INURA – 10 مىڭعا جۋىق امپەرمەن, ۇزاقتىعى 80 نانوسەكۋند جانە 400,000 ەۆ-قا دەيىن ەنەرگيانى (پروتوندار مەن كومىرتەگى يوندارى) بەرەتىن جوعارى ءيمپۋلستى يون ۇدەتكىشى. INURA ۇدەتكىشى ىرگەلى جانە قولدانبالى زەرتتەۋلەردىڭ كەڭ اۋقىمى ءۇشىن ازىرلەنگەن كوپ ماقساتتى زەرتتەۋ كەشەنى. اتالعان ۇدەتكىش ارقىلى قۇرىلعان يوندىق ساۋلە – ءتۇرلى قاتتى زاتتاردىڭ, سونىڭ ىشىندە نانوماتەريالداردىڭ قۇرىلىمدىق موديفيكاتسياسى ءۇشىن بىرەگەي جانە ءتيىمدى قۇرال. بۇدان بولەك, INURA ۇدەتكىشى جوعارى قۋاتتى يوندىق ساۋلەلەر فيزيكاسى جانە پلازما فيزيكاسى سياقتى سالالاردا جاڭا عىلىمي ناتيجەلەر بەرەدى.
ۇدەتكىشتى ىسكە قوسۋ بويىنشا نازارباەۆ ۋنيۆەرسيتەتى عىلىمي-زەرتتەۋ توبىنىڭ جەتەكشىسى, ۋنيۆەرسيتەت پرەزيدەنتىنىڭ كەڭەسشىسى, قانات بايعارين INURA ءسوزى جۇيەلى جۇمىستىڭ تولىق اتاۋىنان (Innovative Nazarbayev University’s Research Accelerator) باستاپقى ءارىپتەردىڭ قوسىندىسىنان قىسقارتىلىپ الىنعانىن ايتتى. «ەكىنشى جاعىنان نۇرا وزەنىنىڭ اتاۋى «اي» ءسوزىنىڭ ايشىقتالۋىمەن وزىندىك بەلگى رەتىندە جازىلعانداي. نۇرا – قازاقستاننان باستاۋ الاتىن ەلىمىزدەگى ەڭ ءىرى وزەندەردىڭ ءبىرى. INURA ۇدەتكىشى دە – ءبىزدىڭ مەملەكەتتەن باستاۋ العان تىڭ جوبا», دەدى توپ جەتەكشىسى. ونىڭ ايتۋىنشا, اۋقىمدى ءىستىڭ باسى-قاسىندا نۋ عىلىم جانە تەحنولوگيالار مەكتەبىنىڭ اسسيستەنت-پروفەسسورى الەكساندر تيحونوۆ پەن عىلىمي قىزمەتكەرى مارات كايكانوۆ بار.
ق.بايعارين INURA ۇدەتكىشى ءبىلىم جانە عىلىم مينيسترلىگى قارجىلاندىراتىن عىلىمي-تەحنيكالىق باعىتتاعى بەس جىلدىق «نۋ-بەركلي زاتتىڭ, پەرسپەكتيۆالى ماتەريالدار مەن ەنەرگيا كوزدەرىنىڭ سىني جاعدايىن زەرتتەۋدىڭ ستراتەگيالىق باعدارلاماسىن» جۇزەگە اسىرۋ اياسىندا قۇرىلعانىن اتاپ ءوتتى. ال اتالعان وتاندىق ۋنيۆەرسيتەتتەگى استانا ۇلتتىق زەرتحاناسىنىڭ اعا عىلىمي قىزمەتكەرى مەڭدىحان حاسەنوۆ ۇدەتكىشتىڭ جوعارى وقۋ ورنىنداعى ەڭ نەگىزگى بازالىق قۇرال ەكەنىن جەتكىزدى. ونىڭ ايتۋىنشا, وسى قۇرال ءتۇرلى قاتتى دەنەلەر مەن جاڭا ماتەريالدارعا زەرتتەۋ جۇرگىزۋگە جاردەمدەسەدى. «بۇل – حالىقارالىق دەڭگەيدە اتقارىلعان جۇمىس. ءبىز اۋەلى امەريكاداعى بەركلي ۇلتتىق زەرتحاناسىمەن جۇمىس باستادىق. سونان سوڭ رەسەيلىك تومسك ۇلتتىق زەرتتەۋ پوليتەحنيكالىق ۋنيۆەرسيتەتى قوسىلدى. ءار شەتەلدىك جۇمىستىڭ جاقسى جاعىن ءوزىمىزگە الىپ, وسىندا قۇراستىردىق», دەيدى م.حاسەنوۆ. عىلىمي قىزمەتكەردىڭ ءمالىمەتىنشە, زەرتتەۋ جۇرگىزەتىن جۇمىس كەشەنىن ءازىرلەۋگە 3-4 جىل جۇمسالىپتى. سەبەبى امەريكالىقتار بەرگەن كەيبىر دايىن ەلەمەنتتەردى قۇراستىرۋ قيىنعا ءارى قىمباتقا تۇسەتىن بولعاندىقتان, رەسەيلىكتەرمەن بىرىگىپ جۇمىستى جەڭىلدەتۋگە ءبىرشاما ۋاقىت قاجەت بولعان.
