ءىس-شارا نۇر-سۇلتان قالاسىن 2050 جىلعا دەيىن دامىتۋ ستراتەگياسىن ازىرلەۋ اياسىندا ءوتتى. شارانى «ستراتەگيالىق زەرتتەۋلەر مەن كونسالتينگ ورتالىعى» جشس-ءنىڭ ازىرلەۋشىلەرى جانە «Strategy Partners Group» توبى قالا اكىمدىگىمەن بىرلەسە ۇيىمداستىردى.
تاقىرىپتىڭ ەرەكشەلىكتەرىنە بايلانىستى ءىس-شاراعا ونەركاسىپتىڭ, بيزنەس قاۋىمداستىقتاردىڭ, تۋريزم جانە اكىمدىك وكىلدەرى قاتىستى.
شاقىرىلعان قاتىسۋشىلار اراسىندا «Astana» الەۋمەتتىك-كاسىپكەرلىك كورپوراتسياسىنىڭ (اكك) وكىلدەرى, «استانا-ينۆەست», ونەركاسىپ ءوندىرىسى وداعى, استانا كونۆەنشن بيۋروسى استانا حالىقارالىق قارجى ورتالىعى, «ەل-تەرەزي» شوك, «اstana-Technopolis» اەا جانە باسقا دا ۇيىمداردىڭ وكىلدەرى بار.
تالقىلاۋ بارىسىندا كاسىپكەرلىك جانە قالالىق بيلىك وكىلدەرى قالانىڭ دامۋى مەن قازىرگى تاڭدا دامۋعا كەدەرگى كەلتىرەتىن تەتىكتەرگە قاتىستى پىكىرلەرىمەن الماستى. ستراتەگيانى ازىرلەۋشىلەردىڭ ايتۋىنشا, نۇر-سۇلتان 2050 جىلعا قاراي باسەكەگە قابىلەتتى جانە ۇنەمى دامۋشى ەكونوميكاعا يە, تۇرعىندار مەن تۋريستەر ءۇشىن قولايلى ماكرووڭىردىڭ جاھاندىق قالاسى بولۋى ءتيىس.
جيىن بارىسىندا ايتىلعان دامۋدىڭ نەگىزگى يدەيالارى قالاعا شىعارماشىلىق ادامداردى تارتۋ جانە ولاردىڭ داعدىلارىن دامىتۋ ءۇشىن مۇمكىندىكتەردى قامتاماسىز ەتۋ; قىزمەت كورسەتۋ سەكتورىن قامتيتىن شاعىن جانە ورتا بيزنەستى دامىتۋ; قارجى ۇيىمدارىن ەلورداعا تارتۋ; شەتەلدىك ينۆەستورلار مەن قالا قوناقتارى الدىندا قالانىڭ دامۋ باعىتىن دۇرىس كورسەتۋگە قاتىستى بولدى.
قاتىسۋشىلار نەگىزگى پروبلەمالاردىڭ قاتارىنا مىنالاردى جاتقىزدى: ينۆەستورلاردى تارتۋعا جوعارىدا اتالعان ۇيىمدار اراسىنداعى ۇيلەستىرۋدىڭ بولماۋى; قالانىڭ جەر ۋچاسكەسىنە جانە بيزنەس ءۇشىن ينفراقۇرىلىمىنا قولجەتىمسىزدىك. ۇسىنىلعان جۇيەلىك شەشىمدەردىڭ ءبىرى – جەر ۋچاسكەلەرىنىڭ بىرىڭعاي دەرەكقورىن قۇرۋ, سەبەبى قولدانىستاعى saulet.astana ۆەب-سايتى تولىق اقپارات بەرمەيدى.
قاتىسۋشىلار سونداي-اق, وسىنداي وتىرىستاردىڭ ارتىقشىلىقتارى مەن تيىمدىلىگىن اتاپ ءوتتى. تاراپتار ىسكەرلىك جانە قوعامدىق ورتا مەن جەرگىلىكتى اتقارۋشى ورگاندار اراسىندا وسىنداي تۇراقتى كەزدەسۋلەردى وتكىزۋ تۋرالى ۋاعدالاستى.
ءىس-شارانى ۇيىمداستىرۋشىلار «نۇر-سۇلتان – جايلى قالا», «قالانىڭ دەموگرافيالىق ۇردىستەرى», «4-ءشى يندۋستريالدىق رەۆوليۋتسيا كەزەڭىندەگى قالالار», «نۇر-سۇلتان – دارىندىلارعا ارنالعان» سياقتى ءتورت تاقىرىپ بويىنشا دوڭگەلەك ۇستەل وتكىزۋدى جوسپارلاپ وتىر. حابارلامالار قالا اكىمدىگىنىڭ سايتىندا جانە الەۋمەتتىك جەلىلەردە جاريالاناتىن بولادى.
