دەلەگاتسيا الدىمەن №2 قالالىق بالالار كلينيكالىق اۋرۋحاناسىنىڭ جانىنداعى كونسۋلتاتسيالىق-دياگنوستيكالىق پەدياتريا ورتالىعىنا باردى. وندا دەلەگاتسياعا قابىلداۋ ءبولىمى مەن حيرۋرگيا كەشەنىنىڭ جۇمىسى تانىستىرىلدى. ونى بيزنەستىڭ الەۋمەتتىك جاۋاپكەرشىلىگى اياسىندا اسەل تاسماعامبەتوۆا باسشىلىق ەتەتىن «ءسابي» قايىرىمدىلىق قورى قۇرعان. جوبانىڭ جالپى قۇنى – 2,5 ملرد تەڭگە.
قازاق ونكولوگيا جانە راديولوگيا عىلىمي-زەرتتەۋ ينستيتۋتىندا گ.ابدىقالىقوۆا مولەكۋلالىق-گەنەتيكالىق زەرتتەۋلەر ورتالىعىنىڭ جۇمىسىمەن تانىستى. مەديتسينالىقمەكەمە زاماناۋي جابدىقپەن: كومپيۋتەرلىك جانە ماگنيتتى-رەزونانستىق توموگرافتارمەن, ساراپتامالىق كلاستاعى راديوگرافيكالىق رەنتگەن جانە ۋلترادىبىستىق جۇيەلەرمەن, ەكگ-اپپاراتتارمەن جابدىقتالعان. بارلىق پروتسەس تسيفرلى فورماتتا جۇزەگە اسىرىلادى.
كەلەسى ءىس-شارا 2018 جىلدىڭ ماۋسىم ايىنان بەرى جۇمىس ىستەپ كەلە جاتقان بەلسەندى ۇزاق ءومىر ءسۇرۋ ورتالىعىندا ءوتتى. وندا مەديتسينالىق كابينەت, يوگا زالى, كومپيۋتەرلىك ساۋاتتىلىققا وقىتۋ, قازاق جانە اعىلشىن ءتىلدەرىن ۇيرەتۋ كابينەتتەرى, سونداي-اق, ەڭبەك تەراپياسىنا ارنالعان كابينەت بار. وسى ۋاقىت ارالىعىندا 900-گە جۋىق زەينەتكەر باسسەيندەر مەن فيتنەسكە تەگىن بارىپ, 300-دەن استام قارت ادام «سۇڭقار» تالىمباعىنا, بيىك تاۋداعى «مەدەۋ» سپورت كەشەنىنە, ورتالىق مەملەكەتتىك مۋزەيگە جانە ت.ب. جەرلەرگە تەگىن ەكسكۋرسيا جاسادى.
سونداي-اق پرەمەر-مينيستردىڭ ورىنباسارى مەن ەڭبەك جانە حالىقتى الەۋمەتتىك قورعاۋ مينيسترى حالىقتى جۇمىسپەن قامتۋ ورتالىعىنىڭ قىزمەتىنە تەكسەرۋ جۇرگىزدى. جىل باسىنان بەرى 3,4 مىڭ ادام جۇمىسقا ورنالاستىرىلدى, ونىڭ 254-ءى از قامتىلعان, كوپ بالالى وتباسىلاردان شىققاندار. 717 ادام الەۋمەتتىك جۇمىس ورىندارىمەن قامتاماسىز ەتىلدى. 2,5 مىڭ ادام قوعامدىق جۇمىستارعا تارتىلدى.
كەزدەسۋدە «Inno Track» جشس-نىڭ باس ديرەكتورى دارحان قىزايباەۆتىڭ سوزىنە ەرەكشە نازار اۋدارىلدى. ونىڭ كاسىپورنى «Vollert» نەمىس تەحنولوگياسى بويىنشا تەمىر-بەتوندى شپالدار شىعارادى. زاۋىتتىڭ جىلدىق قۋاتتىلىعى – 500 مىڭ شپال, 100 ادام جۇمىس ىستەيدى. ول تالاپتى جاستار ءۇشىن «ءمۇمكىندىكتەر ەسىگىن» اشاتىن زاماناۋي يندۋستريالىق ساياسات ءۇشىن مەملەكەتكە العىسىن ءبىلدىردى.
سونداي-اق «Youth Art» جاس سۋرەتشىلەر ۇيىمىنىڭ باسشىسى كريستينا بەكمۋرزاەۆانىڭ قۇتتىقتاۋ ءسوزى قىزىعۋشىلىقپەن تىڭدالدى. ولار «ادامدارعا ارنالعان قالا» تۇجىرىمداماسىن ىسكە اسىرۋعا بەلسەنە قاتىسىپ, 10 جوعارى دەڭگەيدەگى شاعىن ساۋلەتتىك ءپىشىندى ورناتتى.
بۇگىندە قالادا كوپ بالالى انالار مەن قارت ادامداردى قولداۋعا باعىتتالعان «باقىتتى وتباسى» جانە «بەلسەندى ۇزاق ءومىر» جول كارتالارى ىسكە اسىرىلۋدا. بۇل باعدارلامادا 13 شارا قاراستىرىلعان. «ءبىر تەرەزە» قاعيداتى بويىنشا قۇرىلعان «باقىتتى وتباسى» ورتالىعىندا زاڭگەرلەر, پسيحولوگتار, جاتتىقتىرۋشىلار جانە ت.ب. جۇمىس ىستەيتىن بولادى. «باقىتتى وتباسى» قايىرىمدىلىق قورىندا مەتسەناتتار مەن جۇرتشىلىقتىڭ كومەگىمەن 131 ملن تەڭگەدەن استام قاراجات جينالدى. 1 مىڭنان استام وتباسىنا ماتەريالدىق كومەك كورسەتىلدى.
