بۇگىن وبلىستىق تىلدەردى دامىتۋ باسقارماسى ۇيىمداستىرعان «ءتىل تاريحى: ءجۇز جىلدىق جىلناما» اتتى پۋبليتسيستيكالىق شىعارمالار بايقاۋىنىڭ جەڭىمپازدارى ماراپاتتالدى. ءبىر اي بۇرىن جاريالانعان بايقاۋعا جەتىسۋلىق جۋرناليستەر, ءتىل مەن رۋح جاناشىرلارى قىزىعۋشىلىقپەن قاتىسىپ, «Egemen Qazaqstan» گازەتىنىڭ ۇلت ءتىلىنىڭ دامۋىنا قوسقان ۇلەسى مەن قازاق رۋحانياتىنداعى ورنىن سارالاعان شىعارمالارىن ۇسىندى.
قازىلار القاسىنىڭ تالقىسىنا تۇسكەن ەڭبەكتەردىڭ اراسىنان 5 اۆتوردىڭ جۇمىسى ىرىكتەلىپ, جۇلدەگە ىلىكتى. ناتيجەسىندە, باسىلىمنىڭ 100 جىلدىق مەرەيتويىنا وراي وتكىزىلگەن «ءتىل تاريحى: ءجۇز جىلدىق جىلناما» اتتى پۋبليتسيستيكالىق شىعارمالار بايقاۋىنىڭ 1-ورىنى وبلىستىق «Jetisu» گازەتىنىڭ ءتىلشىسى بولات ماجيتكە بۇيىردى. ال جۇلدەلى 2-ورىندى جاس جۋرناليست داستان قاستاي قانجىعاسىنا بايلادى. سونداي-اق 3-ورىندى «Jetisu» گازەتىنىڭ ءتىلشىسى قاجەت اڭداس جەڭىپ الدى. بۇدان سوڭ, ەكى ىنتالاندىرۋ سىيلىعى «قاراتال» اۋداندىق گازەتىنىڭ باس رەداكتورى اسحات ومىرباەۆ پەن «Jetisu» گازەتىنىڭ ءتىلشىسى مۇحتار كۇمىسبەككە بەرىلدى.
تالدىقورعاندا وتكەن سالتاناتتى جيىندى اشقان وبلىستىق تىلدەردى دامىتۋ باسقارماسىنىڭ باسشىسى ايدار باشباەۆ قازاق ءتىلىنىڭ تاعدىرلى تاريحىنداعى ءباسپاسوزدىڭ الاتىن ورنىن ايشىقتاپ, «Egemen Qazaqstan» گازەتىنىڭ ۇلت دامۋى مەن ءتىل مادەنيەتىن قالىپتاستىرۋداعى عاسىرلىق شەجىرەسىنە توقتالدى. جيىندا باسىلىم ارداگەرى, كەزىندە گازەتتە مەنشىكتى ءتىلشى بولعان اعا بۋىن جۋرناليست ءالي ىسقاباي, بەلگىلى سىقاقشى تۇرلىحان كارىم جانە ءنۇسىپباي ءابدىراحىم, بولات اباعان سىندى جەتىسۋلىق مايتالمان قالامگەرلەر ءسوز الىپ, باس باسىلىمعا 100 جىل تولۋىمەن قۇتتىقتادى.
سونداي-اق يگى شارا بارىسىندا باسىلىمنىڭ الماتى وبلىسىنداعى مەنشىكتى ءتىلشىسى قالماحانبەت مۇقامەتقالي بايقاۋدى ۇيىمداستىرعان وبلىس اكىمدىگىنە, تىلدەردى دامىتۋ باسقارماسىنا جانە قالىڭ وقىرمانعا «Egemen Qazaqstan» گازەتىنىڭ باسقارما توراعاسى دارحان قىدىرالىنىڭ اتىنان العىس ايتتى.
