كوكجايلاۋ شاتقالىن قورعاۋعا ارنالعان قوعامدىق ناۋقان الماتىدا سەگىز جىل بويى جۇزەگە اسىرىلىپ كەلەدى, قازىر ول ازاماتتىق وزىندىك سانا سەزىمنىڭ نىشانىنا اينالىپ ۇلگەردى. 2019 جىلدىڭ 8 ساۋىرىندە الماتىدا قوعامدىق كەڭەستىڭ كەڭەيتىلگەن ءماجىلىسى ءوتىپ, وندا قالا اكىمى ب.بايبەك «كوكجايلاۋ» شيپاجايىن جۇزەگە اسىرۋ تۋرالى ۇسىنىستى «قۇرىلىس ماسەلەلەرىن مۇقيات زەرتتتەۋ قاجەت» دەگەن سىلتاۋمەن 3-5 جىلعا شەگەرە تۇرۋدى ۇسىندى. بۇل قادامدى كوپتەگەن ساراپشىلار قوعام ءۇشىن جاسالعان كەڭشىلىك رەتىندە قابىلداعان بولسا, بىراق ەكولوگيالىق بەلسەندىلەر بۇعان اسا سەنبەگەندى ءجون كورەدى.
«جوبانى جۇزەگە اسىرۋدى بىرنەشە جىلعا كەيىنگە شەگەرۋ وسىنداي ماڭىزدى ماسەلەنىڭ شەشىمى ەمەس دەپ ەسەپتەيمىز. مۇنداي قۇرىلىسقا قارسى كوتەرىلىپ وتىرعاندىعىمىزدىڭ باستى سەبەبى – كوكجايلاۋ شاتقالى ىلە-الاتاۋ ۇلتتىق تابيعات ساياباعىنىڭ قۇرامىنا كىرەدى جانە دە قازىر ۇلتتىق ساياباق اۋماعىمەن قورعالعان. كوكجايلاۋ شاتقالىن ەرەكشە قورعالاتىن تابيعات ايماعى ساناتىنان قورداعى جەرگە اۋدارۋ شاتقالداعى جانە ۇلتتىق ساياباققا جاپسارلاس جاتقان اۋماقتاعى ەكولوگيالىق جاعدايدىڭ ايتارلىقتاي ناشارلاۋىنا اكەلىپ سوقتى» دەپ جازادى بەلسەندىلەر قازاقستان پرەزيدەنتى قاسىم-جومارت توقاەۆقا جولداعان اشىق حاتىندا.
ۇلتتىق ساياباقتاردىڭ جەرىن «ءتۋريزمدى دامىتامىز» دەگەن سىلتاۋمەن جابايىلىقپەن قولدانۋ بۇگىنگى كۇنى جاپپاي كورىنىس تاۋىپ, قازاقستاندىقتاردىڭ ەكولوگيالىق امان-ساۋلىعىنا قاۋىپ ءتوندىرىپ تۇر, دەپ ەسەپتەيدى بەلسەندى ەكولوگشىلار. الايدا بۇل تۇستا ۇلتتىق ساياباقتاردىڭ اۋماعىن شارۋاشىلىق ماقساتتا قولدانۋ جايلى عانا ءسوز بولىپ تۇرعان جوق. تابيعات ورتاسىن كورگەنسىزدىكپەن بۇزۋ وقيعالارى بۇكىل ەل اۋماعىندا ورىن الىپ, حالىقتىڭ ۇلكەن الاڭداۋشىلىعىن تۋدىرىپ وتىر. ورالداعى بالىقتاردىڭ قىرعىنى, پاۆلودارداعى ورمانداردى شاۋىپ تاستاۋ, ەلىمىزدىڭ وڭتۇستىگى مەن شىعىسىندا سۋايدىندارىنىڭ ونەركاسىپتىك قالدىقتارمەن لاستانۋى, اۋىل شارۋاشىلىعىندا حيميكاتتاردى باقىلاۋسىز پايدالانۋ, قوقىسپەن لايلانعان وزەن جاعالاۋلارى, ءىرى قالالارداعى اۋانىڭ ون ەسەگە ارتىق لاستانۋى – مۇنىڭ ءبارى قازىرگى زامانداعى قازاقستاننىڭ كوز الدىندا تۇرعان شىندىق.
«ەلدىڭ ەكولوگيالىق امان-ساۋلىعى بۇگىنگى كۇنى ءبىرىنشى جوسپارعا شىعىپ وتىر دەپ ەسەپتەيدى «كوكجايلاۋدى امان ساقتاپ قالايىق» توبىنىڭ وكىلدەرى. وسى ماسەلەلەردى شەشۋگە پرەزيدەنتتىككە ۇمىتكەرلەردىڭ كوڭىل بولمەۋى دۇرىس بولماس. ءبىز ساياساتكەرلەردى ەكولوگيالىق ماسەلەلەرگە ءجىتى كوڭىل بولۋگە ۇندەيمىز. وسى تۇستا تابيعات ماسەلەلەرى سايلاۋ الدى ناۋقان كەزىندە عانا ەمەس, سونىمەن بىرگە, ءىس جۇزىندە جۇيەلى تۇردە شەشىلۋى ءتيىس» دەپ ەسەپتەيدى قازاقستان قوعامدىق ۇيىمدار ەكوفورۋمىنىڭ توراعاسى ۆاديم ني.
