وقۋ جىلىنىڭ اياقتالۋىنا وراي, وقۋشىلار مەن اتا-انالاردى مەكتەپ ءبىتىرۋ كەشىن وتكىزۋدىڭ فورماتى الاڭداتادى. مينيسترلىك ولارعا اتا-انالار كوميتەتىنىڭ اقشا جينايتىندىعى تۋرالى حابارلاما ءجيى تۇسەتىندىگىن ايتادى. ول كوپتەگەن اتا-انا ءۇشىن وتباسىلىق بيۋدجەتكە سالماق سالاتىنى انىق. مەكتەپ قابىرعاسىندا اقشا جينالماۋى كەرەك دەپ جىل سايىن ايتىلعانمەن, اتا-انالار بالالارىنىڭ مەكتەپ ءبىتىرۋ كەشىن ءسان-سالتاناتپەن وتكىزۋدى دوعارار ەمەس. ارينە, ولار كەشتى ەستە قالارلىقتاي, بالالارعا قىزىقتى ەتىپ ۇيىمداستىرعىلارى كەلەدى. ايتسە دە, ول شىعىندى ەكىنىڭ ءبىرىنىڭ قالتاسى كوتەرە بەرمەيدى. بۇل جاعداي جىل سايىن كوتەرىلەتىن ماسەلەگە اينالدى.
مۇنداي حابارلامالارعا جاۋاپ رەتىندە ءبىلىم جانە عىلىم مينيسترلىگى ءوز تاراپىنان مەكتەپ ءبىتىرۋ كەشىن اقشانى ۇنەمدەۋ ءۇشىن ءدامحانا, مەيرامحانالاردا ەمەس, مەكتەپ قابىرعاسىندا وتكىزۋدى ۇسىندى. سونداي-اق مينيسترلىك مەكتەپ ءبىتىرۋ كەشىنىڭ ماقساتى ءساندى كيىمدەر مەن مول داستارقاندى كورسەتۋ ەمەس, بالالاردىڭ, مۇعالىمدەر مەن اتا-انالاردىڭ ەسىندە قالارلىق مەكتەپىشىلىك جيىن دەپ ەسەپتەيدى.
«مەكتەپ ءبىتىرۋ كەشىنىڭ فورماتى قىمبات ءارى ءسان-سالتاناتقا تولى كەش بولماۋى كەرەك. جىلدار بويى تۇلعانى قالىپتاستىرۋدا تالماي ەڭبەك ەتكەن پەداگوگتار مەن اتا-انالار جانە تاياۋدا مەكتەپ قابىرعاسىنان تۇلەپ ۇشىپ, ۇلكەن ومىرگە قادام باساتىن كەشتىڭ باستى كەيىپكەرلەرى — تۇلەكتەر اراسىنداعى جىلى ديالوگ تۇرىندە وتكەنى ابزال» دەپ حابارلادى مينيسترلىكتىڭ ءباسپاسوز قىزمەتى.
سونداي-اق بعم بۇل كەشتە وقۋدا وزات, جەتىستىككە جەتكەن, مەكتەپ, اۋدان, قالا, وبلىس, رەسپۋبليكالىق, حالىقارالىق دەڭگەيدەگى سپورتتىق, ينتەللەكتۋالدىق جارىستاردا جەڭىمپاز بولعان, مەكتەپتىڭ قوعامدىق ومىرىنە بەلسەندى اتسالىسقان بالالاردى قۇرمەتپەن اتاپ ءوتۋ ورىندى ەكەنىن اتاپ ءوتتى.
مينيسترلىكء باسپاسوز قىزمەتىنىڭ حابارلاۋىنشا, تۇلەكتەر مەكتەپ ءبىتىرۋ كەشىن پەداگوگتاردىڭ كومەگىمەن كرەاتيۆتى باعدارلاما دايىنداپ, اتا-انالارىنا, سۇيىكتى ۇستازدارىنا جانە جانىنا جاقىن سىنىپتاستارىنا العىستارىن بىلدىرەتىن ماعىنالى ءارى قىزىقتى فورماتتا ۇيىمداستىرۋىنا بولادى.
ەستەرىڭىزگە سالا كەتەيىك, مەكتەپ ءبىتىرۋ كەشىندە شارانىڭ وتكىزىلۋى,
قاتىسۋشىلاردىڭ ءومىرى مەن دەنساۋلىعى ءۇشىن جاۋاپكەرشىلىك مەكتەپ اكىمشىلىگىنىڭ
موينىندا بولادى.