الماتى ەلىمىزدە العاشقىلاردىڭ ءبىرى بولىپ «باقىتتى وتباسى» جەڭىلدەتىلگەن تۇرعىن ءۇي باعدارلاماسىن ىسكە قوستى. مامىر ايىندا 30 وتباسىن باسپانامەن قامتاماسىز ەتۋ جوسپارلانىپ وتىر. قازىرگى ۋاقىتتا الەۋمەتتىك تولەمدەردىڭ ءمولشەرى ءوستى. اتاپ ايتقاندا, ءومىردىڭ قيىن جاعدايىنا تاپ بولعان ازاماتتارعا بەرىلەتىن ءبىر جولعى الەۋمەتتىك كومەك 10 ايلىق ەسەپتىك كورسەتكىشتەن (25 250 تەڭگە) 20 ايلىق ەسەپتىك كورسەتكىشكە دەيىن (50 500 تەڭگە) كوبەيدى. بۇل كومەكپەن 10 مىڭنان استام وتباسى قامتىلادى.
2015 جىلدان باستاپ بيزنەستىڭ الەۋمەتتىك جاۋاپكەرشىلىگى اياسىندا 25,7 ملرد تەڭگەگە 40-تان استام جوبا ىسكە اسىرىلىپ كەلەدى. بۇگىندە 21,6 ملرد تەڭگە سوماسىنا 32 جوبا ىسكە اسىرىلدى. 7 بالاباقشا, 1 ەمحانا, فەلدشەرلىك-اكۋشەرلىك پۋنكت جانە ت.ب. سالىندى.
كوپ بالالى انالارمەن كەزدەسۋ بارىسىندا ۆيتسە-پرەمەر مەملەكەت ازاماتتاردىڭ از قامتىلعان ساناتىنا الەۋمەتتىك قولداۋ كورسەتۋگە باعىتتالعان شارالار قابىلداپ جاتقانىن اتاپ ءوتتى. 1 ساۋىردەن باستاپ اتاۋلى الەۋمەتتىك كومەك كورسەتۋ كريتەريلەرى ەڭ تومەنگى كۇنكورىس دەڭگەيىنىڭ 70%-نا دەيىن ارتىپ, 20789 تەڭگەنى قۇرادى, مامىر ايىنان باستاپ جالعا بەرىلەتىن تۇرعىن ءۇي بولىنە باستايدى, ال 1 ماۋسىمنان باستاپ بيۋدجەت سالاسىنىڭ جالاقىسى تومەن قىزمەتكەرلەرىنىڭ ەڭبەكاقىسى كوبەيەدى. ءبىلىم بەرۋ جانە دەنساۋلىق ساقتاۋ جۇيەسىندەگى قىزمەتتەردىڭ ساپاسىن ارتتىرۋ بويىنشا شارالار قابىلداناتىن بولادى. سونداي-اق جۇمىس توبىنىڭ مۇشەلەرى جاڭا الەۋمەتتىك ساياسات اياسىندا ىسكە اسىرىلىپ جاتقان جاڭالىقتار تۋرالى اقپارات بەردى.
س.د.اسفەندياروۆ اتىنداعى ۇلتتىق مەديتسينا ۋنيۆەرسيتەتىنىڭ جاتاقحاناسىن ارالاۋ بارىسىندا پرەمەر-ءمينيستردىڭ ورىنباسارى «ەلباسىنىڭ بەس الەۋمەتتىك باستاماسىن» ىسكە اسىرۋ اياسىنداعى تاپسىرمانىڭ ورىندالۋ بارىسىمەن تانىستى.
گ.ابدىقالىقوۆا جۇمىس ساپارىنىڭ سوڭىندا جوعارى وقۋ ورىندارىنىڭ رەكتورلارىمەن كەزدەستى. كەزدەسۋدە ستۋدەنت جاستاردىڭ ءومىر ءسۇرۋ جاعدايىن جاقسارتۋ جونىندەگى ءۇشىنشى باستامانىڭ ىسكە اسىرىلۋى تۋرالى اقپارات تىڭدالدى, جوعارى ءبىلىم بەرۋدەگى وزەكتى ماسەلەلەر تالقىلاندى.
2018 جىلى جوعارى وقۋ ورىندارىنىڭ قاراجاتى ەسەبىنەن 1200 ورىنعا ارنالعان 3 جاتاقحانا پايدالانۋعا بەرىلدى. بيىل دا جەكە قاراجات ەسەبىنەن 2 340 ورىنعا ارنالعان 5 جاتاقحانانى اياقتاۋ جوسپارلانۋدا.
كەزدەسۋدىڭ قورىتىندىسى بويىنشا پرەمەر-ءمينيستردىڭ ورىنباسارى گ.ابدىقالىقوۆا جاتاقحانالاردى ۋاقتىلى ءجانە ساپالى پايدالانۋعا بەرۋدى قامتاماسىز ەتۋ, ستۋدەنتتەرگە قولايلى جاعداي جاساۋ ءۇشىن قاجەتتى شارالار قابىلداۋ جونىندە جوعارى وقۋ ورىندارىنىڭ رەكتورلارىنا, مەملەكەتتىك ورگانداردىڭ باسشىلارىنا بىرقاتار ناقتى تاپسىرما بەردى.
