىراق ايتساق, بارلىق الەۋمەتتىك جەلىلەر, WhatsApp, موبيلدىك بايلانىس ارقىلى دا قابىلدايتىن بولامىز. مۇنىڭ سىرتىندا facebook, Instagram سەكىلدى الەۋمەتتىك جەلىلەر ارقىلى مونيتورينگ ەنگىزىلدى, سونىمەن قاتار «سمارت كوستاناي» موبيلدىك قوسىمشاسىمەن دە تىزە قوسۋ ويدا بار. ءبىز اشىلعان تاۋلىكتىڭ وزىندە 20 تۇرعىننان قوڭىراۋ ءتۇستى. ادامدار قويعان ماسەلەلەردىڭ بارلىعى دەرلىك كومپيۋتەر بازاسىنا ەنگىزىلگەن. ەگەر ول انىقتاۋدى كەرەك ەتەتىن بولسا, ونى ساراپشىلار الىپ, ءتيىستى ورگاندارمەن, ماماندارمەن جۇمىس ىستەپ, 7 كۇن ىشىندە جاۋابىن بەرەدى» دەدى مارعۇلان القۋات ۇلى.
ورتالىقتا ءبىر مىڭنان اسا قىزمەت ءتۇرى ەنگىزىلگەن. بارلىق اتقارۋ ورگاندارى مەن كوممۋنالدىق قىزمەت تۇگەل قاتىستىرىلعان. مامانداردىڭ ايتۋىنشا, قوستاناي قالاسى تۇرعىندارىنان تاۋلىگىنە 1,5 مىڭداي قوڭىراۋ ءتۇسۋى ىقتيمال. ورتالىق تاۋلىك بويى جۇمىس ىستەيتىن بولادى. ەگەر سۇراق كوبەيىپ, قىزمەتكەرلەر ۇلگەرە امايتىنداي بولسا, وندا شتاتتى كەڭەيتۋ دە ويدا بار ەكەنى ايتىلدى.
«العاشقى ايدا ءىKomek ورتالىعىنىڭ جۇمىسىن ەرەكشە باقىلاۋعا الۋ كەرەك. راس, جاڭا قۇرىلىم, جۇمىس ەندى قولعا الىنعاندىقتان تاجىريبە جيناقتاۋ كەرەك ەكەنى دە تۇسىنىكتى. بىراق قىزمەت وتە ساپالى كورسەتىلۋى ءتيىس. قالا تۇرعىندارىنىڭ وتىنىشتەرى مەن سۇراقتارىنا جىلدام قۇلاق اسىپ, ونىڭ ورىندالۋى دا ءتيىستى ورىندار تاراپىنان تەزدەتىلسىن. ءبىر اي جۇمىس جاقسى جۇرسە, ودان ارعى ۋاقىتتا قالىپتاسادى, رەتكە كەلەدى», دەدى وبلىس اكىمى ارحيمەد مۇحامبەتوۆ.
ەسكە سالا كەتسەك, ەلباسى نۇرسۇلتان نازارباەۆ وتكەن جىلى قاراشا ايىنىڭ سوڭىنداعى ءۇش ازاماتتىق فورۋمدا بەرگەن تاپسىرماسىنا وراي, ءىKomek ورتالىعى العاش رەت نۇر-سۇلتان قالاسىندا اشىلىپ, وتكەن جىلدىڭ اياعىندا جۇمىس ىستەي باستادى. قوستانايلىق ماماندار نۇر-سۇلتان قالاسىنا ارنايى بارىپ, ورتالىق تاجىريبەسىن ۇيرەنىپ قا يتقان بولاتىن. سونىڭ ناتيجەسىندە مۇنداي ورتالىق قازاقستاندا ەكىنشى رەت قوستانايدا اشىلدى.
