ۇلتتىق ەكونوميكا ءمينيسترى ر. دالەنوۆ قاڭتار–ساۋىر ايلارىندا ءجىو ءوسىمى 4% جەتكەنىن ايتتى.
«قاڭتار-ناۋرىزدا ول 3,8% قۇرادى. اتالعان قارقىنعا وڭدەۋ ونەركاسىبىندەگى, قىزمەتتەر سالاسىنداعى جەدەلدەۋ, سونداي-اق, قۇرىلىس پەن اۋىل شارۋاشىلىعىنداعى تۇراقتى قارقىنداردىڭ ارقاسىندا قول جەتكىزىلدى», دەدى ر. دالەنوۆ.
ينۆەستيتسيالار سەرپىنى جالپى ىشكى ءونىمنىڭ ءوسۋ قارقىنىنان اسىپ تۇسەدى. ءوسۋ 6,7%-دى قۇرادى. اۋىل شارۋاشىلىعىندا, قۇرىلىستا جانە ونەركاسىپتە ينۆەستيتسيالار ايتارلىقتاي ءوستى. بيىلعى 1 ساۋىردە حالىقارالىق قورلار $86 ملرد قۇرادى.
قاڭتار-ساۋىردە ونەركاسىپ ءوندىرىسى 2,9%-عا ءوستى. ءوسىم وڭدەۋ ونەركاسىبىندەگى وزىق قارقىندارى ەسەبىنەن قامتاماسىز ەتىلدى.
«وڭدەۋ ونەركاسىبىندە وسۋگە باعىتتالعان ترەند ساقتالىپ وتىر. 4 ايدا شىعارىلىم 3,5% دەيىن ۇلعايدى. ءى توقساندا ءوسۋ 1,6% قۇراعان بولاتىن. وڭدەۋ قارقىنىنىڭ ارتۋىنا مۇنايدى قايتا وڭدەۋدەگى, ماشينا جاساۋداعى, سۋسىندار وندىرۋدەگى ءوسۋدىڭ ۇدەۋى, سونداي-اق فارماتسەۆتيكانىڭ پليۋستىك ايماققا شىعۋى اسەر ەتتى», دەدى ر. دالەنوۆ.
ال قۇرىلىس سالاسىنداعى سەرپىن تۇراقتى. قۇرىلىس جۇمىستارىنىڭ كولەمى 8,4%-عا ءوستى.
اۋىل شارۋاشىلىعى تۇراقتى ءوسۋ قارقىنىن ۇستاپ تۇر. ءوندىرىس كولەمى 3,6%-عا ارتتى. ءوسۋ مال شارۋاشىلىعىنىڭ 3,7%-عا ۇلعايۋى ەسەبىنەن قامتاماسىز ەتىلدى. بۇل رەتتە, وسىمدىك شارۋاشىلىعى وتكەن جىلعى دەڭگەيدە ساقتالدى.
سونىمەن قاتار, ءوسۋدىڭ جەدەلدەۋى كورسەتىلەتىن قىزمەتتەر سالاسىندا بايقالادى. ەسەپتى كەزەڭدە ول ءى توقسانداعى 3,7% قاراعاندا 4,2% ءوستى.
«ساۋدا – كورسەتىلەتىن قىزمەتتەر سەگمەنتىندە ءوسۋدىڭ الدىڭعى قاتارىندا. ونىڭ ءوسۋى 7,3% دەڭگەيىندە تىركەلدى. بۇل نەگىزىنەن اۆتوكولىك قۇرالدارىن, اۆتوبولشەكتەردى, مۇناي ونىمدەرىن جانە جانار-جاعار ماي ساتۋدى ارتتىرۋمەن بايلانىستى», دەدى ۇلتتىق ەكونوميكا ءمينيسترى.
كولىك سالاسىندا 4,8%-عا دەيىن ۇدەۋ تىركەلدى: اۋە كولىگىنىڭ جۇك اينالىمى 1,9 ەسەگە, اۆتوموبيل كولىگىنىڭ جۇك اينالىمى 9,7%-عا ءوستى.
