كەڭ اۋقىمدى ەكسپەديتسياعا بيزنەس-قۇرىلىم, زيالى قاۋىم وكىلدەرى, وتاندىق شوۋ-بيزنەس جۇلدىزدارى, بلوگەرلەر جانە باق وكىلدەرى, بارلىعى 1000 ادامداي قاتىستى.
ەكسپەديتسيانى قورىتىندىلاۋ جانە جابىلۋىنا وراي ساۋران قالاشىعىنىڭ اۋماعىندا وتكەن شاراعا قاتىسقان مادەنيەت جانە سپورت ءمينيسترى ارىستانبەك مۇحامەدي ۇلى ايرىقشا ماڭىزعا يە باستامانىڭ ءساتتى جۇزەگە اسۋىمەن قۇتتىقتادى.
- بۇگىنگى شارا بابالارىمىزدىڭ عاسىرلار بويعى مۇراسىنىڭ قازىرگى تاڭداعى وزەكتىلىگىنىڭ كەرەمەت كورىنىسى. «Nomad Explorer» ەكسپەديتسياسىنا قاتىسقان بارلىق قازاقستاندىقتارعا العىس ايتامىن. ءبىزدىڭ كەڭ-بايتاق سۇيىكتى وتانىمىز جاڭا قىرىنان اشىلىپ, جۇرەككە جىلۋ بەرەتىن جەرلەر كوبەيگەنىنە سەنىمدىمىن, - دەدى ارىستانبەك مۇحامەدي ۇلى.
تۇركىستان وبلىسىنداعى ساۋران قالاشىعىندا تۇڭعىش رەت ۇيىمداستىرىلعان ەكسپەديتسيالىق جوبا الىس-جاقىن شەتەلدىك تۋريستەردى تارتۋعا جاسالعان سەرپىندى قادامداردىڭ ءبىرى. وسى ورايدا, مينيستر ورتاعاسىرلىق قالانىڭ تاريحىن ناسيحاتتاۋعا ارنالعان جوبانى قولعا الىپ, جۇزەگە اسۋىنا تىكەلەي اتسالىسا وتىرىپ, جوعارى دارەجەدە ۇيىمداستىرعان كاسىپكەر مارعۇلان سەيسەمباەۆ, BI Group قۇرىلىس حولدينگىنىڭ باسشىسى ايدىن راحىمباەۆ پەن بەلگىلى رەجيسسەر اقان ساتاەۆتارعا العىس ايتتى.
ءوز كەزەگىندە ەكسپەديتسيا ۇيىمداستىرۋشىلارى دا تۇركىستانعا كەلگەن ساياحاتشى توپتى نازاردان تىس قالدىرماي ارنايى كەلگەن مينيسترگە رياسىز ىقىلاستارىن ءبىلدىردى.
تاريحي كورىنىسپەن دايارلانعان كونتسەرت ساحناسى مەن ساماننان جاسالعان كورەرمەن ورىندىقتارى, «تۇران» فولكلورلىق-ەتنوگرافيالىق ءانسامبلى مەن باسقا دا ونەر يەلەرىنىڭ قاتىسۋىمەن وتكەن THE SOUL OF NOMADS فەستيۆالى جيىنعا قاتىسۋشىلارعا ەرەكشە اسەر سىيلادى.
حالىقارالىق شارادا «تايقازان» گاسترونوميالىق فەستيۆالى, كوكپار, ۇلتتىق ويىندار, جىلقى مەن تۇيەگە ءمىنىپ ءجۇرۋ, اۋە شارلارى شوۋى, UNISEF - The Garden of Nomads قاتىسۋىمەن نومادتار باعىندا 500 كوشەت وتىرعىزۋ شارالارى ءوتتى.
