قوناقتار 109 ينتەللەكتۋالدى بايلانىس ورتالىعىنىڭ, بىرىڭعاي قالالىق بەينەباقىلاۋ جۇيەسى مەن تالداۋ ورتالىعىنىڭ جۇمىسىمەن تانىستى.
ەلباسى نۇرسۇلتان نازارباەۆتىڭ تاپسىرماسىمەن, قالالار, اۋداندار اكىمدەرى تسيفرلىق تەحنولوگيالاردى پايدالانا وتىرىپ, اشىق كەدەرگىسىز كەڭىستىكتە ءبىر تەرەزە قاعيداسى بويىنشا حالىققا قىزمەت كورسەتۋ جۇيەسىن ەنگىزۋى قاجەت. مۇنداي ءتيىمدى قىزمەت كورسەتۋدىڭ ۇلگىسى – ەلوردالىق iKomek مونيتورينگ جانە جەدەل ارەكەت ەتۋ ورتالىعى بولىپ تابىلادى. iKomek ورتالىعى 2018 جىلدىڭ باسىنان بەرى ورىن العان جاعداياتتار مەن اپاتتاردى شەشۋدە كوممۋنالدىق جانە جەدەل قىزمەتتەر جۇمىسىن ۇيلەستىرۋ جانە باقىلاۋ, سونىمەن قاتار ازاماتتاردىڭ وتىنىشتەرىن قابىلداۋ ماقساتىندا جۇمىس ىستەيدى.
«2018 جىلدىڭ باسىنان iKomek ورتالىعىنا ميلليوننان استام ءوتىنىش كەلىپ ءتۇستى. ونىڭ 77% «ءبىرىنشى قوڭىراۋدان-اق» شەشىلدى. 2019 جىلدىڭ باسىنان 570 مىڭ ءوتىنىش قابىلداندى. قالا تۇرعىندارىنا قىزمەت كورسەتەتىن 17 اكىمدىك باسقارماسى, 33 كوممۋنالدىق جانە اۆاريالىق قىزمەتتەر, 81 ليفت شارۋاشىلىعى, 605 پيك پەن 13 مەملەكەتتىك مەديتسينالىق ۇيىم قازىر «109» نومىرىمەن الماستىرىلدى. وتىنىشتەردىڭ نەگىزگى لەگى (74%) 109 تەلەفون ءنومىرى ارقىلى كەلىپ تۇسەدى. الايدا ءبىر اي بۇرىن بۇل پايىزدىق كورسەتكىش 85%-عا جەتتى. 4 ناۋرىزدا ءبىز وتىنىشتەردى ەندى + 7 747 109 0 109 whatsapp ءنومىرى ارقىلى دا قابىلدايتىنىمىزدى جاريالاعان بولاتىنبىز. ءبىر اي ىشىندە ءبىز وتىنىشتەردىڭ تسيفرلىق فورماتقا اۋىسىن 11 %-عا جەتكىزدىك. بۇعان دەيىن بىزدە باسقا دا ءوتىنىش بەرۋ تاسىلدەرى جۇمىس ىستەپ كەلگەن (تەلەگرام, اكىمدىك سايتى, ءموبيلدى قوسىمشا)» - دەدى iKomek ورتالىعىنىڭ باسشىسى جاننات ءدۇبىروۆا.
مۇنان باسقا, iKomek ورتالىعىنىڭ قىزمەتى اياسىندا بۇگىن ستراتەگيالىق KPIs, ەلوردانى دامىتۋ جوبالارى, ازاماتتاردىڭ وتىنىشتەرىمەن جۇمىس ىستەۋ, قالانىڭ جۇيەلى تۇيتكىلدەرى سياقتى قالانى باسقارۋداعى باستى ماسەلەلەر تولىقتاي تسيفرلانعان جانە ولارعا ونلاين تۇردە مونيتورينگ جاسالادى.
«قالا دامۋى مەن قالالىق سەرۆيستەردىڭ ستراتەگيالىق KPIs ءۇش دەڭگەيلى جۇيەگە باعىنادى. ءاربىر كورسەتكىش اكىمنىڭ جەتەكشىلىك ەتۋشى ورىنباسارى مەن باسقارما باسشىسىنا بەكىتىلگەن. بۇرىن تيىمدىلىك كورسەتكىشتەرى جىلىنا ءبىر رەت باعالانىپ, مالىمەتتەردى جيناپ, ەسەپتەۋ كوپ جۇمىستى قاجەت ەتەتىن بولسا, قازىر ولار اۆتوماتتى تۇردە سانالادى, اقپارات ستاتيستيكا مەن جوبا كەڭسەسىنەن الىنادى. ءاربىر باسشى جەتىستىككە جەتۋ پروگرەسىن كورىپ, ناتيجەگە جەتپەي قالاتىنداي قاۋىپ بولسا, ءتيىستى شارا قابىلداي الادى. نۇر-سۇلتان قالاسى اكىمدىگىنىڭ اپپارات ماجىلىستەرىندەگى ەسەپتەر ازاماتتاردىڭ وتىنىشتەرى بويىنشا قالانىڭ جۇيەلى تۇيتكىلدەرىنە سايكەس قاتاڭ تۇردە تىڭدالادى» - دەيدى جاننات ءدۇبىروۆا.
كاسىپورىنعا قالا اۋماعىندا ورنالاسقان, ادام كوپ جينالاتىن ورىنداردى قامتيتىن 6 مىڭنان استام بەينەباقىلاۋ كامەراسى قوسىلدى.
بۇگىنگى تاڭدا iKomek ورتالىعى جاعداياتتاردىڭ ۋاقىتىلى شەشىلۋىن, ەلوردا تىنىس-تىرشىلىگىنە مونيتورينگ جانە تالداۋ جۇرگىزىلۋىن ۇيلەستىرەتىن قۇرال رەتىندە قىزمەت ەتەدى.