وسى جىلعى قاڭتار-ناۋرىزدا سىرتقى ساۋدا اينالىمى $20,4 ملرد قۇراعانىن ايتا كەتكەن ءجون. ەكسپورت كولەمى $13,3 ملرد قۇرادى. مۇناي مەن مەتالداردى قوسپاعاندا ەكسپورتتىق جەتكىزىلىمدەردىڭ ءوسۋى ەكى تاڭبالى سانعا جەتتى – 19,8%.
ۇلتتىق بانك توراعاسى ە. دوساەۆ 2019-2020 جج. ينفلياتسيا بەلگىلەنگەن ماقساتتى ءدالىز 4-6% شەگىندە ساقتالعانىن ايتتى. جىل باسىنان بەرى كورسەتكىش 1,8% قۇرادى. ساۋىردە ايلىق ينفلياتسيا 0,5% قۇرادى. تەڭگە جىل باسىنان بەرى 1% نىعايدى.
«7-20-25» باعدارلاماسى اياسىندا 12 830 ءوتىنىم قابىلداندى. بۇگىندە 88,2 ملرد تگ جالپى سوماسىنا 7 633 ءوتىنىم ماقۇلداندى, ونىڭ 74,9 ملرد تەڭگەگە 6 380-ءى بەرىلدى.
سالالىق باعىتتار بويىنشا كورسەتكىشتەردىڭ تومەندەۋ سەبەپتەرى جانە وڭ قارقىنعا قول جەتكىزۋ ءۇشىن جاسالىپ جاتقان جۇمىستاردى قاراۋ بارىسىندا يندۋستريا جانە ينفراقۇرىلىمدىق دامۋ ءمينيسترى ر. سكليار, ەنەرگەتيكا ءبىرىنشى ۆيتسە-ءمينيسترى م. دوسمۇحامبەتوۆ, ماڭعىستاۋ وبلىسىنىڭ اكىمى ە. توعجانوۆ, اقمولا وبلىسىنىڭ اكىمى ە. مارجىقپاەۆ, نۇر-سۋلتان قالاسىنىڭ اكىمى ب. سۇلتانوۆ بايانداما جاسادى.
يندۋستريا جانە ينفراقۇرىلىمدىق دامۋ ءمينيسترى ر. سكليار مالىمدەگەندەي, اعىمداعى جىلدىڭ سوڭىنا دەيىن كومىر ءوندىرۋ, قارا مەتاللۋرگيا, تەمىر كەنىن ءوندىرۋ كولەمى بويىنشا جاعداي رەتكە كەلتىرىلەدى.
«كومىر ءوندىرۋشى كومپانيالاردىڭ كەلىسىمشارتتارى بار, جوسپارلى كورسەتكىشتەرگە قول جەتكىزەمىز. قارا مەتاللۋرگياعا كەلەر بولساق, تاۋلىگىنە 12 مىڭ تونناعا جەتتى, مامىر ايىنىڭ سوڭىنا قاراي شامامەن 340 مىڭ توننا بولات شىعارىلادى, مامىر ايىنىڭ سوڭىنا دەيىن قارا مەتاللۋرگيا ءوندىرىسىنىڭ جوسپارلانعان كورسەتكىشتەرىنە جەتەمىز», دەدى ر. سكليار.
ەنەرگەتيكا ءبىرىنشى ۆيتسە-ءمينيسترى م. دوسمۇحامبەتوۆ بيىلعى ءتورت ايدا مۇناي ءوندىرۋ كورسەتكىشتەرى 29,5 ملن توننانى قۇراعانىن, بۇل جوسپارعا 100% سايكەس ەكەنىن ايتتى. الايدا, وتكەن ايمەن سالىستىرعاندا, اعىمداعى جىلدىڭ مامىر ايىنىڭ سوڭىنا دەيىن اياقتالۋى ءتيىس, كەن ورىندارىنداعى جوسپارلانعان جۇمىستارمەن بايلانىستى 1,1% -عا تومەندەۋ بايقالادى. جۇمىستى قالپىنا كەلتىرۋگە بايلانىستى جىل سوڭىنا دەيىن مۇناي ءوندىرۋ كورسەتكىشتەرى جوسپارلانعان كەستەگە سايكەستەندىرىلەدى.
